Kwamamaza

Ibyo wamenya ku Nkima zo mu Birunga zihuje byinshi n’umuntu

Yanditswe kuya 31-08-2016 saa 21:24' na Philbert Hagengimana


U Rwanda ni igihugu gitatswe n’ibyiza utarondora ngo ubirangize cyane ibitatse ahantu nyaburanga. Muri ibyo byiza harimo Inkima zifite ibara rya Zahabu(Golden Mankies) zo muri Pariki y’Ibirunga, zikaba inyamaswa zishimishije ariko zifite imwe mu mico nk’iy’abantu.

Inkima ni bumwe mu bwoko bw’inyamaswa buba muri Pariki y’Ibirunga imenyerewe cyane ku nyamaswa z’Ingagi.

Ukigera muri iyi Pariki ubanza gusobanurirwa ibyo wemerewe n’ibyo utemerewe kwinjirana ahari izo Nkima kugira ngo udahungabanya umudendezo w’utwo tunyamaswa duteye amabengeza.

Ubwo kuri uyu wa 31 Kanama 2016 umunyamakuru wa IGIHE kimwe n’abandi bakerarugendo basuraga Inkima zo muri Pariki y’Ibirunga ku musozi wa Kabatwa uri hagati y’Ibirunga bya Sabyinyo na Bisoke ahari hateraniye Inkima zo mu muryango wa Kagaragara, zibarirwa hagati ya 120 na 150, yasanze zikina, zirisha, nta bwoba zifite, mbese ni inshuti y’abantu mu buryo budasanzwe ku nyamaswa zibera mu ishyamba.

Nta handi wasanga ibiremwa nk’ibyo kandi bifite ibara rya Zahabu, uretse muri Pariki ya Virunga yo muri RDC, muri Uganda, na Pariki y’Ibirunga mu Rwanda, aha ngo hakaba habarurwa Inkima zisaga 1000 nubwo ubushakashatsi butaragaragaza imibare nyakuri yazo.

Ese Inkima zibaho zite?

Ndayambaje Charles Bertin, ukuriye Ubushakashatsi mu muryango w’Inkima za Kagaragara, yatangarije IGIHE ko Inkima imara amezi atanu (5) mu nda ya nyina. Ivuka ifite amagarama hagati ya 300 na 500, ikitwa uruhinja (Baby) kugeza ku mezi ane (4), aho ihita yitwa ‘infant’ kugeza ubwo igeze ku myaka itatu (3) igahita icuka, bivuze ko Inkima yonsa iminsi 1000 nk’umuntu.

Icyo gihe ni bwo umwana w’Inkima ahita agimbutse kugeza ubwo yuzuza imyaka itanu cyangwa itandatu kuri zimwe, aho iba ibaye nkuru ku buryo iba ishobora kwimya cyangwa ikima.

Inkima ifite icyizere cyo kubaho kibarirwa mu myaka hagati ya 18 na 20 kandi ni indyabyatsi.

Inkima zitwa “Golden Mankies” kubera ibara ryazo rijya gusa na Zahabu, izi zikaba zitandukanye n’izindi ziba muri Pariki ya Nyungwe, zo zitwa “Blue Mankies”.

Hari ibidasanzwe biyiranga

Biragoye gushyingura umurambo w’inkima. Iyo Inkima y’imbyeyi igize ibyago byo gupfusha umwana, iramuterura ikabana na we kugeza ashangutse. Imushyira hasi iyo igiye kurisha, ariko iyo ibonye umuntu cyangwa hakagira ikiyikanga, ihita iwuterura ikawurirana mu giti.

Inkima ntiyaba mu bushorishori bw’igiti, ariko ntiyanaba hasi ku butaka

Gutinya Kagoma (Eagles) kabone nubwo ntazaba ziri hafi, no gutinya inyamaswa z’inkazi hamwe na ba Rushimusi, bituma inkima ihitamo kwibera rwagati (middle) mu giti.

Hari utuntu tumwe ihuriraho n’umuntu

Nk’uko iteka uko umuntu atewe yitabara, inkima na yo iyo isagariwe yirwanaho bitandukanye na zimwe mu nyamaswa zisagarirwa zigahita ziruka.

Nk’uko abantu bagira aho bashyingurwa (irimbi), Inkima kimwe n’izindi nyamaswa zo muri Pariki, iyo ipfuye ari nkuru, umurambo urafatwa ugasuzumwa n’abaganga, bakareba icyayishe, hanyuma igashyingurwa ahabugenewe.

Inkima nazo zisurwa na ba Mukerarugendo benshi
Nazo ubwazo ziba zikina hagati yazo
Zikunda kwibera mu biti hagati
Iyi migano ni yo zikunda kwiberamo

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved