Kwamamaza

Abasora baracyabangamiwe n’ikoranabuhanga rya RRA ryugarijwe n’ibibazo

Yanditswe kuya 22-09-2016 saa 13:57' na Mukaneza M.Ange


Bamwe mu basora banini (basora 70% by’imisoro yose mu gihugu) baravuga ko babangamiwe n’ikibazo kigaragara mu ikoranabuhanga ry’Ikigo cy’Igihugu gishinzwe gukusanya Imisoro n’Amahoro (RRA),aho bishyura imisoro mu gihe baba barumvikanye, nyuma bakabwirwa ko batigeze bishyura cyangwa ko amafaranga yabo yagiye mu misoro y’undi mwaka.

Iki ni kimwe mu bibazo byagaragarijwe mu nama nyunguranabitekerezo yahuje abasora banini n’ubuyobozi bwa RRA hagamijwe kuganira ku mikoranire yabo ya buri munsi. Inama yabereye i Kigali ku itariki 22 Nzeri 2016.

Muri iyi nama, umwe mu basora yavuze ko nyuma y’igenzura rya RRA ribereka amafaranga y’imisoro bagomba gutanga ndetse bakumvikana igihe n’ibyiciro aya mafaranga agomba kwishyurwamo, ngo bajya kwishyura muri banki ariko nyuma bakazabwirwa ko batigeze bishyura uko bikwiye cyangwa ko yashyizwe mu kwezi k’undi mwaka.

Bemeza ko ibi bibabangamiye cyane bitewe n’uko bibatwara umwanya basubira kuzana impapuro zigaragaza ko bishyuye, bagasaba ko byakosorwa.

Mu gusubiza iki kibazo, Komiseri ushinzwe imisoro y’imbere mu gihugu muri RRA, Kayigi Aimable yagize ati” Zimwe mu mbogamizi turi guhura na zo ni abantu bajya kwishyura muri banki, batabanje kunyura kuri RRA. Nibyo koko aya mafaranga tuzayabona ariko se tuzabwirwa n’iki ko ari ay’umusoro ku nyongeragaciro,cyangwa ari ukwishyura icyiciro twemeranyijeho?”

Yakomeje avuga ko ariko niba hari abacuruzi bagiye kwishyura babanje kunyura muri RRA ngo ibahe umubare w’ibanga, nyuma bakaza guhura n’iki kibazo, bagiye gukora iperereza kugira ngo bikemurwe.

Komiseri mukuru wungirije muri RRA, Bizimana Ruganintwari Pascal, yavuze ko sisiteme (system) bakoresha batavuga ko ari nta makemwa bityo ngo bakaba bagiye gushyiraho indi nshya mu rwego rwo gukomeza guha serivisi nziza abasora.

Ruganintwari kandi yanagarutse ku rutonde ruherutse gushyirwa ahagaragara rw’ibigo 25 bitanga inyemezabwishyu z’impimbano bagamije kunyereza umusoro ku nyongeragaciro (TVA) ugera kuri miliyari esheshatu, abasaba kwitwararika bakajya babanza kugenzura neza kugira ngo barebe niba nta makosa yaba yarakozwe n’abakozi babo.

Ati” Ntabwo twavuga ko byakozwe n’abasora banini, aho dufatiye ingamba, nababwira kuri uyu munsi tumaze gufatamo 10 muri ba bantu 25. Imashini hafi enye nazo baraziduhaye ndetse abenshi muri bo bemeye ko ibyo bakoraga kwari ugucura inyemezabwishyu ntacyo bacuruje.”

Muri iyi nama kandi abasoreshwa by’umwihariko abari mu bwubatsi, bibukijwe ko bagomba kujya bafatira 15% by’amafaranga baba bagomba kwishyura abo baguriyeho ibikoresho nk’imicanga ariko batanditse ku musoro; ibi bikazatuma na bo bashishikarira kwiyandikisha no guhabwa nimero ibaranga (TIN).

RRA kandi yagaragaje ubushakashatsi yakoze muri 2015, bugaragaza uko abasora bitabira gutanga imisoro uko bikwiye.

Ubu bushakashatsi bwasanze mu bigo bibarizwa mu cyiciro cy’abasora banini, 36 bititabira gusora neza ku kigero cyo hejuru na ho 75 bikaba biri ku kigero cyo hagati, kandi nyamara ibyo bigo uko ari 111 ngo ni byo byihariye 30% by’imisoro itangwa n’ibigo binini.

Ni mu gihe ku bantu ku giti cyabo, 10 ari bo bafite ibibazo byinshi mu bijyanye no gusora, na ho batanu bakaba bari ku kigero cyo hagati. Bose uko ari 15 bihariye 70% by’imisororo itangwa n’abantu ku giti cyabo mu cyiciro cy’abasora banini.

Muri rusange mu Rwanda habarurwa abasora banini 425, bihariye 70% by’imisoro yose itangwa mu gihugu.

Kugira ngo umusoreshwa ajye mu cyiciro cy’abasoreshwa banini agomba kuba afite igicuruzo kiri hejuru ya miliyari imwe, abaciriritse baba bafite igicuruzo kiri hagati ya miliyoni 400 na miliyari imwe mu gihe abasigaye bose bafatwa nk’abasoreshwa bato.

Abasora banini bagaragaje ko ikoranabuhanga rya RRA rifite ikibazo
Abasora basaba ko ibibazo biri mu ikoranabuhanga rya RRA byakemurwa bakareka guhora mu nzira
RRA irasaba abasoreshwa kutajya bihanganira abacuruzi badakozwa ibyo kwishyura imisoro
RRA ivuga ko igiye gukurikirana iby'iki kibazo bigakemuka
Abasoreshwa babasabwe kwirinda kunyereza imisoro mu buryo bwose bushoboka

Amafoto:Luqman Mahoro


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 18 Ugushyingo 2016
Copyright © 2009 -2014 - IGIHE Ltd - All Rights Reserved