Umuyobozi Mukuru wa Cogebanque yagaragaje izingiro ry’imiyoborere mu iterambere ry’ibigo

Yanditswe na Habimana James
Kuya 20 Ugushyingo 2019 saa 03:49
Yasuwe :
0 0

Umuyobozi Mukuru wa Cogebanque, Cherno Gaye, yavuze ko kugira ngo ibigo bitere imbere bisaba ko abayobozi babyo bafata ibyemezo binoze ku bakiliya, abafatanyabikorwa n’abakozi babikorera kuko aribyo zingiro y’iterambere ryabyo rirambye.

Ubu butumwa yabutangiye mu Nama ihuza abayobozi b’ibigo bikomeye mu Rwanda izwi nka ‘Rwanda CEO Summit’ yateguwe n’ihuriro rya Karisimbi Business Partners.

Ibigo byari bihagarariwe muri iyi nama yo ku wa 15 Ugushyingo 2019, yabaga ku nshuro ya kabiri birimo iby’imari, iby’ubucuruzi n’ikoranabuhanga mu gihugu bigera ku 100.

Rwanda CEO Summit yahaye umwihariko kureba uko ibyemezo abayobozi bafata mu bigo bayobora bizana impinduka.

Mu buzima bwa buri munsi iyo ushaka ko ubucuruzi bwawe butera imbere, guha akanyabugabo abakiliya n’abakozi ukoresha umunsi ku munsi, ni intwaro ikomeye izatuma icyo kigo gikomeza kwamamara.

Gusa ibi bisaba umuyobozi uzi gufata ibyemezo byiza, ushobora gusesengura byimbitse cyane ko mu gihe bikozwe hatabayeho kubitekerezaho, bishobora gutuma ikigo gisubira inyuma.

Ubuyobozi bwiza kandi butanga ubumenyi ku bakozi, kubahuza bagakorera hamwe kandi heza, ibi bikaba aribyo biganisha ikigo ku nyungu.

Banki y’Ubucuruzi ‘Cogebanque’ imaze imyaka 20 mu ishoramari rigamije gufasha Abanyarwanda kugerwaho na serivisi z’imari mu buryo bworoshye kandi bunanogeye abayigana. Mu gihe imaze hari byinshi yagezeho bituma iza ku isonga mu mabanki y’ibigwi mu gihugu.

Kubera imiyoborere myiza iyirangwamo biri mu byatumye iba umuterankunga ukomeye w’inama y’abayobozi b’ibigo bikomeye mu Rwanda, intego ari ukugaragaza uko nabyo byarushaho kubaka ibigwi mu gihugu no mu mahanga.

Abari muri iyi nama bagize amahirwe yo guhura, abafite urwego rwiza rw’imiyoborere bagezeho basangiza abandi ibyo bagezeho.

Umuyobozi Mukuru wa Cogebanque, Cherno Gaye yabwiye abayitabiriye ko mu gihe ikigo kitabona inyungu bigoye ko cyaramba.

Yagize ati “Abakozi ntibagomba gukoreshwa mu buryo budasanzwe, uburyo ufata abakozi bawe baheshe agaciro kandi ushyireho uburyo butuma batanga umusaruro.”

“Iyi nama iha amahirwe abayobozi b’ibigo kuganira kuri bimwe badakunda kuvugaho, uyu ukaba ari n’umwanya wo kuganira no kureba uko bakora neza ubucuruzi bwabo. Ubusanzwe gufata icyemezo nicyo kintu gikomeye ku bayobozi bagomba kuba bazi, bakamenya uko bateye."

Yakomeje avuga ko “Ubundi buri kintu gitangirira kuri wowe ubwawe kubera ko mu gihe waba utiyizi ngo umenye uwo uriwe, kugendana n’Isi bizakubera ikibazo.”

-  Ni ubuhe bumenyi Cogebanque yasangiza abandi?

Cherno Gaye yagaragaje ko Cogebanque atari ikirwa ahubwo ikorera ahantu hari abantu kandi igamije guhindura imibereho yabo.

Ati “Icyo dukora ni uko dufasha ubucuruzi, ibi bikagira ingaruka nziza ku bukungu bw’abantu n’igihugu, tugateza imbere abo dukorana, tugafata neza abatugana. Dutanga kandi amahugurwa ku bakozi bacu hano muri Cogebanque kugira ngo koko barusheho gutanga umusaruro kuri sosiyete muri rusange.”

“Niba hari ibyemezo ugiye gufata ku bafatanyabikorwa bawe ugomba kujya witonda kuko aba ni abantu uba uzakomeza gukenera umunsi ku munsi, ugomba kumenya kandi ko abakozi ukoresha bahora bumva ko bishimye, kuko ko mu gihe bazaba batishimye bisobanuye ko nta musaruro bazaguha.”

Umunyamerika Cartel Crockett uri mu bashinze Karisimbi Business Partners, yavuze ko baje mu Rwanda kubera icyifuzo cy’abayobozi b’ibigo bikomeye mu gihugu, bashaka kubona amahirwe yo guhura bakaganira, bakanahura n’inzobere mu miyoborere harebwa ingaruka z’ibyemezo bafata mu bigo bayobora.

Cartel avuga ko kuba u Rwanda ari igihugu gikomeje gutera imbere ndetse gifatirwaho urugero, binakwiye ko abayobozi mu bigo bagomba kugendera muri uwo murongo.

Cogebanque Plc itanga serivisi za banki mu Rwanda zahinduye ubuzima bw’abayigana binyuze mu kubafasha kubona no gukoresha serivisi zitandukanye z’imari.

Abakiliya bayigana bafashijwe gufunguza konti, kubitsa, kohereza no kubikuza amafaranga yabo kandi mu mutekano usesuye.

Cogebanque Plc nka Banki Nyarwanda itanga serivisi mpuzamahanga, yagabye amashami menshi mu gihugu hose aho ifite ibyuma bya ATM 34, ifite aba-agents barenga 600 bayifasha mu gutanga serivisi zo kubitsa no kubikuza zirimo n’izifashisha ikoranabuhanga binyuze muri Internet Banking, Mobile Banking n’amakarita ya MasterCard.

Aya makarita usibye kuba atanga umutekano w’amafaranga, anaha abayakoresha ububasha bwo kubikuza ku byuma bya ATM miliyoni 36 biri hirya no hino ku Isi.

Umuyobozi wa Cogebanque, Cherno Gaye, yavuze ko abayobozi beza ari ababanza kumenya ku byemezo bagiye gufata
Umunyamerika Cartel Crockett uri mu bashinze Karisimbi Business Partners, yavuze ko guhura kw'abayobozi b'ibigo ari umwanya mwiza wo gukomeza guteza imbere ubukungu bw'u Rwanda
Abayobozi babwiwe ko mbere yo gufata ibyemezo bagomba kubanza kwitekerezaho
Abayobozi bahuriye hamwe bajya inama ku miyoborere y'ibigo byabo

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza