00:00:00 IGIHE NETWORK KN KINYARWANDA EN ENGLISH FR FRANCAIS

Abadepite basabye ko ibibazo by’ingutu bibangamiye iterambere ry’ubukungu byavugutirwa umuti

Yanditswe na Muhonzire Sylvine
Kuya 5 Gicurasi 2021 saa 02:42
Yasuwe :
0 0

Abadepite bagaragaje ibibazo by’ingutu bibangamiye iterambere ry’ubukungu mu Rwanda byatewe ahanini n’ingaruka za Covid-19, basaba ko byavugutirwa umuti.

Iyi nama yabaye mu rwego rwo kurebera hamwe raporo yatanzwe na Banki Nkuru y’u Rwanda ku bushakashatsi bwakozwe mu 2019/2020.

Umuyobozi wa Komisiyo ishinzwe ubukungu n’ubucuruzi, Depite Théogène Munyangeyo, yavuze ko mu bibazo bibangamiye iterambere ry’ubukungu harimo inguzanyo nke zitangwa mu bijyanye n’ubuhinzi n’ubworozi kandi ibikomoka ku buhinzi bigira uruhare runini mu bukungu bw’u Rwanda ku rugero rwa 25%.

Uyu muyobozi yavuze ko mu mwaka w’ingengo y’imari wa 2019/2020, ibikomoka k’ubuhinzi n’ubworozi byiyongereyeho 2% bitandukanye n’umwaka wawubanjirije aho byari byiyongere kuri 4.4% mu gihe gahunda ya Kane yo guteza imbere ubuhinzi n’ubworozi mu Rwanda (PTSA4) iteganya ko byibura buri mwaka umusaruro w’ibikomoka ku buhinzi wajya byiyongeraho 10%.

Impamvu zagaragajwe zateye uku kugabanuka kw’ibikomoka k’ubuhinzi n’ubworozi, harimo kuba ibihingwa bitegereza imvura kugira ngo bikure neza, mu gihe imashini zifashishwa mu kuvomerera zikenera umuriro w’amashanyarazi kandi ukaba uri ku giciro cyo hejuru.

Munyangeyo yagize ati “Igiciro cy’umuriro w’amashanyarazi gikoreshwa muri gahunda yo kuvomerera ibihingwa kiri hejuru, aho kilowati imwe igura amafaranga y’u Rwanda 126, mu gihe mu nganda nini igura amafaranga 94.”

Ibi ni bimwe mu bituma n’ibiciro by’ibiribwa bizamuka kubera ubuke bw’umusaruro w’ibikomoka k’ubuhinzi, ariyo mpamvu uyu mudepite yasabye Minisiteri y’Ubuhinzi, MINAGRI, kugenzura ibi biciro by’umuriro bikoreshwa muri serivisi z’ubuhinzi cyane izijyanye no kuvomerera.

Mu buhinzi kandi hagaragajwe ikibazo cy’ibiti by’ikawa bigera kuri miliyoni 27 mu biti miliyoni 99 bimaze imyaka irenga 30 bigikoreshwa, bikaba intandaro y’umusaruro muke w’ikawa kandi iri mu byinjiza amadevize menshi mu gihugu.

Yasabye ko hatekerezwa uburyo ibi biti byasimbuzwa hagaterwa ibindi cyane ko igiti cy’ikawa iyo kirengeje imyaka 30 gitewe bibarwa ko kiba cyashaje.

Mu bindi bibazo byagaragajwe harimo izamuka ry’ibiciro by’ubwishingizi bw’ibinyabiziga, cyane moto, aho basabye ko hakongerwa ibyiciro by’ubwishingizi aho kongera amafaranga, asaba abibishinzwe harimo na Ministeri y’Imari n’Igenamigambi gusuzuma iki kibazo hagashyirwaho imirongo ngenderwaho ku bijyanye no kongera ibiciro.

Ikibazo cy’abantu batse inguzanyo mu mabanki ntibishyure neza kubera ingaruka za Covid-19, nacyo cyagaragajwe nka kimwe mu byazitiye ubukungu bw’u Rwanda, aho Depite Munyangeyo yagaragaje ko hafi 33% by’abatanze inguzanyo bahuye n’icyo kibazo, gusa avuga ko hari gushakwa igisubizo binyuze mu kongera igihe cyo kwishyura inguzanyo.

Inteko yasabye Ministeri y’Imari n’Igenamigambi, MINECOFIN, gushaka uburyo abantu bashishikarizwa kwizigamira no gushora imari ku isoko ry’imari n’imigabanye kugira ngo ishoramari ry’igihe kirekire ryiyongere.

Abadepite basabye ko ibibazo by'ubukungu byatewe na Covid-19 byavugutirwa umuti mu maguru mashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .