Kwamamaza

Rambagira ibyahoze ari ibyanya bikomye, ubu byabaye isoko y’amadovize

Yanditswe kuya 12-09-2016 saa 20:38' na Philbert Hagengimana


Ibyahoze ari ibyanya bikomye, ubu ni byo byinjiriza u Rwanda akayabo k’amadovize, aturuka mu bukerarugendo buhakorerwa, abantu bakihera ijisho urusobe rw’ibinyabuzima birimo ibimera n’inyamaswa, ndetse n’ahantu nyaburanga hacumbitse amateka y’urwa Gasabo.

Pariki nkuru z’u Rwanda ni eshatu, zirimo inyamaswa ndetse n’ibimera bimwe na bimwe utasanga ahandi ku Isi, n’ibindi byihariye ariko wasanga ahandi ibisa na byo, aho uretse kubisura winezeza, ushobora no kungukiraho ubumenyi butagira ingano.

Pariki y’Akagera

Pariki y’Akagera iherereye mu Ntara y’Iburasirazuba hafi y’umupaka w’u Rwanda na Tanzania. Ifite ubuso bwa kirometero kare 1200.

Iyi Pariki yari icyanya gikomye kuva mu 1934, ikaba ishyamba ryabarizwagamo inyamaswa z’amoko menshi, zirimo izoroheje ndetse n’inkazi, tutibagiwe n’amoko atandukanye y’inyoni, zahagenewe kugira ngo zibemo zituje zidatinya kwicwa na ba rushimusi cyangwa abatutizi.

Umwihariko w’iyi Pariki muri ibi bihugu byo mu karere ni uko ariyo yonyine ushobora kubonamo icyarimwe imirambi n’utununga birimo ubwatsi n’ibiti bigufi (savana) ndetse n’ibishanga, ugasangamo n’igice cy’ishyamba ritoshye.

Iyi Pariki irimo n’ibiyaga nka Ihema n’ibindi bito bito bituranye n’urufunzo rurerure, bituma inyamaswa zibona amazi zishoka.

Bitewe n’urugamba rwo kubohora igihugu rwatangiye mu 1990, abaturage baje kwigabiza igice kimwe cy’icyo cyanya gikomye, baturamo, ariko mu 2007 Leta y’u Rwanda yafashe umwanzuro wo kwimura abaturage kugira ngo badakomeza kwangiza iki cyanya kiri mu bizanira u Rwanda amafaranga y’amahanga arufasha kwiteza imbere.

Mu 2009, Ikigo cy’u Rwanda gishinzwe Iterambere, RDB cyasinye amasezerano na sosiyete ‘African Parks Network’, yo gucunga iyo Pariki mu gihe cy’imyaka 20 ariko ishobora kuvugururwa.

Mu 2010, hashyizweho ikigo gishinzwe kugenzura iyo pariki (Akagera Management Company).

Ibyiza bitatse Pariki y’Akagera

Buri wese asura Pariki bitewe n’ibyiza biyibamo akunda, ari na yo mpamvu bamwe bahitamo gusura iy’Akagera yose cyangwa bagasura bimwe mu bice biyigize.

‘Dag game drive’

‘Dag game drive’, ni imwe muri serivisi uhabwa iyo usuye Pariki y’Akagera, aho uyitambagizwa mu modoka yabugenewe, ukabasha kwirebera ‘Big Five’(inyamaswa z’inkazi), ndetse n’ubwiza bw’ishyamba.

Pariki y’Akagera, ni yo yonyine mu Rwanda wasangamo amoko atandukanye y’inyamaswa z’inkazi. Kugeza ubu iyi Pariki ifite amoko ane, ari yo Inzovu, Ingwe, Imbogo ndetse n’Intare, ariko guhera muri Nzeri 2016, abayisura bazasangamo n’Inkura (Rhinos).

Bird watching’

‘Bird watching’, na yo ni indi serivisi ihabwa uwatembereye muri pariki y’Akagera, aho ubasha kwirebera amoko atandukanye y’inyoni, dore ko muri iyo Pariki harimo amoko agera kuri 525.

‘Boat Safaris’

Iyi serivisi yo ni ubwato buteye amabengeza, uwasuye Pariki y’Akagera agendamo iyo agiye kwirebera ingona n’imvubu ziba mu biyaga.

‘Night Game Drive’

Iyi serivisi ni uburyo uwasuye iyo Pariki afashwa kwirebera inyamaswa zigenda nijoro ariko utapfa kubona kumanywa. Muri zo twavuga nk’ingwe, impyisi, imbwebwe n’izindi.

Pariki y’Akagera igira n’igice cyagenewe kugaragaza imirimo gakondo y’Abanyarwanda.

Nyamurangwa Godefroid, umwe mu bakozi muri Pariki y’Akagera, yatangarije IGIHE ko ushaka kureba ibyiza byose biyigize hatavuyemo na kimwe, akoresha nibura iminsi ibiri n’ijoro rimwe.

Pariki y’Igihugu ya Nyungwe

Pariki y’Igihugu ya Nyungwe ni ishyamba cyimeza riri mu Majyepfo y’Iburasirazuba bw’u Rwanda, ikaba ifatanye n’iya Kibira yo mu gihugu cy’u Burundi.

Muri Afurika yose, Pariki ya Nyungwe ni yo ifite ishyamba ry’inzitane rimaze igihe kirekire, ikaba ifite ubuso bwa kilometero kare hafi 970 (970 Km2).

Iyo Pariki yabayeho mbere y’izindi mu gihe cyiswe icy’ubutita (ice age). Ni igice gikize ku runyurane rw’ibimera, ishyamba rigizwe n’amoko arenga 200 y’ibiti, urwunge rw’ibiti by’indabyo zirimo ubwoko bw’ibito n’ibiti by’inganzamarumbo bya lobelia. Harimo n’ibiti bivamo imiti ya Kinyarwanda.

Ildephonse Kambogo, umukozi muri RDB ushinzwe ubukerarugendo muri Pariki ya Nyungwe, yatangarije IGIHE ko mbere y’umwaka wa 1993, yari icyanya gikomye, cyakorerwagamo imirimo y’ubuhigi, bagacamo ibiti byo kubakisha ndetse n’inkwi zo gucana.

Mu 2004 ni bwo yahindutse Pariki y’Igihugu, maze mu 2005 itangira kwitabwaho no kubyazwa umusaruro mu buryo bugezweho.

Ahantu hasurwa cyane muri Nyungwe

Canopy Walkway

Canopy Walkway ni ikiraro cyubatse mu kirere muri Pariki ya Nyungwe gifasha ba Mukerarugendo kwitegereza ibyiza nyaburanga birimo ibiti, inyoni, ibimera, inyamaswa n’urusobe rw’amajwi atandukanye muri iyo Pariki.

Iki kiraro cyubatswe mu byuma n’imigozi ikomeye, kuva hasi mu butumburuke cyubatse hagati ya metero 70 na 150. Abagisura bagenda ari ikipe y’abantu batarenze umunani bagera aho kirangirira abandi bakabona kuza.

Urusobe rw’ibinyabuzima byo mu bwoko bw’ibimera

Muri Pariki ya Nyungwe usangamo amoko 1,250 y’ibimera birimo amoko 50 y’ibihuru, amoko asaga 200 ya “Orchidées” ndetse n’indabo z’agahebuzo, zirimo n’ubwoko bune bwagaragaye ko ari bushya muri siyansi.

Inyamaswa

Pariki ya Nyungwe ifite umwihariko wo kuba icumbikiye amoko 13 y’inguge zikurura ba mukerarugendo, zirimo amoko utasanga ahandi ku mugabane wa Afurika.

Harimo kandi n’icyondi (Cercopithecus lhoesti), igihinyage, inkomo (Colobus angolensis ruwenzori), inkima (Cercopithecus mitis doggetti & kandti ), impundu (Pan troglodytes schweinfurtii),Umukunga (Cercopithecus ascanius schmidti), inkende (Cercopithecus aethiops), igishabaga (Cercopithecus albigena johnostonii), Galago ntoya n’inini hamwe n’Igitera.

Isumo rya Kamiranzovu

Isumo rya Kamiranzovu riri muri Pariki ya Nyungwe rituruka mu gishanga cya Kamiranzovu riri ku birometero 3 uvuye ku gishanga. Iri sumo rifite uburebure bwa metero zisaga 100, ryohereza amazi mu Kivu agakomereza mu ruzi rwa Congo anyuze mu kiyaga cya Tanganyika.

Isoko ya Nili

Nubwo ibihugu bitandukanye bivuga ko ari byo bifite isoko y’uruzi rwa Nile rwatumye Misiri itaba ubutayu, Pariki y’Igihugu ya Nyungwe ni yo iherereyemo isoko muzi y’uru ruzi nk’uko Ildephonse Kambogo yabitangarije IGIHE.

Iyo soko ya Nili, ni umugezi wisuka uhinduka uruzi rwa Mwogo, na rwo rwamara kwisukamo indi migezi rukabyara Nyabarongo.

Nyabarongo ni yo ihura n’Akanyaru bikabyara uruzi rw’Akagera, rukisuka mu kiyaga cya Victoria muri Uganda, ahitwa Ripon Falls hafi ya Jinja, rugasohokamo rwitwa “Victoria Nile”, ari nayo yisuka mu kiyaga cya Kyoga ku ntera y’ibirometero 500, nyuma ikisuka mu kiyaga cya Albert.

Mu mwaka wa 2015, Pariki ya Nyungwe yasuwe na ba Mukerarugendo basaga 9000, ariko ngo hari icyizere ko uyu mwaka wa 2016 bazongera kwiyongera, bakarenga 10,000.

Pariki y’Igihugu y’Ibirunga

Pariki y’Igihugu y’Ibirunga iherereye mu Burengerazuba bw’Amajyaruguru y’u Rwanda, igahana imbibi na Pariki nkuru y’Ibirunga muri Repuburika Iharanira Demokarasi ya Congo ndetse n’iya Uganda, yatangijwe mu mwaka wa 1925, ikaba ari na yo yabayeho bwa mbere muri Afurika.

Aka gace gakikijwe n’urusobe rw’Ibirunga nka Karisimbi, Muhabura, Gahinga, Sabyinyo, na Bisoke. Aha hantu nyaburanga kandi hakunze kurangwa n’imvura ituruka ku misozi miremire ihari ndetse n’amashyamba n’imigano. Iyi Pariki ni nayo ibonekamo Ingagi zo mu misozi.

Iyo Pariki yatangiye ari ntoya, ikikijwe n’ibirunga 3 ari byo Kalisimbi, Bisoke, na Mikeno, ikaba yari yashyizweho mu rwego rwo kurinda ingagi kuko ba rushimusi bahigaga ku buryo butemewe n’amategeko bendaga kuzimara.

Mu mwaka wa 1929 yaje kwaguka igera mu Rwanda ndetse n’icyari Congo-Mbiligi, kandi icyo gihe yitwaga Albert ari na we wari wayishinze, ariko ikaba yari mu maboko y’Abategetsi b’Abakoloni b’Ababiligi.

Mu mwaka wa 1960 iyi Pariki yahungabanyijwe cyane n’ibikorwa bya ba rushimusi ndetse muri icyo gihe igabanukaho nibura kimwe cya kabiri ugereranyije n’uko yanganaga igitangira.

Mu 1967, Dian Fossey bitaga Nyiramacibiri, impuguke mu by’ubumenyi bw’inyamaswa ukomoka muri America, yahahinduye ahantu nyaburanga ndetse aza no kuhashinga ikigo cy’Ubushakashatsi kizwi nka “Karisokee Research Center”, maze ashishikariza cyane amahanga gukora byinshi mu kwita ku ngagi zo mu misozi miremire zabonekaga muri iyi Pariki.

Kubera kwita cyane ku ngagi byaje gutuma habaho umutekano wazo ndetse ba rushimusi arabahabya, ariko nyuma aza kwicwa n’umuntu utaramenyekanye amusanze iwe mu mwaka wa 1985, bakaba baratekereje ko ari umwe muri ba rushimusi.

Ibibazo by’Umutekano nyuma ya Jenoside yakorewe Abatutsi mu Rwanda, byaje guhungabanya bikomeye ubukerarugendo bwakorerwaga muri Pariki y’Ibirunga, dore ko igice kimwe cyari cyarabaye ibirindiro by’abarwanyi ba FDLR.

Mu 1999, ubwo ingabo z’u Rwanda zari zimaze kugarura umutekano muri icyo gice, Ubukerarugendo bwaravuguruwe, maze mu 2005 hashyirwaho uburyo bugezweho bwo kwita no kubungabunga Pariki, none ubu ni hamwe mu nkingi ya mwamba y’Iterambere ry’Ubukungu bw’Igihugu.

Abasura Pariki y’Ibirunga, baba baje gusura:

Ingagi

Ingagi zo mu Birunga ubu zisaga 300, ariko hari gukorwa ibarura rizafasha kumenya umubare nyakuri wazo, bikaba byitezwe gutangazwa mu mwaka wa 2017.

Izo ngagi ziri mu miryango 20, ariko izisurwa ziri mu miryango 16, muri iyi hakabamo itatu ikorerwaho ubushakashatsi.

Imiryango 16 ni yo isurwa mu buryo buhoraho kandi inagenzurwa n’abakozi ba Pariki y’Ibirunga, kuko indi ine (4) yo hari igihe iba yaragiye mu gice cya Pariki ya Congo cyangwa ya Uganda.

Inkima

Inkima (Golden Monkey) ni bumwe mu bwoko bw’inkende ziri mu Birunga, zikaba ziri mu Miryango ibiri kugeza ubu.

Ibirunga:

Muri Pariki y’ibirunga hasurwa ibirunga bine muri 5 u Rwanda rufite. Ibirunga bisurwa ni Kalisimbi (uyisura akoresha iminsi ibiri), Bisoke, Muhabura na Gahinga, mu gihe Sabyinyo yo itaratangira gusurwa.

Igituro cya Nyiramacibiri

Benshi mu basura Pariki y’Ibirunga, ntibasiga batageze ahashyinguwe Dian Fossey bitaga Nyiramacibiri, impuguke mu by’ubumenyi bw’inyamaswa ikomoka muri America, wishwe kuwa 27 Ukuboza 1985.

Mu bindi bisurwa cyane muri Pariki ya Nyungwe, twavuga nk’Ubuvumo, Buhanga Eco-Park (igicumbi cy’amateka y’u Rwanda mu gihe cy’Abami).

Ubukerarugendo bwakorewe muri iyo Pariki ndetse n’ahandi hantu nyaburanga bwinjirije u Rwanda miliyoni 318 z’amadolari y’Amerika umwaka ushize wa 2015, angana na miliyari 254 na miliyoni 511 z’amafaranga y’u Rwanda nk’uko biherutse gutangazwa n’Ikigo cy’Igihugu cy’Iterambere (RDB).


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved