Umwana w’imyaka 7 yatsinze irushanwa ryo gushushanya ingagi

Umwana w’imyaka 7 yatsinze irushanwa ryo gushushanya ingagi


Yanditswe kuya 14-06-2012 - Saa 16:05' na Jotham Ntirenganya.

Umwana w’umukobwa wiga muri Lacolombière mu mwaka wa kabiri w’amashuri abanza yatsinze irushanwa ryo gushushanya ingagi no kwerekana imibereho yazo ya buri munsi, akaba yahawe igihembo cyateguwe n’Ikigo k’Igihugu Gishinzwe Iterambere (RDB) kuri uyu Kane tariki ya 14 Kamena 2012.

Uyumwana bita Kudhana Karanana yarushije abandi bana bagera kuri 280, mu irushanwa ryo gushushanya ingagi ryateguwe na RDB.

Nyuma yo kwakira ibishushanyo by’abana, babijyanye mu imurika bikorwa ryabereye muri Serena, aho abitabiriye imurika batangaga amanota y’ibyo bishushanyo, igishushanyo cy’uyu mwana nicyo cyaje ku mwanya wa mbere.

Uyu mwana Karanana amwenyura yabwiye IGIHE ko anejejwe n’ibihembo yahawe, birimo igikinisho gisa n’inguge, ikaramu, ikaye iriho ibimenyetso byo kwita izina, ndetse n’impamyabumenyi yo gushushanya. Yongeye ho ati :”Nashushanyaga ntekereza uko ingagi isa, uko yurira ibiti, ndetse n’uburyo iheka umwana wayo”. Kugeza ubu RDB igiye gushaka uburyo yabona ababyeyi b’uyumwana kugirango nabo bazajyane n’uyumwana mu muhango wo kwita izina uteganijwe ku itarki ya 16 Kamena 2012.

Undi mwana watsinze neza ni Umuhoza Benitha yagize ati :” Ibyishimo byandenze”. Yongeraho ati :” Ijambo kwita izina nzajya mpora ndibwira Papa na Mama”.

Nibura abandi bana 6 nabo baratsinze kandi buri mwana witabiriye irushanwa yagenewe ikaramu n’ikayi.

Ubundi iri rushanwa ryo gushushanya ni kimwe mubigize ibikorwa by’icyumweru cyahariwe kwita izina ingagi, uwo muhango uteganyijwe kuri uyu wa 16 Kamena mu Kinigi mu Ntara y’Amajyaruguru.

Rica Rwigamba ushinzwe ubukerarugendo no kubungabunga ibidukikije yavuzeko bateguye aya amarushanwa bagamije gukangurira abana kwiyumva muri gahunda yo kwita izina, ari nayompamvu amarushanwa yahuje abana bo mu mwaka wa 2 no mu wa 3 bo mu mashuri abanza gusa.

Yagize ati :”Tugomba gutoza abana kwita ku bidukikije hakiri kare kuko nibo babyeyi b’ejo”. Yongeye ho ko ikindi gihe bazajya mu bigo by’amashuri bitandukanye.

Kudhana Karanana

Foto:Ntirenganya J.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO