Kwamamaza

Minisitiri w’Intebe yasabye Abanyarwanda kurinda ibidukikije batagombye kubitegekwa

Yanditswe kuya 29-08-2016 saa 19:30' na Philbert Hagengimana


Ibikorwa byo guhiga, gututira ibiti byo kubakisha cyangwa gutema inkwi zo gucana iyo bidakumiriwe bishobora kugira ingaruka zikomeye ku rusobe rw’ibinyabuzima bibarizwa mu duce nyaburanga tw’igihugu.

Zimwe muri izo ngaruka, zirimo kwangirika kw’ikirere, ibura ry’imvura rishobora gutera amapfa, ikendera ry’ubwoko bw’inyamaswa runaka n’ibindi byinshi bishobora gutuma ubukungu bw’igihugu buhazaharira.

Ni yo mpamvu Minisitiri w’Intebe, Anastase Murekezi yasabye Abanyarwanda bose kurinda ibidukikije, bakabikora ku bwabo batagombye gutegereza ko babanza kubitegekwa, bityo inyamaswa zigafatwa neza kimwe n’ibindi bimera, kuko inyungu itagarukira ku kubireba gusa.

Ibi yabitangaje kuri uyu wa 29 Kanama 2016, ubwo yafunguraga ku mugaragaro ihuriro nyunguranabitekerezo rya kabiri ryiga ku kubungabunga urusobe rw’ibinyabuzima (Second Conversation on Conservation).

Mu ijambo rye, Minisitiri w’Intebe Murekezi yagize ati "Twifuza ko twahuza imirimo ya Leta, imirimo y’Abashakashatsi, inyungu z’abaturage, iz’Isi yose, inyamaswa mu Rwanda zigakomeza gufatwa neza, ibidukikije bigafatwa neza, ndetse nkaba nsaba abanyarwanda bose, kwita ku bidukikije bakabirinda bo ubwabo, batagombye gutegereza ko amategeko abibategeka.”

Yakomeje avuga ko Abanyarwanda bakwiye kumva ko kurinda ibidukikije ari ibintu bigomba guhoraho, kandi ari ibintu bibizihiye, avuga ko hari amashyamba, amasoko y’amazi hirya no hino mu Rwanda kandi bigomba kwitabwaho.

Yaboneyeho kandi umwanya wo kwibutsa ko kubungabunga neza ibidukikije bisaba gushyira hamwe kw’ inzego za Leta n’iz’abikorera, imiryango itari iya Leta ndetse n’ibihugu bitandukanye.

Umuyobozi ushinzwe Ubukerarugendo muri RDB, Belise Kaliza, yasangije abitabiriye ibi biganiro ubunararibonye bw’u Rwanda mu kubungabunga ibidukikije, by’umwihariko Pariki z’u Rwanda, aho yasobanuye Politiki zimwe na zimwe Leta yashyizeho. Yatanze urugero kuri gahunda yo gusangiza abaturage umusaruro uturuka ku bukerarugendo,

Ati “Gahunda yo gusaranganya abaturage umusaruro w’ubukerarugendo, aho 5% yawo agenerwa imishinga iteza imbere abaturage. Kugeza ubu dufite ibikorwa byinshi, birimo ibigo nderabuzima, kugeza amazi meza ku baturage, kubaka amashuri, ibikorwa bifasha mu bucuruzi mu mirenge 42 yo mu Turere 12 kuva mu 2005.”

Yakomeje kandi agaragaza ko n’ubwo u Rwanda ari igihugu gito kandi gituwe n’abaturage benshi, rufite Pariki enye z’igihugu, zirimo imwe yashyizweho mu mwaka wa 2015 (Pariki ya Gishwati na Mukura), izindi zikaba iy’Akagera, iya Nyungwe ndetse n’iy’Ibirunga.

Abitabiriye iyo nama y’iminsi ibiri iteraniye i Kigali kuva kuri uyu wa Mbere tariki ya 29 Kanama, baboneyeho umwanya wo gusangira ubumenyi n’uburyo butandukanye bukoreshwa mu kurwanya abangiza ibidukikije mu Karere ka Afurika y’Iburasirazuba.

‘Conversation on Conservation’, ni inama nyunguranabitekerezo ku kubungabunga urusobe rw’ibinyabuzima nk’inyamaswa ndetse n’ibimera, iy’uyu mwaka ikaba iri kuba ku nshuro ya kabiri, dore ko iya mbere yabaye muri Nzeli umwaka ushize, yateguwe n’Ikigo cy’igihugu cy’Iterambere (RDB).

Iyi nama kandi ni kimwe mu bikorwa bibanziriza umuhango wo Kwita Izina abana b’ingagi 22, uteganyijwe kuwa Gatanu tariki ya 2 Nzeli 2016.

Abantu baturutse mu bihugu bitandukanye bari kungurana ibitekerezo ku bijyanye no kubungabunga ibidukikije
Umuyobozi Ushinzwe Ubukerarugendo muri RDB, Belise Kaliza
Minisitiri w'Intebe yasabye ko kurinda ibidukikije byaba umuco aho gukorwa kubera itegeko
Umuyobozi wa RDB, Francis Gatare
Umwe mu bitabiriye ibi biganiro
Dr. Jose Kalpers wo mu kigo Yamatji Marlpha Arbotional Corporation

Amafoto: Mahoro Luqman


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved