Abanyarwanda 100 bujuje imyaka 15 bahawe amahirwe yo gusura ingagi ku buntu

Yanditswe na Cyprien Niyomwungeri
Kuya 5 Nyakanga 2018 saa 08:48
Yasuwe :
0 0

Ikigo cy’Igihugu cy’Iterambere (RDB), cyahaye urubyiruko rw’abanyarwanda 100 rwujuje imyaka 15 muri uyu mwaka, amahirwe yo gusura ingagi zo muri Pariki y’Ibirunga ku buntu, kimwe mu byerekezo bikomeye by’ubukerarugendo u Rwanda rufite.

Iki gikorwa kigamije gushishikariza Abanyarwanda kurushaho kumenya no gusura ibyiza by’igihugu cyabo no gushishikariza urubyiruko kugira umuco wo kwita ku rusobe rw’ibinyabuzima n’ibidukikije muri rusange.

RDB isobanura ko ari mu rwego rwo kwizihiza isabukuru ya 24 yo kwibohora ku Rwanda no kuzirikana ko kwatumye igihugu kigira ubukire n’umutekano, kubungabunga ibidukikije bikongera gushyirwamo ingufu bityo urwego rw’ubukerarugendo rugatera imbere.

Abanyarwanda 100 bujuje imyaka 15 muri uyu mwaka bahawe amahirwe yo kurambagira ibyiza nyaburanga by’u Rwanda, basura ingagi zo muri Pariki y’Ibirunga mu Ukuboza uyu mwaka.

RDB itangaza ko abujuje imyaka 15 tariki 4 Nyakanga uyu mwaka bashishikarizwa kugana ibiro byayo bishinzwe gutanga amakuru n’ubucuruzi biri hirya no hino mu gihugu, bakuzuza ifishi izabaha amahirwe yo gutoranywa.

Muri bo 50 bazatsindira gusura ingagi, bazatoranywa binyuze muri tombola mu gihe abandi 50 bazatangazwa binyuze kuri Twitter. Kwitabira irushanwa ryo kuri Twitter, abantu bose bemerewe gutanga izina ry’uwujuje imyaka 15 uyu mwaka, babinyujije mu butumwa burimo izina n’ifoto, hanyuma bakabihuza na #TemberaURwanda15 na @visitrwanda_now.

Abazatsinda bose bemerewe kujyana n’umuntu umwe bihitiyemo. Aya marushanwa azarangira ku wa 18 Nyakanga 2018. Imodoka zo kujya gusura Pariki y’Ibirunga zizatangwa na RDB.

Mu 2016 ba mukerarugendo b’imbere mu gihugu bari 63% by’abasuye Pariki y’Igihugu y’Akagera na 54% mu basuye Nyungwe. Muri rusange ubukerarugendo bw’imbere mu gihugu bwazamutseho 17% mu 2016.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza