Bimwe kubyo waba wibaza  ku ngagi

Bimwe kubyo waba wibaza ku ngagi


Yanditswe kuya 14-06-2012 - Saa 17:29' na Habimana James

Mu guhe mu Rwanda buri mwaka hashyizweho umunsi wo kwita izina abana b’ingagi baba baravutse, bamwe mu bantu bagenda bibaza impamvu y’ibi ndetse n’igituma izi nyamaswa zikomeje guteteshwa hibazwa itandukaniro ryazo n’izindi nyamaswa ziboneka mu Rwanda.

Ni muri urwo rwego twashatse kubavira imuzi amwe mu mateka y’ingagi, ubuzima bwazo, uko zibaho, uko zororoka akamaro zifite ndetse n’ibindi.

Ingagi ni zimwe mu nyamanswa nini zizwiho kwitonda cyane, izi nyamanswa z’ingagi zikunze kugaragara cyane ku mugabane wa Afurika, ndetse inyinsi zikaba ziba mu Rwanda muri Pariki y’Ibirunga mu Majyaruguru y’u Rwanda.

Amakuru dukesha enchantedlearning.com avuga ko n’ubwo abantu benshi bakunze kuvuga ko ingagi ishobora kuba ari inyamanswa y’inshotoranyi cyangwa ingome, ariko siko bimeze kuko akenshi irangwa n’ubwitonzi ndetse ikaba n’inyamahoro.

Kubera ko ibice ingagi zituramo bigenda bigabanuka ,ni nako usanga nazo zigenda ziba mubuzima buzikoreye.

Imitere y’ingagi

Ingagi ifite amaboko mareramare aho usanga asumba amaguru yayo kandi ifite igihimba cyinini cyane cyigizwe n’amabere manini ku ngore.

Ubwoya bw’ingagi ndetse n’uruhu rwayo.

Ingagi itwikiriwe n’ubwoya hafi kumubiri wose keretse ku ntoki zayo, hagati mu kiganza cyayo, ku isura yayo ndetse no ku maboko yayo aho ahurira n’umubiri no munsi y’ikirenge cyayo.

Umutwe w’ingagi.

Ingagi ni imwe mu nyamanswa ifite umutwe munini kandi muremure nk’uko bikunze kugaragara ku ngagi z’ingore. Ingagi kandi igizwe n’amatwi mato cyane ndetse n’amaso mato yirabura, izwiho kuba itagira umurizo nk’izindi nyamanswa.

Amenyo y’ingagi ni 32, ifite ibijigo binini n’amenyo yayo ni manini, kimwe nk’umuntu kandi Ingagi ifite ingoyi zikikije amaso yazo.

Ingagi ifite imitekereze nk’iy’abantu irimo nko kumva, kureba, guhumeka, kumenya uburyohe bw’ikintu runaka, ndetse no gufata ibintu nk’uko kubantu biteye.

Amaboko y’ingagi ndetse n’amaguru yazo
Amaboko y’ingagi usanga nta tandukaniro afite ugereranyije n’ay’abantu, ifite intoki eshanu kandi ugasanga zitandukanye nkuko ku bantu biteye. Ikirenge cy’ingagi kigizwe n’amano manini agera kuri atanu aho ishobora gukora ibintu bitandukanye ikoresheje amaboko cyangwa amaguru.

Umubyimba w’ingagi

Ingabi z’ingabo usanga akenshi ari nini cyane kurusha iz’ingore, kuburyo usanga ingabo ikubye mu bunini ibgore inshuro zigera kuri ebyiri mu burebure bwayo.

Ingore ishobora kugeza ku buburebure bungana na metero 1.4, ndetse n’uburemere bushobora kugera ku biro 90, mugihe iy’ingabo ishobora kugira metero zigera kuri 1.7, kandi ikagira uburemere bungana n’ibiro 180 bityo ukabona ko ikubye kabiri ingagi y’ingore.

Imibereho y’ingagi

Ingagi zitungwa n’ibikomoka ku biti aho usanga zirya ibiryo byazo igihe cy’amanywa, nko kurya amababi y’ibiti n’imbuto zabyo. Abahanga batangaza ko ingagi zishobora kuba zirya amoko y’ibiti agera kuri magana abiri, zizwiho kandi kuba zirya imiswa akenshi ziba zivanye mu migina, mu minywere yazo ingagi zinkunze kunywa amazi mu rwego rwo kwimara inyota kandi ikigereranyo cy’ibyo ingagi ishobora kurya ku munsi gishobora kugera ku biro 50 ku ngagi nkuru.

Ingagi yumvikana n’abantu

Rimwe na rimwe ingagi zishobora kumvikana n’abantu biciye mu marenga. Ingagi burya ntabwo zikunda kwengeranya kuko zishobora no kubanira izindi nyamaswa mu mahoro.

Mu gihe cy’amanywa ingagi zishobora kuba ziri mu matsinda atandukanye aho zava kuri esheshatu kugeza kuri zirindwi, muri aya maysinda haba harimo ingabo ndetse n’ingore tutanibagiwe n’abana bazo ariko mu gihe bakuze mo bajya kwikorera ayabo matsinda.

Mu burambe bw’ingagi iyo irinzwe ahari abantu ishobora kugeza ku myaka 50 y’ubukure mu gihe nyamara iyo ibana n’izindi nyamashwa ishobora kugeza ku myaka 35 gusa.

Ingagi zitura ahantu hamwe zitimuka n’ubwo akenshi ziturira mu ishamba ririmo ibititi. Izi nyamaswa kandi zikunda gutura ahantu harangwa n’imvura, mubice bigizwe by’imisozi ndetse n’ahantu hagizwe n’ibishanga.

Amoko y’ingagi zitandukanye kuri ubu aracyaboneka mu bice bitandukanye by’imisozi miremire nko muri Cameroon, Republika ya Central Africa, muri Gabon, Congo Kinshasa, mu Rwanda ndetse no muri Uganda, aho usanga zitura kubutumburuke bungana na metero 1,650 kugeza kuri metero 3,800.

Igihe ingagi ibyarira

Ingagi ishobora kubyara igeze kumyaka 10 kugera kuri 12, iy’ingore ishobora kubyarira hagati y’amezi 8 ndetse 9.5 kandi ibyara inshuro eshatu gusa mu buzima bwayo. Icyana cy’ingagi gito gishobora kugira hagati y’ikiro 1.4 kugera kukiro 1.8 n’ukuvuga hafi icyakabiri cy’umwana w’umuntu wavutse. Ingagi y’ingore kandi yita ku mwana wayo mugihe akiri muto.

Icyana cy’ingagi gishobora kwiga kugenda mugihe cy’amezi abiri gusa bitandukanye cyane n’abantu, ndetse gishobora kugenda mugihe cyitageze no kumezi 9.

Kubungabunga ingagi bihagaze bite?

Kugeza kuri ubu bigaragara ko ubwoko bw’ingagi bugenda bugabanuka akenshi bitewe n’intambara zigenda zibasira ibihugu byinshi cyane cyane ku mugabane w’Afurica. Abahanga bagaragaza ko ingagi zigera ku 50,000 zikigarara kumugabane w’Afurika.

Inyinshi muri izi ngagi ni izituruka mu Burengerazuba bw’Isi. Bigaragara ko hari gusa ingagi zo mu misozi mireremire zigera kuri 800 gusa izirenga cyimwe cya kabiri zibarizwa mu Rwanda, naho izigera ku 2,500 akaba ari izo mu misozi migufi yo mu Burasirazuba bw’Isi.

Ku ruhande rw’ u Rwanda ho Pariki y’Ibirunga iherereye mu Majyaruguru y’u Rwanda niho kugeza ubu habarizwa ingagi zo mu misozi miremire, iyi Pariki ihana imbiri n’ibihugu bya Uganda ndetse na Congo Kinshasa ariko ingagi nyinshi ziri ku ruhande rw’u Rwanda.

Ubwiyongere bw’izi ngagi ku ruhande rw’u Rwanda buterwa no kubungabunga izi nyamaswa zari zigeze mu marembera, no kuba mu guhera mu mwaka w’2005 kugeza ubu, buri mwaka Leta yarashyizeho umunsi wo kwita izina abana b’ingagi mu buryo bwo gushishikariza Abanyarwanda ndetse n’abanyamahanga kumenye ibyiza by’ingagi.

Kwita kuri izi nyamanswa bigaragara ko bifatiye runini igihugu cy’u Rwanda ndetse n’Abanyarwanda tutaretse n’abanyamahanga besnhi baza gusura u Rwanda bagenzwa no kwihera ijisho izo nyamaswa zenda gusa n’abantu.

Muri rusange nk’uko bigaragazwa n’Ikigo Gishizwe Iterambere mu Rwanda (RDB) mu mwaka wa 2010 u Rwanda rwabonye akayabo k’amafaranga angana na million 200 z’amadorari y’Amanyamerika aturutse mu bukerarugendo bwo gusura ingagim, naho mu mwaka w’2011 u Rwanda rwabonye amafaranga angana na million 257 z’amadorari y’Amerika .

Foto:genewikiplus

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO