Ellen DeGeneres yahamije ko uruzinduko yagiriye mu Rwanda rwahinduye ubuzima bwe

Yanditswe na Mukaneza M.Ange
Kuya 5 Nzeri 2018 saa 11:39
Yasuwe :
0 0

Umunyamerika Ellen DeGeneres uherutse kuza mu Rwanda, aho agiye kubaka ikigo kigamije kubungabunga urusobe rw’ibinyabuzima, yahamije ko uruzinduko yahagiriye rwahinduye ubuzima bwe mu buryo atabasha gusobanura.

Ku tariki ya 26 Gicurasi nibwo Ellen wamenyekanye mu kiganiro ‘The Ellen DeGeneres Show’ gica kuri televiziyo na NBC, yageze mu Rwanda.

Mu kiganiro cyatambutse kuri uyu wa Kabiri, Ellen wageze mu Rwanda avuye muri Kenya yavuze ko yakabije inzozi zo gusura ingagi yari amaranye igihe kitari igito.

Ati “Biragoye gusobanura uburyo ibihe byiza nahagiriye byari bimeze. Nubona amahirwe yo kujya mu Rwanda uzayakoreshe. Igihugu ni cyiza, abaturage beza, abantu bavugaga ko iyo ugiye kureba ingagi uba uzegereye, ibi kandi nibyo.”

Ellen yeretse abari bamukurikiye amashusho yuko byari byifashe ubwo yari mu birunga, anabasobanurira byinshi mu bikorwa yahakoreye n’uko yabashije kwegera ingagi zo mu birunga bwa mbere.

Mu rwenya rwinshi Ellen yabwiye abamukurikira ko ibwiriza rya mbere yahawe ari uko ntawe utunga ingagi urutoki kuko ari ikimenyetso cy’ubushotoranyi ariko agezeyo kwihangana biramunanira arabikora.

Ni amagambo yasekeje abarebaga amashusho bose ati “Ku bw’amahirwe ntabwo yigeze ibitindaho”.

Yakomeje agaragaza ko nubwo izi ngagi zamenyereye kubona abantu, zifitemo ubunyamaswa ari nayo mpamvu umuntu aba agomba kwigengesera.

Nubwo yari afite ubwoba, Ellen ngo yatewe ishyari n’uko ingagi yaje ikanyura kuri muramukazi we ati “Nahise ntekereza nti najya ndashaka gusunikwa n’ingagi (ibitwenge)”.

Ellen waje mu Rwanda ari kumwe n’umufasha we Portia de Rossi, ari nawe wamuhaye impano izamufasha kubaka ikigo gishyigikira ibikorwa by’Ikigo Dian Fossey Fund cyita ku ngagi, yavuze ko umunsi ukurikiyeho basuye undi muryango, kandi bakabasha kuwegera neza bitandukanye n’iza mbere.

Ati “Wagira ngo zari zizi ko turi buze, zari zidutegereje, zirangije zidusaba itike y’iminsi 12 (ibitwenge)”.

We na Portia basaga n’abatangajwe n’ibyo bari kubona, baje kwisanga basigaye bonyine bitegereza uburyo imwe muri zo irya ibyatsi, mu gihe abandi berekezaga ku modoka zabazanye.

Ubwo Ellen DeGeneres yazaga mu Rwanda yakiriwe na Perezida Paul Kagame aho bagiranye ibiganiro, anasura Urwibutso rwa Jenoside rwa Kigali ku Gisozi yunamira inzirakarengana zihashyunguwe.

Afata Umunyamerikakazi Dr Dian Fossey nk’icyitegererezo ku bwo kwita ku ngagi muri Pariki y’Ibirunga anazikoraho ubushakashatsi, azubaka ikigo kizashyigikira ibikorwa bya Karisoke Research Center yatangije muri Nzeri 1967.

Fossey yishwe mu Ukuboza 1985, umurambo we ukaba warabonetse ufite ibikomere by’umuhoro ari nayo mpamvu bikekwa ko yishwe na ba rushimusi.

Kugeza ubu harimo gukorwa igishushanyo mbonera cy’iki kigo kizaba kizitwa ‘‘Ellen DeGeneres Campus’, ibuye ry’ifatizo no kubaka bikazatangira mu 2019, kikazuzura muri Nzeri 2020 gitwaye miliyoni 10 z’amadolari.

Ellen DeGeneres ubwo yasuraga u Rwanda
Ellen yaje mu Rwanda ari kumwe n’umufasha we Portia de Rossi bahura na Perezida Kagame
Ellen n'umufasha we Portia de Rossi bashishikarije abantu gusura u Rwanda
Igishushanyo mbonera cy'inyubako zizubakwa na Ellen

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza