Akon, Lauren na Obasanjo mu bazita abana b’ingagi amazina

Yanditswe na Cyprien Niyomwungeri, Ishimwe Israel
Kuya 5 Nzeri 2018 saa 10:47
Yasuwe :
0 0

Harabura amasaha abarirwa ku ntoki ngo abana 23 b’Ingagi bahabwe amazina mu birori by’akataraboneka byahuruje amahanga bizabera mu Kinigi mu Karere ka Musanze.

Iki gikorwa ngarukamwaka kizaba ku nshuro ya 14, kuri uyu wa Gatanu tariki 7 Nzeri 2018. Gisanze umubare w’ingagi zo mu birunga ukomeje kwiyongera kuko ibarura riheruka ryerekanye ko hari izigera kuri 604.

Nkuko Ikigo cy’Igihugu gishinze Iterambere (RDB) kibitangaza, umuhango wo Kwita Izina ingagi uzitabirwa n’abashyitsi bakomeye bazanita amazina. Barimo umuhanzi wo muri Leta Zunze Ubumwe za Amerika uzwi nka Akon.

Ku nshuro ya mbere kuva u Rwanda rwasinyana na Arsenal FC, amasezerano yo kurumenyekanisha nk’icyerekezo cy’ubukerarugendo ‘Visit Rwanda’, abahoze ari abakinnyi b’iyi kipe bazitabira iki gikorwa banite amazina.

Urutonde rw’abazita amazina

Igikomangoma cya Leta Zunze Ubumwe z’Abarabu, Sheikh Dr. Abdulaziz Ali Bin Rashid Al Nuami: Uyu azwi nka Sheikh w’ibidukikije, wiyeguriye ubukerarugendo no kwita ku bidukikije.

Dr. Noeline Raondry Rakotoarisa: Umuyobozi wa gahunda yo kubaka ubushobozi n’ubufatanye mu Ishami rya Loni rishinzwe, uburezi, ubumenyi n’umuco (UNESCO).

Madame Graca Machel: Yabaye umugore wa Nelson Mandela nyuma y’uko umugabo we wa mbere Perezida wa Mozambique, Samora Machel yitabye Imana. Ni impirimbanyi y’uburenganzira bw’abagore n’abana.

Aliaume Damala Badara Akon Thiam: Uyu wamenyekanye cyane nka ‘Akon’, ni umuririmbyi wo muri Leta zunze Ubumwe za Amerika, umwanditsi w’indirimbo, umucuruzi, ukora indirimbo ukomoka muri Senegal.

Samba Bathily: Umugiraneza wo muri Mali. Ni Umuyobozi Mukuru wa Solekta International akaba n’umwe mu bakoze umushinga Akon Lighting Africa wo gucanira Afurika afatanyije na Akon na Thione Niang.

Alexandra Virina Scott: Umwongerezakazi wahoze ari umukinnyi w’umupira w’amaguru wamenyekanye cyane akina ku ruhande rw’iburyo inyuma mu ikipe ya Arsenal y’abagore. Yagaragaye inshuro 140 mu ikipe y’Igihugu y’u Bwongereza ndetse ahagararira ubwami bw’u Bwongereza mu mikino Olimpiki ya 2012 yabereye i Londres.

Laureano Bisan Etamé-Mayer: Uzwi nka Lauren, yabaye umukinnyi w’umupira w’amaguru ukomoka muri Cameroun. Yakiniye ikipe y’igihugu ku ruhande rw’iburyo inyuma ndetse no muri Arsenal FC. Ni umwe mu bakinnyi bamaze imikino 49 badatsinzwe ‘Invincibles’.

Strive Masiyiwa: Ni rwiyemezamirimo wo muri Zimbabwe akaba n’umugiraneza. Ni we washinze akaba n’umuyobozi mukuru w’ibigo by’itumanaho mpuzamahanga n’itangazamakuru ari byo ‘Econet Wireless na Econet Media’.

Adrian Gardiner: Ni Umunyafurika y’Epfo washinze akaba anayobora Mantis, imenyerewe cyane mu bijyanye n’amahoteli, hirya no hino ku Isi cyane cyane muri Afurika.

Michael O’Brien-Onyeka: Ni umuyobozi Mukuru wungirije w’umuryango mpuzamahanga ushinzwe kurengera urusobe rw’ibinyabuzima.

Thomas Krulis: Umuhuzabikorwa w’Umuryango w’Ibigo bikomeye by’Ubucuruzi ku Isi (YPO) akaba n’Umuyobozi wa Loto Investments.

Hong Liang & Xinyu Zhang: Iri tsinda ryamamaye kubera ikiganiro cy’ubukerarugendo kinyura kuri murandasi cyitwa ‘Lu Xing’ (Ku muhanda) rikora.

Hugh Fernley-Whittingstall: Visi Perezida w’Umuryango udaharanira inyungu wa Flora & Fauna International. Ni Umunyamakuru ukomeye mu Bwongereza, Umwanditsi ku mafunguro ndetse anakora Ubukangurambaga ku bidukikije.

Peter Riedel: Ni Perezida akaba n’Ushinzwe Ibikorwa muri Rhode Schwarz International, Sosiyete ikora ikanacuruza ibikoresho by’ikoranabuhanga.

Alexa Gray: Ahagarariye Umuryango wa Gordon and Patricia Gray Animal Welfare Foundation. Uhuza abitanga mu bikorwa byo kubungabunga urusobe rw’ibinyabuzima yibanda ku miryango ikorera muri Canada.

Michael Wale: Umuyobozi wa Kerzner International Limited, itanga serivisi zijyanye n’iby’amahoteli.

Ambasaderi wa Leta Zunze Ubumwe za Amerika mu Rwanda, Peter Vrooman

Dr. Olusegun Obasanjo: Yahoze ari Perezida wa Nigeria kuva mu 1999 kugeza mu 2007.

Theo Kgosinkwe & Nhlanhla Nciza: Abahanzi babarizwa mu Itsinda rizwi nka Mafikizolo. Bamaze gutwara igihembo cy’Itsinda ryiza ry’umwaka muri Afurika y’Epfo (South African Music Award) inshuro eshatu.

Rao Hongwei: Ambasaderi w’u Bushinwa mu Rwanda

Odette Nyiramongi: Nyiri hoteli Paradis Malahide Resort iri mu Karere ka Rubavu

Judith Kakuze: Yatwazaga abasura Pariki y’Igihugu y’Ibirunga. Ari muri Komite Ngishwanama mu Muryango w’Abatwaza ba Mukerarugendo muri Pariki y’Igihugu y’Ibirunga. Kakuze ni umunyamuryango mu Nama Ngishwanama y’Umurenge wa Kinigi.

Jeannette Uwiragiye: Mu 2017, yasoje ku isonga nk’umunyeshuri w’igitsina gore mu Ishami ryigisha ibijyanye no Kubungabunga Amashyamba muri IPRC- Kitabi.

Aliaume Damala Badara Akon Thiam wamenyekanye nka Akon azitabira umuhango wo Kwita Izina
Lauren wamamaye cyane muri Arsenal yamaze kugera i Kigali yitabiriye ibikorwa birimo Kwiyta Izina
Dr. Olusegun Obasanjo wahoze ari Perezida wa Nigeria azita izina ingagi
Dr. Noeline Raondry Rakotoarisoa nawe azita izina ingagi
Igikomangoma Sheikh Dr. Abdulaziz Ali Bin Rashid Al Nuami uzwi nk'inshuti y'ibidukikije azita izina muri 23 azitwa ingagi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza