Giraneza, ingagi yaherukaga kuburirwa irengero, yapfuye

Yanditswe na Rabbi Malo Umucunguzi
Kuya 12 Gicurasi 2017 saa 10:03
Yasuwe :
2 0

Ikigo kirengera ingagi cyitiriwe Dian Fossey cyatangaje ko ingagi y’ingabo yitwa Giraneza yapfuye ku myaka 22, nyuma y’uburwayi yari imaranye igihe bwanatumye itandukana n’umuryango wayo.

Kuwa Mbere w’iki cyumweru nibwo Ikigo Dian Fossey Gorilla Fund, cyatangaje ko Giraneza yaburiwe irengero, nyuma gato Ikigo cy’Igihugu cy’Iterambere (RDB) kiza kuvuga ko yabonetse.

Dian Fossey Gorilla Fund yavugaga ko iyi ngagi yasize umuryango wayo urimo ingagi ebyiri z’ingore n’abana bazo babiri, kandi ariyo iba ishinzwe kuziyobora no kuzirinda, kuko buri muryango w’ingagi ubamo ingabo ifite izo nshingano.

Icyo gihe wagize uti “Mu cyumweru gishize Giraneza yabuze mu muryango wayo muto ugizwe n’ingagi ebyiri z’ingore n’abana babiri, ikaba yabonetse mu birometero byinshi kure y’umuryango, igaragaza ibimenyetso by’uburwayi, ku buryo bishoboka ko aribyo byatumye itandukana n’umuryango wayo.”

RDB yavugaga ko iyo ngagi yatangiye kuvurwa. Icyo gihe Dian Fossey Gorilla Fund yavugaga ko ihangayikishijwe n’umuryango muri rusange kuko ingagi z’ingore buri imwe ifite umwana w’umwaka umwe.

Izo mpungenge zari zishingiye ku kuba ingagi y’ngabo ariyo iba ishinzwe kurinda umuryango, ku buryo hari impungenge ko izi zasigaye zishobora kugirirwa nabi n’izaturuka mu wundi muryango.

Ikindi ngo ni uko ugutembera kw’izi ngagi zidafite igomba kuzirinda, zishobora guhura n’ibibazo bikomeye birimo no gusagarirwa n’imbogo, cyane ko nta ngabo biri kumwe.

Ubusanzwe ngo ibibazo nk’ibyo bibaho, ku buryo nka kimwe cya kane cy’abana b’ingagi bavuka bapfa bataragera ku myaka itatu, bitewe ahanini n’ibikomere baterwa n’ingagi z’ingabo zo mu yindi miryango.

Imwe muri izo ngagi y’ingore yitwa Pasika, ifite imyaka 26, ikagira umwana witwa Mashami wavutse muri Werurwe 2016, akaba uwa kane mu bo yabyaye, ariko hasigaye batatu.

Indi ngagi y’ingore yitwa Kurinda ifite imyaka 14, umwana wayo yitwa Nyampinga akaba ariwe usigaye muri batatu yabyaye.

Giraneza yari yarashoboye kurema uyu muryango wayo, ariko ntibizwi niba abana izi ngagi zifite ariyo yababyaye. Izi ngagi byabanaga, ingabo yaziyoboraga mbere nyuma y’ibikomere yagiriye mu mirwano n’izindi.

Ingagi z’ingore n’abana bazo bakomeje gukurikiranwa, mu gihe basigaye bonyine badafite ingagi igomba kuzirengera.

Giraneza yapfuye ku myaka 22 y'amavuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza