Icyamamare Morgan Freeman uri mu Rwanda yasuye ingagi zo muri Pariki y’Ibirunga

Yanditswe na Dusabimana Aimable
Kuya 13 Gicurasi 2017 saa 11:30
Yasuwe :
0 0

Umukinnyi w’ikirangirire wubatse amateka akomeye muri sinema, Morgan Freeman, yerekeje muri Pariki y’Ibirunga asura ingagi zo mu Rwanda zimaze kuba ikimenyabose mu gukurura ba mukerarugendo benshi baturuka mu mahanga.

Uyu musaza w’igihangange ku Isi mu mwuga wa sinema, IGIHE ifite amakuru y’uko ‘yageze mu Rwanda ku wa Kane tariki ya 11 Gicurasi 2017’ aherekejwe n’itsinda ry’abantu bagera kuri bane. Ntihigeze hatangazwa impamvu nyamukuru y’urugendo rwe mu gihugu.

Nyuma y’iminsi ibiri Morgan Freeman ari muri uru ruzinduko atigeze ashaka ko rumenyekana mu itangazamakuru, mu gitondo cyo kuri uyu wa Gatandatu, tariki 13 Gicurasi 2017, yasuye ingagi zo muri Pariki y’Ibirunga mu Rwanda. Muri uru rugendo yanabonanye n’imiryango y’abahoze ari ba rushimusi bafite ubuhamya bwihariye bwo kuba kuba muri iki gihe ari bo bafite uruhare mu kubungabunga umutekano w’inyamaswa.

Morgan Freeman yavutse ku wa 1 Kamena 1937, ni umukinnyi wa filime ubimazemo imyaka irenga 52 ndetse akagira ubuhanga bukomeye mu kuzitunganya. Uyu mukambwe yatwaye igihembo cya Academy Award mu 2005 nka Best Supporting Actor muri filime Million Dollar Baby (2004). Anafite ibindi bihembo bikomeye birimo Golden Globe Award na Screen Actors Guild Award.

Ikuzo rye rikomezwa cyane n’ubuhanga agaragaza mu gukina mu myanya yose ahabwa muri filime yagaragayemo, azwi mu zakoze amateka zirimo iyitwa Street Smart (1987), Driving Miss Daisy (1989), The Shawshank Redemption (1994) and Invictus (2009) Glory (1989), Robin Hood: Prince of Thieves (1991), Seven (1995), Deep Impact (1998), The Sum of All Fears (2002), Bruce Almighty (2003), The Dark Knight Trilogy (2005–2012), The Lego Movie (2014), Lucy (2014).

Morgan Freeman yasuye ingagi muri Pariki y'Ibirunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza