00:00:00 IGIHE NETWORK KN KINYARWANDA EN ENGLISH FR FRANCAIS

BK yakoze impinduka mu mikorere ya ’Internet Banking’, serivisi abakiliya babona ziriyongera

Yanditswe na Muhonzire Sylvine
Kuya 28 Kamena 2021 saa 08:00
Yasuwe :
0 0

Banki ya Kigali yatangaje ko yavuguruye imikorere ya serivisi ya ’Internet Banking’, ikoranabuhanga riha ubushobozi abakiliya bwo kugera kuri serivisi nyinshi z’iyi banki, zirimo no gukoresha konti zabo batiriwe bagera kuri banki ahubwo bakoresheje mudasobwa cyangwa telefoni.

Umuyobozi ukuriye ibikorwa by’ikoranabuhanga muri BK, Obinna J. Ukwuani yavuze ko icyo ubu buryo bwa Internet Banking buvuguruye butandukaniyeho n’ubwari busanzwe ari uko bwakozwe n’inzobere za Banki ya Kigali ku buryo umutekano wabwo wizewe ndetse n’igihe umukiliya yaramuka agize ikibazo cyahita gikemurwa mu buryo bwihuse.

Yagize ati “Iri vugurura ryakorewe hano muri banki hamwe n’inzobere zacu. Bivuze ko niba umukiriya agize ikibazo, kizajya gikemurwa ako kanya. Ivugururwa rya serivisi ya Internet Banking ryazanye izindi serivisi z’inyongera, twizera ko zizafasha abakiliya kugera kuri serivisi za banki bakenera bitabagoye. Serivisi ya Internet Banking yacu kandi yakoreshwa n’abakiliya basanzwe ndetse n’abafite ibigo by’ubucuruzi cyangwa amasosiyete”

Ukwuani yakomeje agira ati “Urubuga rwacu ruvuguruye rwa Internet Banking rwazanye izindi serivisi zirimo ubushobozi ku abakiliya bwo kugura amadovize no kwishyura imishahara y’abantu benshi icyarimwe. Twongereye kandi umutekano w’ibikorwa byose abakiliya bakorera kuri iyi serivisi binyuze ku bushobozi bwa “TOTP (Time-based One-Time Password). Abakiliya bacu b’ibigo binini nabo ntibahejwe kuko bashobora gukoresha iyi serivisi ya Internet Banking nshya. Mu gihe kitarambiranye, tuzongeraho serivisi yo kohereza amafaranga mu mahanga.”

Asobanura bimwe mu byiza byiyongereye kuri iyi serivisi yavuze ko izafasha abayobozi b’ibigo kwishyura imishahara y’abakozi icyarimwe hakoreshejwe uburyo bw’ikoranabuhanga. Ku bafite ibigo cyangwa amasosiyete, ubu buryo buha uburenganzira ubuyobozi bw’ikigo runaka kwemeza amafaranga ava kuri konti, kandi bakagira n’uburenganzira bwo kubona ibikorerwa kuri konti z’ikigo bayobora.

BK yashyizeho ubu buryo buvuguruye kugira ngo himakazwe umuco wo gukoresha uburyo bw’ikoranabuhanga mu kugera kuri serivisi za banki, bitabaye ngobwa ko habaho gutakaza umwanya umuntu agana ku icyuma cya ATM cyangwa ngo atonde umurongo. Serivisi ya Internet Banking ya BK ikaba yagerwaho n’utunze murandasi cyangwa se telefoni izwi nka ’smart phone’.

Banki ya Kigali yatangaje ko umukiliya wa BK wese wifuza gukoresha serivisi ya Internet Banking, ashobora kugana Ishami rya BK rimwegereye cyangwa se agahamagara kuri 4455 agahabwa ubufasha.

Umuyobozi ukuriye ibikorwa by’ikoranabuhanga, Obinna J. Ukwuani yasoje avuga ko iyi banki yifuza ko kugeza tariki 31 Nyakanga, 2021 abakiliya bose bakoreshaga urubuga rwa Internet Banking ya kera baba bamaze kwiyandikisha ku urubuga rushya, bagatangira guhabwa serivisi zivuguruye.

Umuyobozi ukuriye ibikorwa by’ikoranabuhanga muri BK, Obinna J. Ukwuani yasobanuye impinduka ziri muri serivisi ya Internet Banking nshya ya BK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .