Kwamamaza

Nyamasheke: Hatwitswe amahembe y’inzovu afite agaciro ka miliyoni zisaga 238

Yanditswe kuya 12-08-2016 saa 14:19' na Jean Baptiste Nshimiyimana


Ubuyobozi bwa Pariki ya Nyungwe bwatwitse ibikoresho ba rushimusi bifashishaga bahiga inyamaswa muri iyi pariki ndetse n’ibiro 150 by’amahembe y’inzovu afite agaciro k’asaga miliyoni 238 z’amafaranga y’u Rwanda.

Kuri uyu wa 12 Kanama 2016, mu Murenge wa Bushekeri muri Nyamasheke habereye igikorwa cyo gutwika ibikoresho birimo amacumu, amahembe y’inzovu, imitego ikoreshwa mu guhiga inyamaswa, ibitiyo, amapiki, ibikarayi n’ibindi byifashishwa mu bucukuzi bw’amabuye y’agaciro byari byafatiwe muri Nyungwe mu rugamba rwo guhashya ibikorwa bya ba rushimusi.

Ikilo kimwe cy’amahembe y’inzovu kigura ibihumbi bibiri by’amadorali ya Amerika, ni ukuvuga ko ibiro 150 byatwitswe bifite agaciro k’ibihumbi 300 by’amadorali [akabakaba miliyoni 238 z’amafaranga y’u Rwanda ].

Umuyobozi wa Pariki ya Nyungwe, Rugerinyange Louis yatangaje ko ibi byakozwe mu rwego rwo kugaragaza ko abaturage bose bakwiye kubungabunga urusobe rw’ibinyabuzima biri muri iyi pariki.

Ati “ Gutwika ibi bikoresho birimo n’amahembe y’inzovu ni ukwereka ba rushimusi n’abandi batekereza gukora ibikorwa by’ubuhigi ko nta gaciro gakomeye amahembe y’inzovu afite. Ko ahubwo igikenwe ni ya nzovu n’izindi nyamaswa.”

Yakomeje avuga ko hari ibindi bilo bisaga 200 bitatwitswe kubera ko bikiri mu manza ariko mu gihe bizaba byemejwe na byo bishobora guhita bitwikwa.

Rugerinyange yashimangiye ko ubufatanye bw’abaturage ndetse n’abashinzwe kurinda umutekano wa Pariki bumaze gutanga umusaruro mu kuyibungabunga.

Ati “Ni ubukangurambaga bwo guhindura imyumvire y’abaturage no kubereka ko ari ngombwa kurinda ibidukikije n’urusobe rw’ibinyabuzima biri muri Pariki ya Nyungwe,kandi hari icyizere ko bizakomeza kugerwaho. Ibi kandi bijyana no kongerera ubushobozi abakozi bayirinda .”

Nshimiyimana Pascal, umwe mu barinzi ba Pariki yavuze ko muri iyi minsi ba rushimusi bagabanutse ariko n’iyo hagize abafatwa bahita bashyikirizwa inzego za Polisi.

Abarinzi ba Pariki bahabwa amahugurwa yo gukoresha ibikoresho bigezweho nk’ibyombo, indebakure, n’ibindi hagamijwe kubungabunga umutekano mu rwego rwo guhangana na ba rushimusi bitwaza intwaro ziganjemo iza gakondo.

Umuyobozi ushinzwe ubukerarugendo muri RDB, Belize Kariza yatangaje ko Leta y’u Rwanda yahagurukiye ba rushimusi.

Ati “ Leta y’u Rwanda ntizihanganira ko inzovu zikomeza kwicwa ndetse zikaba zacika burundu aho zisigaye hose ku isi. Inzovu ntizigomba kuba amateka nk’uko bimeze muri Pariki ya Nyungwe.”

Kariza yakomeje asaba abaturage gutungira ubuyobozi agatoki mu gihe babonye umuntu wese ufite umugambi wo gushimuta cyangwa guhiga inyamaswa, agahita atabwa muri yombi.

Inzovu ya nyuma yabarizwaga muri Pariki y’igihugu ya Nyungwe ba rushimusi bayiteze imitego irapfa mu 1999.

Abaturage baturiye hafi na Pariki bagenerwa 5% ku musaruro uvuye mu bukerarugendo akoreshwa mu bikorwa by’iterambere. Pariki ya Nyungwe igenerwa 30 % by’umusaruro uvuye mu mapariki yose mu gihugu.

Abaturage batuye mu mirenge 24 yo mu turere duhuriye kuri pariki ya Nyungwe bamaze guhabwa agera kuri miliyoni 650 kuva muri 2005 yakoreshejwe mu bikorwa bitandukanye nko kubaka amashuri, amavuriro, imihanda, ndetse no mu yindi mishinga y’abaturage itandukanye ijyanye no kwibumbira muri koperative n’ibindi.

Amahembe y'inzovu yatwitswe hamwe n'ibindi bikoresho

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved