00:00:00 IGIHE NETWORK KN KINYARWANDA EN ENGLISH FR FRANCAIS

Amasezerano y’ubugure hagati ya KCB na BPR yahawe umugisha

Yanditswe na Iradukunda Serge
Kuya 19 Nyakanga 2021 saa 09:24
Yasuwe :
0 0

Ikigo cy’Ishoramari cya Atlas Mara Limited ari nacyo nyiri Banki y’Abaturage (BPR) cyatangaje ko inzego zibifitiye ububasha mu Rwanda zemeye ko iyi banki yacyo igurwa na Banki y’Ubucuruzi y’Abanyakenya, KCB.

Mu mpera za 2020 ni bwo byamenyekanye ko KCB, igiye kugura Banki y’Abaturage y’u Rwanda (BPR).

Iki gihe KCB Group yatangaje ko yasinye amasezerano yo kugura imigabane ingana na 62.02% muri Banki y’Abaturage ndetse n’imigabane ingana na 100% muri BancABC yo muri Tanzania nayo isanzwe ari iya Atlas Mara kuri miliyoni 40$.

Mu itangazo Altas Mara yashyize hanze ku wa 14 Nyakanga 2021 yavuze ko Leta y’u Rwanda yamaze kwemera aya masezerano y’ubugure. Iti “Ikigo cyamaze kubona uburenganzira bw’inzego zibifitiye ububasha ku bijyanye n’ishoramari mu Rwanda no muri Botswana ndetse ubu impande zombi ziri mu nzira yo gusoza imirimo ya nyuma.”

Atlas Mara yakomeje ivuga ko ku bijyanye no kwegukana BancABC igitegereje uruhushya rwa Guverinoma ya Tanzania.

Umuyobozi Mukuru wa BPR, Maurice Torotich, yabwiye The New Times ko Guverinoma y’u Rwanda yamaze kwemeza ubu bugure, avuga ko igisigaye ari uko ari uko KCB yegukana BPR n’ibikorwa bigatangira guhuzwa. Yavuze ko ibi nabyo biri gukorwa ku buryo mu minsi ya vuba bizaba byarangiye.

Biteganyijwe ko abakiliya ba BPR bazungukira ku ikoranabuhanga rihambaye KCB yari imaze iminsi yarashoyemo imari mu mitangire ya serivisi, ariko ko n’abakiliya ba KCB bakazungukira ahanini ku kubona serivisi hafi yabo binyuze ku mashami ya BPR ari henshi mu gihugu. KCB nimara kwegukana izi banki, ibikorwa byazo bizahita bihuzwa n’ibyo mu bindi bihugu.

KCB yatangiye gukora mu 1896, ni yo banki ifite amashami menshi mu bihugu byo mu Karere aho ifite amashami agera ku 360 n’ibyuma bitanga amafaraga 1090 mu bihugu nka Tanzania, Kenya, Uganda, u Burundi, Ethiopia na Sudani y’Epfo.

Ku rundi ruhande BPR imaze imyaka irenga 45 yose ikora, ni yo banki igera mu bice byinshi mu gihugu. Kugeza mu mpera za Kamena 2020 yari ifite imari shingiro irengaho gato miliyari 46 z’amafaranga y’u Rwanda.

Inzego bireba mu Rwanda zamaze kwemeza amasezerano y'ubugure hagati ya KCB na BPR Atlas Mara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .