Inzovu n’imbogo ni zimwe mu nyamaswa ziyongereye muri Pariki y’Akagera

Yanditswe na IGIHE
Kuya 26 Ukuboza 2017 saa 01:24
Yasuwe :
0 0

Ibarura riherutse gukorwa muri Pariki y’Akagera ryagaragaje ko umubare w’inzovu n’imbogo ziyibarizwamo wiyongereye ugereranyije n’irya ryabanje.

Iri barura rya Kane ryakozwe muri Kanama uyu mwaka ritangazwa mu ntangiriro za Ukuboza, rigaragaza ko imbogo muri iyi pariki zingana na 2 879, naho inzovu zikaba ijana.

Mu ibarura ryari ryakozwe mu 2015, inzovu zari 90 mu gihe imbogo zari 2 567.

Iri barura ryakozwe hifashihije kajugujugu, rigaragaza ko udusumbashyamba muri iyo pariki ari 80, amasirabo (Roan Antelopes) 39, Eland ari 214, indonyi (waterbuck) zikaba 1033, imparage zo ni 1901, inyemera ni 888, inzobe (Sitatunga) ni 55, impala ni 1 773, isatura ni 783, imvubu ni 1643 n’ingona 500.

Ibarura rigaragaza ko inyamaswa zirimo inzovu, imvubu, udusumbashyamba, imparage, inyemera n’ingona ziri kwiyongera mu gihe eland, amasirabo, indonyi, impala n’isatura ziri kugabanuka.

Iyi pariki yatangaje ko iri gabanuka ry’izi nyamaswa ku ruhande rumwe riterwa n’imihindagurikire y’ibihe byagiye bibangamira ibarura bigatuma zimwe zitagaragara.
Icyakora ubuyobozi bwa pariki bwavuze ko amasirabo yo ari kugabanuka ku buryo buteye inkeke, hakaba hagiye kurebwa ikiri kubitera.

Nubwo kubungabunga pariki bikomeje gutera imbere, hari ba rushimusi bakibangamira ubwisanzure n’imibereho by’inyamaswa. Ubuyobozi bwa Pariki butangaza ko ubwato 17 bwa ba rushimusi bwangijwe ndetse n’inzu eshanu bakambikagamo zigasenywa.

Inyamaswa zabaruwe muri Pariki y’Akagera ni 12,142 hatabariwemo inyoni n’inyamaswa muntu nk’inkende n’izindi.

Ubuyobozi bw’iyi Parike buvuga ko kugera mu Ugushyingo uyu mwaka bwakiriye ba mukerarugendo 33,618.

Mu rwego rwo gukomeza gukurura ba mukerarugendo no guteza imbere pariki, Leta y’u Rwanda mu minsi ishize yashyize inkura 18 n’intare zirindwi muri Pariki y’Akagera nyuma y’imyaka zihacitse.

Imbogo ni zimwe mu nyamaswa zo muri Pariki y'Akagera ziyongereye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza