Kwamamaza

Abayobora ingoro ndangamurage ku Isi batewe inkeke n’umurage ukomeje kwangirika

Yanditswe kuya 31-08-2016 saa 16:30' na Mukaneza M.Ange


Ubuyobozi bw’Ingoro Ndangamurage zo mu bihugu bitandukanye ku Isi, bwagaragaje impungenge butewe n’uko umurage ukomeje kwangirika ahanini biturutse ku ntambara, ubujura no kudahabwa agaciro na bamwe mu baturage.

Ibi bibazo byagaragarijwe mu nama nyunguranabitekerezo igamije kurebera hamwe uko umurage uhagaze ku Isi, inama yabereye i Karongi mu Ngoro y’ibidukikije ku itariki ya 30 Kanama 2016.

Iyi nama itegura indi mpuzamahanga yiga ku gusigasira umurage izaba umwaka utaha, yitabiriwe n’abayobozi b’Ingoro Ndangamurage zo mu bihugu byo ku mugabane w’u Burayi, Amerika, Afurika n’abandi bafite aho bahuriye n’umuco n’ibidukikije.

Umuyobozi mukuru w’agateganyo w’Ingoro Ndangamurage mu Rwanda, Ndikumana Isidore, yavuze ko hari ibibazo bitandukanye bituruka ku murage wibwa, wangizwa n’intambara n’abatumva agaciro kawo bakawufata uko bishakiye.

Yagize ati "Ni ikibazo kigaragara mu isi, aho bamwe mu baturage bumva ko umurage ari uwa mukerarugendo, ntibumve ko umurage ari uwabo. Iyi nama rero ni ukugira ngo turebere hamwe ese n’izihe ngamba zafatwa kugira ngo uwo murage tuzawusigasire ugirire akamaro Isi.”

Yakomeje avuga ko umurage atari uw’igihugu runaka ahubwo ko ari uw’Isi muri rusange, ari na yo mpamvu bose bafatanyiriza hamwe mu kuwusigasira ku buryo ikintu kibwe mu gihugu kimwe, abakora mu nzu ndangamurage cyajyanywemo biyumvamo kugisubiza aho kigenewe kuba.

Ndikumana kandi yanagarutse ku miti gakondo, indirimbo n’ibindi biranga umuco bigenda bikendera, avuga ko ibihugu bikwiye gufata iya mbere mu gushyiraho amategeko agamije kubirengera ndetse yishimira ko mu Rwanda iri tegeko ryamaze gutorwa.

Umunyamabanga Nshingwabikorwa w’Inteko Nyarwanda y’Ururimi n’Umuco (RALC), Dr Vuningoma James asanga kuba ibihingwa bikoreshwa nk’imiti gakondo bigenda bikendera ari amahano kuko biri mu bintu bimwe byatumye imiryango ibaho kuko benshi ari ho bavanaga imiti n’ibibatunga.

Agira ati "Hari ibiti biraha inyuma, iyi nzu ndangamurage kubitwereka ni byiza ariko igihe kizanagere twese dushake uburyo tubibungabunga. Kubibungabunga kumwe ni ukubitera ahantu henshi hashoboka kandi no kugira ngo abanyarwanda bo ubwabo babyiteho. Kubibereka ni byiza, amaherezo bikagera kuri benshi bashoboka kugira ngo tubigire umurage wacu. ”

Umuyobozi w’Ingoro y’amateka kamere mu Budage(Museum für Naturkunde), Johannes Vogel yavuze ko u Rwanda rumaze gukora byinshi mu gusigasira umurage ushingiye ku muco n’ibidukikije ndetse avuga ko bazakomeza gutanga ubufasha kugira ngo n’ibitarakorwa bigerweho.

Yanavuze ko nyuma y’ibi biganiro nyungaranabitekerezo hagiye gushyirwaho komite igamije gusuzuma niba ubusabe u Rwanda rwatanze bwo kuzakira Inama mpuzamahanga ya gatatu yiga ku kugusigasira umurage, izaba ibereye bwa mbere muri Afurika bwakwemerwa, ariko avuga ko rufite amahirwe menshi yo kubyemererwa.

Kuri ubu u Rwanda rukomeje guhura n’ibibazo by’umurage ugenda ukendera ahanini bituruka ku nyubako n’ibindi bikorwaremezo, ubuhinzi bugezweho, imihindagurukire y’ibihe byose bigira uruhare mu gutuma ahantu habitse amateka akomeye hasibangana cyangwa hakagabanuka ndetse n’ikibazo cy’abantu biganjemo urubyiruko n’abahanzi usanga bashyira imbere imico y’abanyamahanga bigatesha agaciro uw’abanyarwanda.

Umuyobozi mukuru w’agateganyo w’Ingoro Ndangamurage mu Rwanda, Ndikumana Isidore
Umunyamabanga Nshingwabikorwa w’Inteko Nyarwanda y’Ururimi n’Umuco (RALC), Dr Vuningoma James
Umuyobozi w’Ingoro y’amateka kamere mu Budage(Museum für Naturkunde), Johannes Vogel
Abitabiriye ikiganiro nyunguranabitekerezo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved