00:00:00 IGIHE NETWORK KN KINYARWANDA EN ENGLISH FR FRANCAIS

BK yegukanye igihembo cya banki nziza mu Rwanda

Yanditswe na Nkurunziza Jean Baptiste
Kuya 19 Nyakanga 2021 saa 07:42
Yasuwe :
0 0

Banki ya Kigali yegukanye igihembo cya banki nziza mu Rwanda mu bihembo bizwi nka ‘Euromoney Awards for Excellence’ by’umwaka wa 2021 kubera imikorere yayo myiza igamije guhindura imibereho n’iterambere ry’isoko ikoreraho n’uburyo yitwaye muri ibi bihe bya Covid-19.

Ibi bihembo bya Euromoney Awards for Excellence bitangwa ku ma banki n’ibigo by’imari ku Isi biba byagize ibyo bigeraho binyuze mu guhanga udushya mu mezi 12 aba ashize.

Mu byatumye Banki ya Kigali ihiga andi ma banki n’ibigo by’imari mu Rwanda, ni uburyo yakoze muri ibihe bitoroshye by’icyorezo cya Covid-19, aho yakomeje gushyira mu bikorwa gahunda nyinshi zigamije gufasha abakiliya bayigana. Mu mwaka washize, mu bihe bitari byoroshye by’icyorezo cya Covid-19, BK yafashije abakiriya bayo mu buryo butandukanye, harimo kubaha inguzanyo mu rwego rwo kuzahura ubukungu bwabo bwakomwe mu nkokora n’iki cyorezo ndetse inorohereza abakiliya bayo batari bashoboye kwishyura inguzanyo bafite.

Zimwe muri serivisi yakomeje gutanga mu korohereza abakiliya muri 2020, ni serivisi y”IKOFI igenewe abahinzi, ubwo abahinzi barenga 258,000 bakoresheje iyi serivisi ndetse abarenga 1,800 b’abacuruzi b’inyongeramusaruro bakomeza kugeza serivisi ku abahinzi bifashishije IKOFI.

Mu mwaka wa 2020 kandi iyi banki yashyize ku mugaragaro serivisi ya Zamuka Mugore, serivisi yageneye abagore bari mu bucuruzi bakabasha guhabwa inguzanyo ku nyungu iri hasi cyane bityo bagateza imbere imishinga yabo.

Kubera imbaraga Banki ya Kigali yashyize mu kurushaho kurinda ibyahungabanya umutekano w’amakuru arebana na banki, BK yahawe icyemezo cya ISO/IEC 27001:2013 Standard for Information Security Management System (ISMS), Banki ya Kigali ikaba yarahawe icyo cyemezo nk’ikimenyetso ko uburyo ikoresha mu kurinda umutekano w’amakuru bwemewe ku rwego mpuzamahanga.

Undi mushinga BK yashyize mu bikorwa muri 2020 mu rwego rwo gufasha sosiyete Nyarwanda kwiteza imbere, harimo umushinga wa “BK Urumuri Initiative” wabaye ku nshuro ya kane, ukaba ugamije guteza imbere ba rwiyemezamirimo bityo bagahabwa amahugurwa yimbitse k’uburyo bateza imishinga yabo imbere ndetse bagahabwa inguzanyo zitagira inyungu na Banki ya Kigali. Kugeza ubu, ba rwiyemezamirimo barenga 100 banyuze muri iyi gahunda kandi bahabwa arenga Miliyoni 100 z’amafaranga y’u Rwanda atishyurirwa inyungu.

Umuyobozi wa Banki ya Kigali, Dr. Diane Karusisi, yavuze ko bishimiye iki gihembo kandi ko bazakomeza gushyira imbere abakiliya.

Ati “Nka Banki ya Kigali, dukora cyane tugamije kurenza ibyo abakiliya bacu baba batwitezeho. Twishimiye kwakira igihembo twahawe na Euromoney cyo kuba ari twe banki nziza mu Rwanda, nk’ikimenyetso cy’umuhate twashyize mu gutanga serivisi ku bakiliya bacu dukorera.”

Itsinda ry’impuguke za Euromoney Awards for Excellence niryo ryakoze ubusesenguzi ku buryo iyi banki yunguka, iterambere ryayo, aho bagereranyaga andi mabanki n’ibigo by’imari bahanganiye ku isoko ry’u Rwanda, hagamijwe kureba uko bahindura isura y’isoko bakoreramo.

Bank ya Kigali, yihariye kimwe cya gatatu cy’isoko ry’ama banki mu Rwanda, mu 2020 yabarirwaga abakiriya bagera ku bihumbi 356,299 n’abandi b’ibigo binini basaga ibihumbi 26,054. Muri uwo mwaka kandi, Banki ya Kigali yagize inyungu ya miliyari 38.4Frw.

Ibihembo bya Euromoney Awards for Excellence byatangiye gutangwa mu 1992, hagamijwe guhemba banki iba yarahize izindi. Uyu mwaka iki gihembo cya banki nziza y’umwaka kikaba cyaratanzwe mu bihugu bisaga 100.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .