McDonald wifuza guca agahigo ko gusura Ingagi inshuro 100 mu biteguye kuzita amazina

Yanditswe na Uwishyaka Jean Louis
Kuya 1 Nzeri 2016 saa 07:37
Yasuwe : XX
0

Abanyacyubahiro batandatu barimo na Mary Ann McDonald, Umunyamerikakazi wiyemeje guca agahigo ko gusura Ingagi inshuro 100, basuye abana bazo, dore ko bari no mu bagomba kubita amazina mu muhango uteganyijwe kuri uyu wa Gatanu tariki ya 2 Nzeri 2016.

Abo banyacyubahiro bari barangajwe imbere na Ambasaderi w’Umuryango w’Ubumwe bw’Uburayi, Michael Ryan, bahagurutse mu Kinigi berekeza mu birunga, aho bari bagamije kureba ku yindi nshuro, imico n’imyitwarire by’ingagi, ndetse bamwe bahavuye banamaze kubona amazina bagomba kuzita abana bazo mu muhango ubura umunsi umwe ngo ube.

Abandi bari muri iryo tsinda barimo Dr. Paul Scholte, umushakashatsi ukorera Ikigega cy’u Budage gifasha Komisiyo yo muri Afurika yo hagati yita ku mashyamba (COMIFAC), Dr José Kalpers, Impuguke mu byo kubungabunga urusobe rw’ibinyabuzima, ukomoka muri Australia ndetse na Timothy Tear, rwiyemezamirimo akaba n’impuguke mu kubungabunga urusobe rw’Ibinyabuzima.

Umunyamerikakazi w’umunyamwuga mu gufata amafoto, Mary Ann McDonald, akaba umwe muri iryo tsinda ry’abagomba kwita izina abana b’Ingagi, avuga ko yatangiye kuza mu Rwanda kuva mu 2003, mu myaka 13 amaze asura iki gihugu ngo amaze gusura Ingagi inshuro 91 mu gihe yiyemeje kuzisura inshuro 100.

Mary Ann, yavuze ko atewe ishema no kuba aho azajya aba ari hose, azajya azirikana isano afitanye n’u Rwanda, dore ko we yibona “nk’umubyeyi uzaba uhasize umwana”.

Ibi anabihurizaho na Ambasaderi Michael Ryan, uvuga ko atewe ishema no Kwita Izina umwana w’Ingagi, ati “Ni ukuri ni iby’agaciro kuba Ambasaderi w’Umuryango w’Ubumwe bw’Uburayi, yaratoranyijwe nk’umwe mu bazita amazina abana b’ingagi. Ni ukuri biranejeje cyane.”

Benshi muri abo Banyacyubahiro, bamaze guhitamo amazina bagomba kwita abo bana 22 b’ingagi bagomba kwitwa mu muhango uzaba ukorwa ku nshuro ya 12, ukazabera aho usanzwe ubera mu Kinigi , mu Karere ka Musanze, mu Ntara y’Amajyaruguru.

Ingagi zikurura ba mukerarugendo batari bake baturutse hirya no hino ku isi
Aba ba mukerarugendo bafashe n'umwanya wo gusura ingagi mbere yo kuzita amazina
Bagize umwanya wo kuzifotora kugira ngo bajye bahora bazibuka
Bishimiye ko babashije gusura ingagi mu Birunga
Ababishinzwe babasobanuriraga ibyo bifuzaga kumenya byose
Baganiraga hagati yabo babwirana ibyo biboneye mu Birunga
Mary Ann McDonald, Umunyamerikakazi wiyemeje guca agahigo ko gusura Ingagi inshuro 100
Amafoto abibutsa ibihe bagiriye mu Rwanda bayafashe ku bwinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza