00:00:00 IGIHE NETWORK KN KINYARWANDA EN ENGLISH FR FRANCAIS

Menya African Fish Eagle, kimwe mu bisiga byo mu muryango wa Kagoma bidapfa kwisukirwa

Yanditswe na Nzabonimpa Jean Baptiste
Kuya 29 Gicurasi 2021 saa 08:00
Yasuwe :
0 0

Uvuze igisiga cyitwa kagoma ntabwo waba uvuze ikintu gishya mu matwi y’Abanyarwanda benshi kuko hari byinshi bazi kuri icyo gisiga. Nubwo bimeze bityo, icyo twavuga ni uko ururimi rw’ikinyarwanda iyo bavuze inyoni cyangwa igisiga runaka bavuga umuryango wose muri rusange batavuga igisiga runaka cyihariye.

Dusubiye inyuma gato, duherutse kuvuga ku gisiga cyitwa Samusure (Long Crested Eagle) buriya ubwiye umuntu ko nacyo ari kagoma ashobora kuguhakanya ariko nyamara buriya kiri mu muryango wa za kagoma.

Nimunyemerere uyu munsi tugaruke ku gisiga cyo muri uwo muryango cyitwa African Fish Eagle kandi uwavuga ko mu bisiga biboneka ku butaka bw’u Rwanda kiri mu bisiga byihagazeho ntabwo yaba aciye inka amabere.

Imiterere ya African Fish Eagle

African Fish Eagle ni igisiga kinini cyo mu muryango wa kagoma gikunda kuboneka munsi y’ubutayu bwa Sahara. Iki gisiga gikunda kuboneka hafi y’amazi iyo hari ibyo kurya bihagije.

Iki gisiga iyo gikuze usanga ahantu hanini ku mababa haba hasa n’ikigina ariko kandi kikagira ibara ry’umweru kuva ku mutwe kugera mu gatuza. Amababa kigurukisha aba asa n’umukara. Umutwe, agatuza n’imirizo ni umweru. Amaso ya African Fish Eagle ni ikigina kijimye.Umunwa wa African Fish Eagle wihese nk’indobani nk’ibindi bisiga byose birya inyama. Ikindi kiranga umunwa wayo ni uko ari umuhondo ariko kumpera zawo hakaba hariho akabara k’umukara.

African Fish Eagle ibasha kurama hagati y’imyaka 12-40. Uburemere bwayo buri hagati y’ibiro 2-3,6, Uburebure bwayo bubarirwa hagati ya Santimetero 63-75. Muri iki gihe ku rwego rw’isi habarurwa ibi bisiga bingana 300.000, uburebure bw’amababa yayo bubarirwa hagati ya metero 2-2,4.

Ibyo kurya bya African Fish Eagle

African Fish Eagle ni indyanyama kandi by’umwihariko itungwa n’amafi. Gusa ishobora no kurya ibisiga byo mu mazi nk’ibishuhe, nyirabarazana, ibiyongoyongo, ibyana by’ingona, imiserebanya, ibikeri n’amayezi. Iki gisiga ni ikinyambaraga kugeza n’ubwo gishobora no kurya n’inkende.

Imyororokere ya African Fish Eagle

African Fish Eagle ingabo n’ingore bibana ubuzima bwabyo bwose. Ingore zikunda gutera amagi mu gihe cy’impeshyi iyo ikigero cy’amazi kigabanutse. Umuryango wa African Fish Eagle uba ufite ibyari nibura bibiri cyangwa se birenga. Kubera ko ibyo byari uwo muryango ukunda guhora ubikoresha kandi bikaba bihora bisanwa ushobora gusanga byarabaye binini kugera nko kuri metero imwe cyangwa metero ebyiri.
Ingore itera amagi 1-3 y’umweru afite itudomo tujya gusa n’umutuku. Kurarira amagi akenshi bikorwa n’ingore ariko hari igihe ingabo ishobora gusigara mu magi nk’igihe ingore igiye gushaka ibyo kurya. Igihe cyo kurarira amagi kiri hagati y’iminsi 42-45.

Imishwi iyo imaze guturagwa bifata igihe kingana n’iminsi 70-75 kugira ngo ibe imaze kumera amababa. Nyuma y’iyo minsi iyo mishwi ikomeza kubana n’ababyeyi bayo andi mezi atatu kugira ngo ibe ishobora kwigendera no gusanga ibindi bisiga bikuze kure y’ababyeyi babyo.

Ibibangamira African Fish Eagle

African Fish Eagle nubwo atari agafu k’imvugwarimwe mu bindi bisiga ariko amagi yayo, imishwi cyangwa se iyo yakomeretse iba umuhigo w’ibindi bisiga byo mu muryango wa kagoma n’ibindi.

Ntabwo ari ibyo gusa kuko imibare yazo irimo kugenda igabanuka bitewe n’ihumana ry’ikirere hamwe n’imiti ikoresha ku binyabuzima byo mu mazi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .