Kwamamaza

Abahoze ari abahigi muri Pariki barabyinira ku rukoma

Yanditswe kuya 22-08-2016 saa 09:06' na Philbert Hagengimana


Abahoze ari abahigi muri Pariki z’igihugu baravuga imyato Ikigo cy’Igihugu gishinzwe Iterambere, nyuma y’aho hashyizweho uburyo bwo kuzibungabunga, na bo bagafashwa guhindura imyumvire, bakayoboka ibikorwa byatuma batera imbere mu buryo burambye.

Aba bari ba rushimusi bafashijwe kwibumbira mu makoperative akora ibikorwa bitandukanye hanyuma Ikigo cy’Igihugu cy’Iterambere kikajya kibaha inkunga y’amafaranga yo kubafasha kwiteza imbere bari hamwe.

Umuturage wo mu Murenge wa Bushekeri ho mu Karere ka Nyamasheke yatangaje ko imirimo y’ubuhigi ari yo yari imutunze mbere y’umwaka wa 2009, ariko akaba nta kindi yashoboraga kwigezaho uretse kuba yakwica inyamaswa bakayirya cyangwa akayigurisha bakamuha intica ntikize.

Yagize ati “Imirimo y’ubuhigi ni yo yari intunze, maze mu 2009 haza abayobozi bo muri RDB bashinzwe guhuza abaturage na Pariki. Babonye ko inyamaswa zenda gucika burundu, baratwegera, baratwigisha baradufasha turahinduka, batwereka ibibi byo kwangiza pariki n’ibyiza byo kuyibungabunga, turabikurikiza, none twateye imbere, ubu tubasha gutangira abana ubwisungane mu kwivuza, tukabishyurira amashuri, ndetse n’inzu turimo kuzubaka.”

Uwitwa Emmanuel Murekezi, yavuze ko yakoraga ubuhigi kugirango abone ibyo atungisha umuryango we wari ukennye, ari na yo mpamvu yari yarananiwe kuwimura ngo awukure mu manegeka yari yarawutujemo, ariko aho ahinduriye imyumvire ubu arimo kwihuta mu iterambere.

Ati “Nari ntuye ahantu mu manegeka, ariko ubu nabashije kwigurika ikibanza ahantu mu mudugudu, ndetse ndimo no kubaka ahandi, mbese ndabona biri kumfasha kugira aho mva n’aho ngana mu iterambere.”

Umuyobozi wa Pariki ya Nyungwe, Louis Rugerinyange, atangaza ko uko abaturage bagendaga bahindura imyumvire, byatumye bagira uruhare mu kuyibungabunga, bityo n’umusaruro waturukaga mu bukerarugendo buyikomokamo uriyongera.

Yagize ati “Muri 2005 nka Pariki ya Nyungwe twari dufite miliyoni 15 gusa zo gusaranganya imishinga ikorerwa hafi ya Pariki, ariko umwaka ushize twari dufite miliyoni 144 z’amafaranga y’u Rwanda, kandi n’imishinga yo gufasha yariyongereye.”

Politiki y’igihugu yashyizweho mu 2005 igena 5% by’amafaranga yinjijwe n’ubukerarugendo, agashyirwa mu bikorwa by’iterambere ry’abaturage baturiye Pariki z’igihugu. Ibyo bikorwa mu rwego rwo kubashimira umusanzu bagira mu kuzibungabunga, no guharanira ko ibyiza by’ubukerarugendo byahera iwabo.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved