I Musanze hafunguwe inzu ndangamurage izajya imurikirwamo ibyerekeye ingagi

Yanditswe na Uwishyaka Jean Louis
Kuya 11 Ukuboza 2016 saa 04:03
Yasuwe :
0 0

Mu rwego rwo kurushaho gushyira ahagaragara amateka n’imibereho y’ingagi zo mu Birunga no kuzibungabunga, hafunguwe inzu Ndangamurage ibigaragaza mu Karere ka Musanze.

Iyi nzu Ndangamurage yiswe Karisoke Exhibit, yashinzwe biturutse ku Kigo gikorerwamo ubushakashatsi, Karisoke Reaserch Center, kiyoborwa n’Umuryango witiriwe Diana Fossey (DFGFI).

Karisoke Research Center yashinzwe mu 1967 na Fossey, wari warahawe izina rya Nyiramacibiri, wibukirwa cyane ku bikorwa byamuranze ahanini byari bishingiye ku bushakashatsi no kurengera Ingagi zo mu Birunga mu Rwanda. Uyu yatabarutse mu 1985.

The New times ivuga ko ubwo ku wa Gatanu, Karisoke Exhibit yafungurwaga ku mugaragaro, abashyitsi bitemberejwe mu bice bitatu biyigize, birimo icyahariwe ingagi, ahagaragara isano hagati y’imiterere yazo n’ikiremwamuntu n’itandukaniro ry’Ingagi z’ingabo n’ingore.

Muri iki gice kandi hagaragara igikuta cyanditseho amazina y’ingagi zose zishwe na barushimusi, igihe zapfiriye n’imyaka zari zifite.

Zimwe muri zo ni nk’iyitwaga Marchessa yabayeho hagati y’umwaka wa 19421 na 980, Effie (1961-1994), Unce Bert(1952-1978) n’izindi.

Hari kandi icyumba cyahariwe Diana Fossey, ahagaragara amakuru ku kazi ko kwita ku ngagi yakoze, amafoto ndetse n’ibindi bikoresho bye bwite byasanzwe mu nzu yari atuyemo ari na ho yiciwe n’umuntu utarigeze amenyekana.

Muri iyi nzu ndangamurage harimo kandi icyumba kinini cyerekanirwamo amashusho n’amafoto adasanzwe y’ingagi, bigakorwa mu buryo bw’ikoranabuhanga rya 3D.

Muri iyi nzu ndangamurage kandi hanagaragaramo ibibazo byugarije ingagi birimo n’abavumvu binjira muri pariki, mu buryo bunyuranyije n’amategeko.

Umuyobozi wa Karisoke Research Center, Felix Ndagijimana yavuze ko ba mukerarugendo n’abandi bantu bose babyifuza bazajya bifashisha iriya nzu ndangamurage kugira ngo babashe kubona amakuru yose yerekeranye n’ingagi, uburyo zikwiye kubungabungwa n’ibikorwa by’Umuryango DFGFI muri rusange.

Perezida wa DFGFI, Tara Stoinski yavuze ko ari iby’agaciro kugira ikigo cyihariye abantu bazasangamo amakuru yose ku kazi uyu muryango ukora ndetse n’ibindi byerekeranye no kubungabunga inyamaswa ziba muri pariki y’ibirunga.

Umuryango DFGFI, wibanda ku bikorwa byo kwita no kubungabunga ubwoko bw’ingagi ziba mu Birunga ku mugabane wa Afurika.

Iyi nzu Ndangamurage irimo ibice byinshi abantu basura bakamenya byinshi ku Ngagi zo mu birunga
Abantu bose bifuza kugira ibyo bamenya ku ngagi bahawe ikaze muri iyi nzu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza