U Rwanda rushobora kwamburwa uburenganzira bwo gucuruza inyamaswa zimwe na zimwe

U Rwanda rushobora kwamburwa uburenganzira bwo gucuruza inyamaswa zimwe na zimwe


Yanditswe kuya 30-07-2012 - Saa 12:42' na Jotham Ntirenganya

Ishami rya Loni rishinzwe ibinyabuzima ryatangaje ko rishobora kwambura ubushobozi bwo gucuruza inyamaswa, mu bihugu 7 harimo n’u Rwanda, nyuma yaho ibyo bihugu bitabashije kugaragaza neza amabwiriza agenga ubucuruzi bw’inyamaswa n’ibimera, mu nama yabereye mu Busuwisi ku itariki ya 26 Nyakanga 2012.

Agashami ka Loni gashinzwe kwita ku binyabuzima kavuze ko kagiye gukurikirana ibihugu 7, bitagaragaza uko ibinyabuzima byo muri za pariki bifatwa, uko bibyazwa umusaruro, ndetse n’uburyo ubucuruzi bw’inyamaswa bukorwamo, mu rwego rwo kubungabunga ibyo binyabuzima.

Nk’uko ibiro ntara makuru by’Abanyamerika Associated Press bibitangaza, ibyo bihugu ni: u Rwanda, Ibirwa bya Comores, Guinea-Bissau, Paraguay, Nepal, Ibirwa bya Salomon na Syria. Ibihano bavuze ko bishobora gushyirwa mu bikorwa ku itariki ya 1 Ukwakira 2012.

Twifuje kumenya icyo Ishami ry’Ubukerarugendo mu kigo cy’Igihugu cy’Iterambere(RDB/Tourism and conservation) ribivugaho, badutangariza ko ku gicamunsi cy’uyu wa Mbere tariki 30 Nyakanga, ari bwo bari bugire icyo babisobanuraho.

Nkuko byanditswe na CBC News dukesha iyi nkuru, ibihugu bizahagarikwa gukora ubucuruzi bw’ubwoko bw’inyamaswa bugera ku 35000, binyuze mu ishyirahamwe ry’ibihugu 175, nk’uko umuyobozi waryo Juan Carlos Vasquez ubishinzwe muri Loni yabitangaje.

Ibyo bihugu byasabwe kuba byagaragaje uko ubucuruzi bw’inyamaswa bukorwa, amabwiriza ngenderwaho, kandi ibyo bihugu bigomba kuzagaragaza raporo z’ubucuruzi bwagiye bukorwa mbere, bitarenze ku itariki ya 1 Ukwakira, kuko mu nama y’ubushize bitabashije kubyerekana.

Ubucuruzi bw’inyamaswa n’ibimera buba mu byinjiriza ibihugu amafaranga menshi,nk’uko iyo nama yahuje ibihugu bitandukanyebyo ku Isi yabigaragaje. Urugero ni uko ku Isi yose hacuruzwa amadorali y’Amerika ari hagati ya miliyoni 350 na 530 ku mwaka.

Naho kuva mu mwaka wa 2006 kugeza 2010, hacurujwe miliyari 2,2 z’amadorali y’Amerika.

Agashami ka Loni gashinzwe kwita ku binyabuzima kemeza ko guhana ibyo bihugu bigamije kurengera ubwoko bumwe bw’inyamaswa bukunze gushimutwa bityo bigatuma inyamaswa zimwe zishira mu mashyamba. Bityo rero igihugu kitazubahiriza ibisabwa, kizahagarikwa gukora ubucuruzi bw’ama pariki n’inyamaswa zibamo.

Dore inyamaswa bashaka kurengera muri buri gihugu.

1.U Rwanda: ingagi, inguge, gasuku, isandi n’izindi nyoni nyinshi.

2.Syria: imiseberanya, inzoka, gasuku, imisambi n’izindi nyoni nyinshi

3.Nepal: ingwe, inkura, inzovu n’ ibisamagwe.

4.Guinea-Bissau: Utunyamaswo two mu mazi n’inguge.

5.Paraguay: Jaguars na tamarins

6. Ibirwa bya Comore: ubwoko butandukanye bw’inyamaswa.
Ubushimusi bw’inyamaswa bugenda bwiyongera nk’uko abo bahanga babivuze, kandi akenshi ibice by’inyamaswa bikorwa mo imiti, imitako n’ibindi.

Inyamaswa zibasiwe cyane ku Isi harimo:ibice by’imibiri y’ibisamagwe, amahembe y’inzovu, amahembe y’inkura (rhino), inyoni zidakunze kororoka cyane, ndetse n’ibikururuka hasi ku butaka, nk’uko tubikesha ibiro ntara makuru by’Abanyamerika Associated Press.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO