Kwamamaza

U Rwanda rwungutse iki kuva hatangira gahunda yo Kwita Izina abana b’ingagi?

Yanditswe kuya 30-08-2016 saa 11:24' na Philbert Hagengimana


Ubukerarugendo ni imwe mu nkingi ya mwamba y’Iterambere ry’Ubukungu bw’u Rwanda, aho umusaruro wabwo mu 2015 wageze kuri miliyoni 318 z‘amadolari, (ni ukuvuga hafi miliyari 250 mu mafaranga y’u Rwanda), avuye kuri miliyoni 305 z’amadolari (miliyari 240 Frw) yinjiye mu 2014.

Hashize imyaka isaga 10 hashyizweho Itegeko Ngenga N° 04/2005 ryo ku wa 08/04/2005 rigena uburyo bwo kurengera, kubungabunga no guteza imbere ibidukikije mu Rwanda.

Umwaka iryo tegeko ngenga ryatangiye gukoreshwamo, ni na wo watangijwemo umuhango wo Kwita Izina abana b’ingagi, ari na bwo hashyizweho politiki ya Leta yo gusaranganya abaturiye Pariki z’Igihugu umusaruro w’ibikomoka ku bukerarugendo.

Umuhango wo Kwita Izina abana b’Ingagi umariye iki u Rwanda?

Umuyobozi ushinzwe ubukerarugendo mu Kigo cy’igihugu gishinzwe Iterambere (RDB), Kaliza Belise, yatangaje ko Kwita Izina abana b’ingagi bifitiye akamaro kanini u Rwanda mu buryo buziguye no mu buryo butaziguye.

Inyungu y’u Rwanda mu buryo buziguye, ni “Gahunda yo gusaranganya abaturage umusaruro w’ubukerarugendo, aho 5% byawo agenerwa imishinga iteza imbere abaturage”.

Kugeza ubu RDB yakoze ibikorwa byinshi birimo kubaka ibigo nderabuzima, kugeza amazi meza ku baturage, kubaka amashuri, ibikorwa bifasha mu bucuruzi, ibyo byose bikaba byarakozwe mu mirenge 42 yo mu Turere 12 kuva mu 2005.

Nk’uko Kaliza akomeza abisobanura, inyungu mu buryo butaziguye, “Ni ukumurikira amahanga ubwiza bw’u Rwanda, kuko ari igihugu gito, gituwe n’abaturage benshi, ariko 25% by’ubutaka bwacyo bukaba ari ibyanya bikomye cyangwa Pariki z’igihugu, bikagira ingaruka nziza ku bukungu.”

Umusaruro w’Ubukerarugendo wazamutse ku mpuzandengo ya 10%

Kuva mu 2005, ubwo habaga umuhango wo Kwita Izina abana b’ingagi ku nshuro ya mbere, umusaruro w‘Ubukerarugendo bw’u Rwanda umaze kwiyongera ku mpuzandengo ya 10% mu myaka 10.

Ubwo uyu muhango wo Kwita Izina wabaga bwa mbere mu 2005, umwaka wakurikiyeho wa 2006 u Rwanda rwinjije miliyoni 131 z’Amadolari ya Amerika, yagiye yiyongera uko imyaka yagendaga ishira, kugeza ubwo mu 2015 hinjijwe miliyoni 318 z‘amadolari.

Nubwo hari imyaka imwe n’imwe ba mukerarugendo bagiye bagabanuka ku mpamvu zitandukanye ariko zifitanye isano n’umutekano wo mu Karere, Abanyarwanda n’abanyamahanga bakorera ubukerarugendo mu Rwanda biyongereye ku mpuzandengo ya 11% kuva hatangira umuhango wo Kwita Izina abana b’ingagi.

Ubwo uwo muhango watangiraga, umwaka wa 2006 u Rwanda rwasuwe na ba mukerarugendo 499.000, bagiye biyongera ariko bigeze mu 2009 baragabanuka bava kuri 660.000 basuye mu 2008 bagera kuri 651,000.

Icyakora mu 2010 bongeye kwiyongera bava kuri abo bagera kuri 666.000, aho biyongereye ku ijanisha rya 2%, ndetse bakomeza biyongera kugeza ku basaga 1,300,000 bakoreye ubukerarugendo mu Rwanda mu 2015.

Abo bantu bakoreye Ubukerarugendo bwabo mu Rwanda, barimo abo mu Rwanda, abo mu Karere ka Afurika y’Iburasirazuba ndetse na Repubulika Iharanira Demokarasi ya Congo (RDC), na bo bagiye biyongera uko imyaka igenda ishira.

Uretse kuba Abanyarwanda bakora ubukerarugendo bagenda biyongera n’ubwo bataragera ku rwego rwifuzwa, abo mu Karere ka Afurika y’Iburasirazuba na RDC biyongereye ku gipimo cya 13%, naho abo mu Mahanga biyongera kuri 6%.

Mu 2006, abaturutse muri EAC na RDC basuye u Rwanda bari 404.000, bakomeza kwiyongera ariko bigeze mu 2009 bagabanukaho 9000, no mu 2010 bongera kugabanukaho 4000, ariko kuva ubwo bahita bongera kwiyongera kugeza ubwo mu 2015 biyongereyeho 78.000 ugereranyije n’abasuye mu 2014.

Abaturutse mu mahanga na bo bagiye biyongera, kuva ku 96.000 byasuye mu 2006 kugera ku 163.000 mu 2005.

Kwita Izina bitanga akazi

Uretse uwo musaruro ubarurwa mu mafaranga yinjiye mu isanduku ya Leta, Kwita Izina binatuma haboneka akazi ku baturiye ahabera uwo muhango n’ahandi habera ibikorwa biwubanziriza.

Ni amahirwe ku bashoramari n’ibigo biciriritse.

Inama zitandukanye zihuza abakora ibikorwa by’ubukerarugendo n’abandi bafatanyabikorwa ba RDB, zituma abashoramari baganira bakungurana ibitekerezo, ndetse bamwe bakaba banahungukira abafatanyabikorwa.

Hari n’abahungukira amasoko y’ibyobakora bifite aho bihuriye n’Ubukerarugendo, bityo ibikorwa byabo bikaguka.

Kwita Izina abana b’Ingagi ni umuhango ngarukamwaka, uwa 2016 ukazaba ku itariki ya 2 Nzeri, ahazitwa abana 22 bavutse nyuma y’Itariki ya 5 Nzeri 2015.
Uwo muhango uzabera mu Kinigi ho mu karere ka Musanze mu Ntara y’Amajyaruguru.

Uyu mwaka abana 22 b'ingagi bazitwa amazina ku wa 2 Nzeri
Umuhango wo Kwita Izina Abana b'ingagi uri mu bizamura umusaruro w'ubukerarugendo bw'u Rwanda

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved