Kwamamaza

Abadepite bemeje miliyari 58Frw z’inguzanyo y’Abashinwa yo kubakisha imihanda ya Kigali

Yanditswe kuya 13-09-2016 saa 18:05' na Rabbi Malo Umucunguzi


Inteko Ishinga Amategeko, Umutwe w’Abadepite, yatoye itegeko ryemera kwemeza burundu amasezerano y’inguzanyo hagati ya Repubulika y’u Rwanda na Banki y’u Bushinwa y’ubucuruzi bw’ibyinjira n’ibisohoka mu gihugu, yerekeranye n’inguzanyo ya miliyoni z’ama-Yuan 488 (asaga miliyari 58 Frw) yo gutunganya imihanda yo mu mujyi wa Kigali.

Iyi nguzanyo ihwanye na miliyari 58 Frw izishyurwa mu gihe cy’imyaka 13 ariko nyuma y’imyaka 7 nibwo u Rwanda ruzatangira kuyishyura ku nyungu ya 2% ku mwaka.

Muri uyu mushinga wo kubaka imihanda, hazubakwa ibilometero 51.5, iyubakwa ryayo rikazagenzurwa n’Umujyi wa Kigali, rigashyirwa mu bikorwa n’Ikigo cy’Ubwubatsi cyo mu Bushinwa, China Road and Bridge Corporation.

Muri uyu mushinga uzuzura mu mezi 60, harimo gusana imihanda uva Nyabugogo ujya mu Mujyi;Umuhanda uva kuri Serena Hotel ndetse n’ugana I Nyamirambo, imihanda yo mu gice cy’ubucuruzi mu Mujyi rwagati, Umuhanda wa Chez Lando-KIE n’indi itandukanye, yose ikazagenda yubakwa ku buryo ihabwa inzira enye, imodoka ebyiri ebyiri zigasangira icyerekezo.

Hari imihanda ine mishya nayo izubakwa, irimo umuhanda Kagugu-Nyacyonga; Cyumbati-Gikondo; Kimisange-Cyumbati- Nyamirambo; na Nyamirambo-Kimisange-Nyanza, yose ikazubakwa mu buryo izaba ikoreshwa n’ibinyabiziga bikoresha umuvuduko utarenga ibilometero 40 ku isaha.

Uyu mushinga witezweho guteza imbere urujya n’uruza rukenewe rwagombye kuba rwagezweho, rukazitirwa n’imbogamizi ziri mu ngendo mu mihanda, no guteza imbere urujya n’uruza mu turere uzakoreramo, kandi uvugurure ubushobozi na serivisi zo mu muhanda.

Uyu mushinga ujyanye n’icyerekezo 2020 cya Guverinoma y’u Rwanda na gahunda yayo ya kabiri y’Imbaturabukungu ya Kabiri (EDPRS II) ya 2013 – 2018.

Amasezerano y’iyi nguzanyo ya 488,000, 000 z’Ama Yuan (¥) agenewe Umushinga wo gutunganya imihanda yo mu Mujyi wa Kigali yashyiriweho umukono i Beijing mu Bushinwa kuwa 29 Nyakanga 2016, hagati ya Repubulika y’u Rwanda na Banki y’u Bushinwa y’Ubucuruzi bw’Ibyinjira n’Ibisohoka mu Gihugu, yemezwa n’Inama y’abaminisitiri iheruka yo kuwa 10 Kanama 2016.

Iyo nama y’i Beijing yigaga ku ishyirwa mu bikorwa ry’amasezerano y’imishinga iheruka gushyirwaho umukono hagati ya Afurika n’u Bushinwa, Forum on China-Africa Corporation (FOCAC).

Mu kiganiro aheruka kugirana n’abanyamakuru kuri iyo nama, Ambasaderi w’u Bushinwa mu Rwanda, Pan Hejun, yavuze ko u Rwanda ruri kungukira muri FOCAC binyuze muri iyi mishinga y’imihanda.

Ati “Murabona ko u Rwanda ruri kubona umugabane warwo kandi mu myaka iri imbere, hari byinshi bigomba kwemeranyaho kandi bikanashyirwa mu bikorwa.”


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved