00:00:00 IGIHE NETWORK KN KINYARWANDA EN ENGLISH FR FRANCAIS

Abacukura amabuye y’agaciro mu Rwanda bahawe umukoro kugira ngo imbogamizi bafite zikemuke

Yanditswe na Ferdinand Maniraguha
Kuya 19 Ugushyingo 2021 saa 05:55
Yasuwe :
0 0

Abakora mu bijyanye n’ubucukuzi bw’amabuye y’agaciro mu Rwanda, basabwe gushyira hamwe no kwishakamo ibisubizo by’ibibazo bahura na byo kugira ngo n’izindi nzego bakeneyeho ubufasha zibone aho zihera zibunganira.

Byatangarutsweho kuri uyu wa Gatanu tariki 19 Ugushyingo 2021 mu Nteko rusange y’Ihuriro ry’abakora ubucukuzi bw’amabuye y’agaciro mu Rwanda, Rwanda Mining Association (RMA).

Ikigo cy’Igihugu cy’Ibarurishamibare mu Rwanda (NISR) cyatangaje ko umusaruro uturuka mu bucukuzi bw’amabuye y’agaciro na kariyeri wiyongereyeho 87% mu gihembwe cya kabiri cya 2021.

Inteko rusange yo kuri uyu wa Gatanu, yabaye umwanya mwiza ku bakora ubucukuzi bw’amabuye y’agaciro n’inzego bakorana kuganirira hamwe imbogamizi bafite, amahirwe ahari n’uburyo barushaho gufatanya bateza imbere umwuga w’ubucukuzi bw’amabuye y’agaciro.

Ihuriro ry’Abacukuzi b’amabuye y’agaciro mu Rwanda, ryagaragaje ko riri mu cyiciro cyo kubaka inzego zaryo haba mu kubona abakozi n’ibikoresho bihagije, kugira ngo rirusheho gukurikiranira hafi ibibazo abanyamuryango bafite no kubakorera ubuvugizi.

Perezida wa RMA, Malick Kalima yavuze ko ari “Umwanya wo kongera kurebera hamwe aho tugeze n’aho tugana no kureba ibikwiye gukorwa ngo duteze imbere uru rwego rw’ubucukuzi bw’amabuye y’agaciro”

Yashimye uburyo abashoramari b’Abanyarwanda ari bo basigaye biganje mu bucukuzi bw’amabuye y’agaciro. Yavuze ko ari ikimenyetso cy’uko iyo abantu biyemeje, bagera ku byo biyemeje.

Ati “Aho gutekereza abo hanze reka tujye tubanza twitekerezeho.Turasaba leta ko yadufasha kubona ikigega.”

Yavuze ko mu bibazo urwego ayoboye rufite harimo ishoramari ridahagije, kudahabwa inguzanyo nk’uko byifuzwa iyo bagiye mu mabanki n’ibindi.

Umuyobozi Mukuru w’Ikigo gishinzwe Mine, Peteroli na Gaz, Amb. Yamina Karitanyi yavuze ko urwego rw’ubucukuzi bw’amabuye y’agaciro ari inkingi ya mwamba mu iterambere ry’ubukungu bw’u Rwanda n’imibereho myiza y’abaturage, dore ko rutunze benshi.

Yasabye abacukuzi gukomeza guteza imbere uru rwego bongera umusaruro n’ubwiza bw’ibyo bakora.

Ati “Muracukura ariko ibigurishwa ni nka 40 % y’ibivanwa mu butaka. Ese nta kuntu twabyaza umusaruro n’ibyo bisigaye? Ni iki twakora mu minsi iri imbere ibibuze tukabishaka noneho tukongera umusaruro? Ni amahirwe twakagombye kubyaza umusaruro.”

Karitanyi yasabye abacukuzi kwishakamo ubushobozi bagatangira gukoresha imashini n’ibindi bikoresho bigezweho mu bucukuzi kugira ngo bongere ubwiza bw’umusaruro n’ingano yawo.

Yavuze ko mu gihe cyose bazaba bagaragaza ko umusaruro wiyongereye banafite ibikoresho bigezweho n’amabanki azabona ko ibyo bakora bibyara inyungu akabaha inguzanyo.

Ati “Turamutse twongereye umusaruro, tukongera agaciro k’ibyo tujyana hanze, amabanki na yo azumva ko harimo amafaranga. Ifaranga riratinya, rijya aho rifite umutekano, aho ritazatakara. Amabanki na yo baravuga bati ‘aya mafaranga njyanye mu mabuye azagaruka’? Kubatinyura ni ukongera umusaruro.”

Abacukuzi b’amabuye y’agaciro bagaragaje kandi ko babangamirwa n’imisoro ya hato na hato ica intege bamwe, ibiciro by’umuriro w’amashanyarazi n’ibindi.

Karitanyi yavuze ko ibyo bibazo byose kugira ngo bikemuke neza, ari ugushyira hamwe kw’abacukuzi kandi bakabanza kwerekana ubushake bw’ibyo bo bashoboye gukora ngo umusaruro wiyongere.

Ati “Guverinoma irashaka ko mwunguka, ntabwo ishaka kubananiza gusa dushyire hamwe turebe ibyakorwa ku buryo urwego rwunguka hanyuma n’ibibazo byose bizakemuka. Ikibazo dufite uyu munsi uko twese dushonje ariko twumvise neza aya mahirwe ahari, nta cyabuza uru rwego gutera imbere. Ntimukomeze kunanirwa kubera imisoro, ikiguzi cyo gutunganya umusaruro, amashanyarazi n’ibindi.”

Umuyobozi Mukuru w’Ikigo cy’Igihugu cyo kurengera Ibidukikije (REMA), Juliet Kabera yagiriye inama abacukuzi bo mu Rwanda kurushaho kubahiriza amabwiriza y’ubucukuzi butangiza ibidukikije, anavuga ko ari ubundi buryo bwabafasha kubona inkunga zo guteza imbere ibikorwa byabo, kuko hari ibigega byashyizweho bigamije gufasha imishinga irengera ibidukikije.

Yavuze ko gushyira imbaraga mu kongera umusaruro hatarengerwa ibidukikije, ari igihombo.

Ati “Tuba turi guhomba kabiri. Nk’ubu ntabwo tugifite amazi meza kandi niyo abantu bacu bavoma, tugafata amafaranga menshi muri ya yandi twinjije tukayakoresha dutunganya ya mazi twangije.”

Dukundimana Pascal ukorera ubucukuzi mu Burengerazuba, yashimye ibyavuye muri iyi nama, asaba ko urubuga nk’urwo ruhoraho kugira ngo ibibazo abacukuzi bafite byumvikane hakiri kare.

Yavuze inzego bireba zirimo RMB, REMA n’izindi zikwiriye kubaba hafi, ndetse aho bishoboka mu gihe hari amakosa yakozwe, hakabaho kuganiriza abacukuzi aho guhita bahanwa.

Ati “Turifuza ko bibaye byiza, aho kugira ngo hajye habaho guca amande abacukuzi gusa kuko hari ubwo bibaca intege, bakongera bakadufasha itsinda rihuriweho n’inzego zose [Taskforce] rigakora, wenda nyuma bajya basanga hari utabyubahirije bakabona kumuhana.”

Inzego bireba ziyemeje gukomeza kuvuganira abacukuzi b’amabuye y’ahgaciro kugira ngo ibibazo bitarabonerwa umuti nabyo bizigweho vuba.

Imibare ya Banki Nkuru y’Igihugu igaragaza ko inyungu iva mu bucukuzi bw’amabuye y’agaciro, mu mwaka wa 2021 iziyongeraho 3.5%.

Ambasaderi Yamina Karitanyi yasabye abacukuzi b'amabuye y'agaciro gukorera hamwe kugira ngo babashe gukemura ibibazo bafite
Umuyobozi wa REMA, Juliet Kabera yasabye abacukura amabuye y'agaciro kubahiriza amabwiriza n'amategeko yo kurengera ibidukikije
Inzego zitandukanye zagaragaje ko Leta y'u Rwanda ishyize imbere iterambere ry'urwego rw'urwego rw'abacukuzi b'amabuye y'agaciro
Abitabiriye bagaragaje ko urwego rw'ubucukuzi rugifite imbogamizi zirimo imisoro ihanitse, igishoro gike n'ibindi
Juliet Kabera yavuze ko abacukuzi bakwiriye no kumenya ibigega byashyizweho birengera ibidukikije, bishobora kubafasha mu guteza imbere ubuzukuzi bwabo
Abitabiriye bagiriwe inama yo gufatanya kugira ngo ibibazo by'ibanze bafite bikemuke, izindi nzego zibunganire
Abakora ubucukuzi bw'amabuye y'agaciro mu Rwanda bagaragaje ko hakiri byinshi byo kunozwa
Abatanze ibitekerezo bose bagarutse ku mbogamizi bahura nazo
Karitanyi ateze amatwi ibibazo bitandukanye byabajijwe muri iyi nama
Ubuyobozi bw'Ihuriro ry'abacukuzi b'amabuye y'agaciro bwagaragaje ko hari byinshi bumaze kugeraho n'ibyo bateganya
Hagaragajwe ko abacukuzi bakigorwa n'imisoro bacibwa, bakavuga ko byasuzumwa bakajya basorera amabuye agiye kugurishwa
Perezida wa RMA, Malick Kalima yavuze ko hari byinshi byagezweho n'Ihuriro ayoboye nubwo hakiri byinshi byo gukora ngo ubucukuzi bw'amabuye y'agaciro mu Rwanda bugende neza
Abitabiriye bafashe ifoto y'urwibutso

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .