Abanyeshuri ba kaminuza bahawe amahirwe yo gutsindira miliyoni 1,5 Frw ku Isoko ry’imari n’imigabane

Yanditswe na Evariste Nsengimana
Kuya 6 Werurwe 2018 saa 08:59
Yasuwe :
0 0

Ikigo Kigenzura Isoko ry’Imari n’Imigabane mu Rwanda (CMA) cyatangije amarushanwa ku banyeshuri biga mu mashuri makuru na kaminuza mu Rwanda, rizakorwa hasuzumwa ubumenyi bafite ku Isoko ry’Imari n’Imigabane, uzahiga abandi akazahembwa miliyoni 1,5Frw.

Iri rushanwa rizakorwa ku bufatanye bw’Ikigo kigenzura isoko ry’Imari n’Imigabane; Isoko ry’Imari n’Imigabane (RSE); Ikigo cy’Ubushakashatsi ku bukungu (EPRN) n’Umuryango mpuzamahanga w’abanyeshuri mu by’ubukungu n’ubumenyi bucuruzi (AISSEC).

Iri rushanwa rizwi nka Capital Market University Challenge 2018, rigiye kuba ku nshuro ya gatanu, rizahesha abanyeshuri batatu ba mbere gutsindira amafaranga y’u Rwanda kuva ku bihumbi 200 kugera kuri niliyoni 1.5 Frw bitewe n’icyiciro batsinzemo.

Icyiciro kimwe kizatoranywamo batatu ba mbere batsinze mu buryo bw’isuzumabumenyi ry’ibisubizo bigufi (Quiz), uwa mbere azahembwa miliyoni 1,5Frw; uwa kabiri miliyoni 1.2 Frw naho uwa gatatu abone ibihumbi 800 Frw.

Mu kindi cyiciro cyizakorwa mu buryo bw’inyandiko irambuye (Essay), uwa mbere azahembwa ibihumbi 500 Frw, uwa kabili 300 Frw naho uwa gatatu ahembwe 200 Frw.

Nyuma yo kuritangirizaga mu ishami rya Kaminuza y’u Rwanda ryigisha ubukungu n’ubucuruzi (UR CBE) i Gikondo, Umwe mu banyeshuri witwa Rukundo Emmanuel yavuze ko ari amahirwe akomeye abanyeshuri ba Kaminuza babonye yo gutsindira ayo mafaranga ariko banimenyereza umuco wo kwizigama mu gihe kiri imbere.

Umuyobozi mukuru wa RNIT Iterambere Fund, Gashugi André, yavuze ko amarushwa agamije gukangurira abanyeshuri n’abarimu kugira umuco wo kwizigama.

Yagize ati “Aya marushanwa agamije ko abanyeshuri n’abarimu babo batangira gutekereza uko bakwizigamira bashora imari banyuze ku isoko ry’imari n’imigabane. Barakora amarushanwa ku bumenyi bafite butandukanye kuri iryo soko. Twe turashaka ko bamenya ko hari uburyo bashyiriweho batangira kugira uruhare mu kwizigamira kuko Iterambere Fund ntiriheza.”

Umuyobozi mukuru w’agateganyo w’Ikigo kigenzura Isoko ry’imari n’imigabane, Bundugu Eric, yabwiye abanyeshuri ko kwizigamira bidasaba amafaranga menshi.

Yagize ati “Turashaka ko aba banyeshuri badategereza kubona umushahara ngo bategereze kubwirwa kwizigama […] nta mafaranga make yo kuzigama abaho kuko aba hari igihe baba bafata buruse cyangwa iwabo bamwishyurira. Nababwiye niba ku munsi akoresha itike 1000 Frw, ashobora kwizigama igiceri cy’ijana cyangwa 200 Frw nyuma y’igihe runaka akazaba afite menshi.”

Abanyeshuri basaga 1200 baturutse muri kaminuza zitandukanye mu Rwanda bamaze kwiyandikisha kwitabira iri rushanwa ariko kwiyandikisha bizarangira ku wa 15 Werurwe 2018.

Biteganyijwe ko amarushanwa ku rwego rw’intara azaba ku wa 22 Werurwe 2018, abazatsinda bakajya ku rwego rw’igihugu.

Umuyobozi mukuru w'Isoko ry'Imari n'Imigabane, Celestin Rwabukumba
Abanyeshuri basobanurirwa iby'irushanwa ku Isoko ry'Imari n'Imigabane
Umuyobozi mukuru w’agateganyo w’Ikigo kigenzura Isoko ry’imari n’imigabane, Bundugu Eric
Bamwe mu bayobozi ba Kaminuza ya Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza