Inkura z’Umukara zagaruwe muri Pariki y’Akagera nyuma y’imyaka 10 zihacitse

Yanditswe na Rabbi Malo Umucunguzi
Kuya 2 Gicurasi 2017 saa 07:54
Yasuwe :
0 0

Inkura z’Umukara zagejejwe muri Pariki y’Igihugu y’Akagera nyuma y’uko zahaherukaga mu myaka 10 ishize, kikaba ari igikorwa kizazamura ubukerarugendo bwinjiriza igihugu amadevize nk’aho mu mwaka ushize inyungu yabwo yageze kuri miliyoni 404 z’Amadolari ya Amerika.

Ni igikorwa cyabaye ku bufatanye n’Umuryango Mpuzamahanga ufasha guverinoma zitandukanye kuri uyu mugabane mu gucunga pariki z’ibihugu n’ibyanya bibungabunzwe, Ikigo cy’Igihugu cy’Iterambere, RDB n’Umuryango witiriwe umuherwe Howard G. Buffett.

Iyi gahunda igomba kugeza Inkura 20 muri Pariki y’Igihugu y’Akagera mu byumweru bibiri bya mbere bya Gicurasi, zikazaturuka muri Afurika y’Epfo, igihugu mu 2015 cyahaye u Rwanda Intare.

Ahagana mu 1970, mu Akagera habagamo Inkura z’Umukara zigera kuri 50, ariko uwo mubare waje kugabanyuka cyane bitewe na ba rushimusi kugeza ubwo iya nyuma yaherukaga kugaragara mu 2007.

Mu 2010 imicungire y’iyi Pariki yaje guhinduka cyane ubwo yafatwaga n’ikigo African Parks kibikora ku bufatanye na RDB, ubu iyi pariki ikaba yarazitiwe ngo inyamaswa zitongera guhura n’abaturage.

Umuyobozi Mukuru wa African Park, Peter Fearnhead, yavuze ko Inkura ari ikirango gikomeye cya Afurika, nyamara zugarijwe bikomeye kandi ziri kugabanyuka cyane kuri uyu mugabane bitewe n’uburyo amahembe yazo ahenze ku isoko nubwo ubu bucuruzi butemewe.

Yakomeje agira ati “Kugaruka kw’Inkura muri iki gihugu ni ikimenyetso gikomeye cy’ubushake u Rwanda rwashyize mu kubungabunga inyamaswa, ikaba n’indi ntambwe ikomeye mu kongera gusubiranya urusobe rw’ibinyabuzima mu Akagera.”

Muri Pariki y’Akagera hashyizweho uburyo bwo gucunga umutekano ngo izi Nkura zirindwe, harimo kuzikurikirana mu buryo bw’ikoranabuhanga aho ziri hose muri pariki, itsinda rishinzwe guhashya ba rushimusi bifashisha imbwa zibareha no kwifashisha kajugujugu mu igenzura igihe bibaye ngombwa. Ibi byose bizashoboka kubera inkunga ya Howard G. Buffett Foundation.

Umuyobozi wa RDB, Clare Akamanzi, yavuze ko ukugaruka kw’Inkura muri Pariki y’Akagera ari ikintu gishimishije cyane.

Ati “Birafungura amarembo ku kindi cyiciro mu rugendo rwacu rwo kubungabunga urusobe rw’ibinyabuzima kandi turashimira abafatanyabikorwa bitanze kugira ngo ibi bigerweho. Twiteguye kuzakira kandi tugacunga n’umutekano wazo ku nyungu z’ubukerarugendo bwacu n’abaturage muri rusange.”

Umuherwe Howard G. Buffet yavuze ko hashize imyaka myinshi byaragoranye guhashya ba rushimusi b’Inkura mu bice bitandukanye bya Afurika ariko u Rwanda rukaba rwarijeje umutekano wazo.

Yagize ati “Nemereye Perezida Kagame ko tuzatera inkunga ibikorwa byo kugarura Inkura mu Rwanda kuko twari tuzi neza ko iki gihugu kizazirinda. Uyu munsi ni indi ntambwe ikomeye ubuyobozi bw’u Rwanda buteye mu kubungabunga urusobe rw’ibinyabuzima, mu bukerarugendo, by’umwihariko mu miyoborere myiza.”

Kugeza ubu ku Isi habarurwa Inkura z’Umukara zigera ku 5000, izigera ku 1000 zikaba zisa neza n’izazanwe mu Rwanda zo mu bwoko bwa ‘Eastern black rhino’, ku buryo kuzizana mu Rwanda ari indi ntambwe itewe mu kuzibungabunga.

U Rwanda rwinjiye mu ruhando rw’ibihugu bifite inyamaswa eshanu zikomeye muri Afurika arizo Intare, Inzovu, Imbogo n’Inkura. Rwinjiye no mu bihugu byo muri iki gice cya Afurika bifite izo nyamaswa, birimo Afurika y’Epfo, Tanzania, Kenya na Botswana.

Indege itwara imizigo y’Ikigo cy’Indege, Etihad, niyo yazanye izi Nkura
Abakozi ba African Park bapakira amasanduku yarimo izi Nkura
Saa 3:30 zo mu gitondo nibwo izi nyamaswa zagejejwe i Kigali zivanywe muri Afurika y’Epfo
Izi nkura zahise zipakirwa imodoka zijyanwa muri Pariki y'Akagera
U Rwanda rwinjiye kandi mu bihugu byo muri iki gice cya Afurika bifite inkura birimo Afurika y’Epfo, Tanzania, Kenya na Botswana
Kugeza ubu ku Isi habarurwa Inkura z’Umukara zigera ku 5000, izigera ku 1000 zikaba zisa neza n’izazanwe mu Rwanda zo mu bwoko bwa ‘Eastern black rhino’
Ambasaderi wa Afurika y'Epfo mu Rwanda, George Nkosinati Twala ari kumwe n’ushinzwe ubukerarugendo muri RDB, Belyse Kaliza, hamwe n’umukozi wa African Park icunga Akagera
U Rwanda rwinjiye mu ruhando rw’ibihugu bifite inyamaswa eshanu zikomeye muri Afurika arizo Intare, Inzovu, Imbogo n’Inkura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza