Kigali: Ingona ebyiri zigiye gushyirwa mu Ngoro y’Amateka Kamere

Yanditswe na M. M.
Kuya 7 Nyakanga 2015 saa 01:57
Yasuwe :
0 0

Ingona zizwiho gutura mu mazi zigiye kwiyongera ku nzoka zisanzwe mu ngoro y’amateka kamere mu Rwanda iherereye mu Mujyi wa Kigali, zikazafasha kongera umubare w’abahasura.

Ingoro y’Amateka Kamere iherereye mu Mujyi wa Kigali hafi ya Gereza Nkuru ya1930, iherutse gushyirwamo ubwoko butandukanye bw’inzoka, ubuyobozi bwayo bwemeza ko zatumye abayisura bikuba hafi inshuro enye.

Mu kiganiro IGIHE yagiranye na Isidore Ndikumana, Umuyobozi w’ishami rishinzwe guteza imbere ubukerarugendo bushingiye ku muco mu ngoro z’imirage mu Rwanda yavuze ko izi ngona zitegerejwe mu mwaka utaha hakazabanza kuzanwa ebyiri, nyuma hakazanwa n’izindi.

Zizaza zikurikira inzoka ziba mu muryango umwe w’ibikururanda, aho zizajya ngo hazubakirwa neza ku buryo ntawe zishobora guhungabanyiriza umutekano.
Yagize ati “Mwabonye ko twazanye inzoka abasura bakiyongera inshuro hafi enye, n’izi ngona zizatuma biyongera nk’inshuro esheshatu.”

Iki gikorwa ngo kizaturuka ku bufatanye bw’ibigo bitandukanye birimo REMA, RDB n’izindi nzego ku buryo izi ngona zizafatwa n’inzobere mu biyaga byo mu Rwanda zikazajya zitabwaho uko bikwiye zigaburirwa inyama.

Nyuma y'inzoka, Ingona zigiye kuzanwa mu Ngoro y’Amateka Kamere

Abayobozi b’ingoro z’umurage mu Rwanda barimo gusaba ko i Kigali hashyirwa pariki nto (Zoo) izashyirwamo inyamaswa zitandukanye ku buryo ushaka kuzisura adafite umwanya uhagije atagera hirya no hino hari za pariki, ahubwo akaba yasura iyi. Mu gihe abashaka gusura inyamaswa nyinshi bazagana pariki zirimo.

Abanyeshuri kandi bo hirya no hino mu gihugu ngo bashobora kwifashisha iyi pariki mu gihe habayeho ikibazo cy’ubushobozi bw’amafaranga.

Iyi ngoro irimo amateka y’ubumenyi bw’Isi, amabuye y’agaciro atandukanye yavuye mu butaka(geologie), ayavuye ku kwezi yatanzwe ubwo idarapo ry’u Rwanda ryahashyirwaga, harimo kandi ibyuma by’ibinyabiziga abazungu ba mbere baje mu Rwanda bifashishaga, umurambo w’ ingona yariye abantu benshi mu karere ka Bugesera n’andi mateka anyuranye y’u Rwanda.

[email protected]
Twitter: @NtakirutaDeus


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza