RDB igiye guhabwa hegitari 27 zo kwaguriraho Pariki y’Ibirunga

Yanditswe na Ferdinand Maniraguha
Kuya 10 Mutarama 2018 saa 08:32
Yasuwe :
0 1

Umuryango Mpuzamahanga wita ku bidukikije (African Wildlife Foundation) kuri uyu wa Gatatu uraha Ikigo cy’Igihugu gishinzwe Iterambere, RDB, ubutaka bwo kwaguriraho Pariki y’Igihugu y’Ibirunga bungana na hegitari 27.8.

RDB ivuga ko kuva Pariki y’Ibirunga yashingwa mu 1925, imaze gutakaza 54 % by’ubuso bwayo.

Pariki y’Igihugu y’Ibirunga uyu munsi ifite kilometero kare 160, zivuye kuri 340 zari zihari mu 1974. Kugabanuka k’ubwo buso kwaturutse kuri gahunda Leta yigeze gufata itangaho igice kinini kugira ngo gihingweho ibireti, ariko n’ubwiyongere bw’abaturage bwagiye butuma bayisatira.

Ubu butaka bugiye gutangwa bungana na hegitari 27.8, bwari bwaraguzwe na sosiyete y’amahoteli ya Serena Group, ishaka kubwubakaho hoteli y’icyitegererezo.

Icyakora nyuma byaje kugaragara ko iyo hoteli izasatira pariki ikabangamira urusobe rw’ibinyabuzima bibamo, Serena ihitamo kubugurisha African Wildlife Foundation.

Kubera ko uwo muryango usanzwe wita ku nyamaswa, wiyemeje gutanga ubwo butaka kugira ngo bwiyongere ku bwa pariki, inyamaswa zibone aho zisanzurira.
Ingamba Leta y’u Rwanda yagiye ifata zo kurengera inyamaswa by’umwihariko ingagi zo mu birunga, zatumye umubare wazo uva kuri 285 mu 1978 ugera kuri 480 mu 2010.

Umuyobozi wa RDB, Clare Akamanzi yashimye African Wildlife Foundation ku bw’iyo mpano yatanze. Ati “Iyi mpano yahawe Pariki y’Igihugu y’Ibirunga ni intambwe ikomeye mu kubungabunga urusobe rw’ibinyabuzima, ku nyungu z’abariho uyu munsi n’abazabaho nyuma. Muri uku kubungabunga ingagi, tuzungukiraho byinshi.”

Ushinzwe gahunda y’ubufatanye n’abaturage muri Pariki y’Igihugu y’Ibirunga, Kwizera Janvier, yabwiye IGIHE ko kongera ubutaka bwa pariki bizafasha inyamaswa kwisanzura, bikanatuma inyungu ziva mu bukerarugendo zikomeza kwiyongera.

Yavuze ko n’abaturage bizabafasha gukomeza kungukira ku mafaranga ava mu bukerarugendo .

Ati “Izo ni gahunda zifasha abaturage ngo babone ibisimbura ibyo bakuraga muri pariki, babone ibibateza imbere kandi nabo badufashe kubungabunga iyi Pariki y’Igihugu y’Ibirunga.”

Mu rwego rwo gushishikariza abaturage kwita kuri parike, Leta y’u Rwanda kuva mu 2005 igenera abayituriye 5 % by’amafaranga yinjijwe n’ubukerarugendo.

Umwaka ushize nyuma yo kongera igiciro cyo gusura ingagi, Leta yatangaje ko ayo mafaranga aziyongera akagera ku 10%, anyuzwa mu bikorwa rusange bifitiye abaturage akamaro.

Kwizera yatangaje ko kugeza mu 2016, hari hamaze gutangwa amafaranga y’u Rwanda 1 200 000 000, yashyizwe mu bikorwa rusange bifitiye abaturiye parike akamaro kubera ubukerarugendo.

Pariki y’Igihugu y’Ibirunga uyu munsi ifite kilometero kare 160, zivuye kuri 340 zari zihari mu 1974

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza