Kwamamaza

Ziracyari mu mishinga: Inzu z’ibitangaza zitigeze zibona izuba

Yanditswe kuya 2-11-2016 saa 21:02' na Cyprien Niyomwungeri


Hirya no hino ku Isi mu mijyi itandukanye, hagaragara ibishushanyo by’inyubako zagiye zitekerezwa ariko ntizubakwe bitewe n’impamvu zirimo ihungabana ry’ubukungu bw’Isi, guhenda kw’ibikoresho zagombaga kubakishwa n’ibindi.

Ikinyamakuru CNN cyakoze urutonde rw’inyubako zatekerejweho ariko bikarangira zitubatswe.

1. Chicago Spire, Santiago Calatrava

Abantu benshi bibaza uko umujyi wa Chicago uba usa iyo igishushanyo cy’inyubako ya Calatrava cyo mu 2005 kiza kuba cyarashyizwe mu bikorwa. Yari inyubako ya metero 444 z’ubutumburuke yubakishijwe ibyuma n’ibirahure gusa.

Yari kuba isumba Willis Tower metero ebyiri iyirusha n’ubwiza. Yari kuba yubatse ku buso bwa metero 9 902 797.58, ifite amacumbi, ahakodeshwa, hoteli y’inyenyeri eshanu. Iyi nyubako ntiyaje kubakwa bitewe n’ihungabana ry’ubukungu ryo mu 2008.

2.Manhattan Dame, R.Buckminster Fuller and Shoji Sandao

Iyi ni inyubako ya kilometero zirenga eshatu yagombaga kubakishwa ibirahure igashyirwamo uburyo bugabanya ubukana bw’izuba, yari kugira uburemere bwa toni 4000, ikaba yaragombaga kubakwa mu 1960 ku gaciro ka miliyoni 200 z’amadolari.

3. The Mile High Illinois, Frank Lloyd Wright

Iki gishushanyo cyakozwe mu 1956, yari ikubye kane inyubako ndende ku Isi kiriya gihe. Byari biteganyijwe ko yakira abantu ibihumbi ijana mu etaje 528, ikubakwa n’akayabo ka miliyoni 60 z’amadolari.

Imodoka ntabwo zari kuba zikenewe kuri iyo nyubako kuko indege (Helicopter), ariyo yari bujyane cyangwa ikavanayo abantu. Iyo nyubako ifite ubwo burebure ntabwo yabashije kubakwa ariko hari igitekerezo ko icyo gishushanyo mbonera kizubwa i Tokyo mu Buyapani mu 2045. Iyo yubakwa yari gusumba indende ku Isi ifite uburebure bwa metero 830.

4. Cenotaph to Newton , Etienne-Louis Boullee

Igishushanyo cy’iyi nyubako cyakozwe hagendewe ku mahame y’umunyamibare Isaac Newton afite aho ahuriye n’umubumbe. Inzobere mu bishushanyo mbonera, Etienne-Louis Boullee yiyemeje gukora igishushanyo cy’inyubako mu rwego rwo kumwibuka.

Mu 1784 yashushanyije inyubako ya metero 150 isumba katederali ya Strasbourg yari ndende icyo gihe metero umunani. Imbere harimo ubusa n’utwenge duto ducamo izuba.

Nubwo itubatswe ariko yaramamaye bituma igishushanyo cyayo kijyanwa mu isomero ry’igihugu cy’u Bufaransa.

5.Palace of Soviets, Boris Iofan

Iki gishushanyo ni kimwe mu bitarabashije kubakwa ariko cyari kitezweho byinshi. Mu 1931 cyatsinze amarushanwa y’inyubako nziza z’ubuyobozi n’iz’inama i Moscow mu Burusiya. Cyari gifite uburebure bwa metero 416. Icyuma cy’inama kinini cyagombaga kujya cyakira abantu 21 000.

Mu 1939 yari yagerageje kubakwa ariko imisingi yayo isenywa n’intambara ya kabiri y’Isi mu 1941 ntiyongera gusubukurwa. Icyakora aho yari kubakwa mu 1958 hubatswe pisine rusange.

6. Tokyo Olympic Stadium, Zaha Hadid

Iyi stade yari ifite ibintu byose bigezweho, bikurura abantu ariko ikirenze ifite agaciro kanini. Iyi stade yagombaga kwakira imikino olempique ya 2020 n’igikombe cy’Isi cya Rugby mu 2019.

Igiciro cyo kubaka iyi stade cyaje kwiyongera bitewe no kuzamuka kw’ibiciro by’ibikoresho byo kuyubaka, bituma mu mwaka wa 2015 Minisitiri w’intebe Shinzo Abe atangaza ko iki gishushanyo bakiretse kuko ingengo y’imari yo kuyubaka yiyongereyeho miliyari 2.02 z’amadorali.

7. The Hotel Attraction, Antoni Gaudi

Uyu ni umushinga w’umunya-Catalonge, Antoni Gaudi, ushobora kubakwa i Barcelona mu 2030. Inyigo ya mbere yawo yakozwe mu 1908 ifite metero 380 z’uburebure n’ubunini bungana n’ubw’inyubako ya Empire state. Hari abavuga ko aho yari kubakwa i New York ariho hubatswe inyubako ya World Trade Center.

8. The Coney Island Tower, Samuel Friede

Iyi nyubako yagombaga kubakwa i New York yatekerejwe mu 1906, yari kuba ifite amataje menshi atangirwamo serivisi za resitora, icyumba kinini cy’imyidagaduro ku isi n’ibindi. Yashoboraga kwakira abantu ibihumbi 50 igakora amasaha 24/24.

Ikibazo cyatumye iyi nyubako itubakwa ni amafaranga. Friede yigeze no gushaka abashoramo imari ya miliyoni 1.5 z’amadolari bakayagaruzwa ku nyungu ya 100% ku mwaka ariko ntihagira ubikora.

9. Fourth Grace, Will Alsop

Yari yitezweho kuba icyitegererezo mu mujyi wa Liverpool. Yarimo inzu ndangamurage n’ahantu ho gukodesha ngo hakorerwe ubucuruzi.

10. Russia Tower, Foster +Partners

Iyi nyubako ya metero 600 yari kubakwa mu Burusiya, ifite icyumba cyakwakira abantu 25 000. Yari yitezweho kuba igitangaza ku mugabane w’u Burayi ariko nayo yaje gukomwa mu nkokora n’ihungabana ry’ubukungu ku Isi.

11. Nakheel Harbour and Tower, Woods Bagot

Iyi nyubako y’i Dubai na yo yakomwe mu nkokora n’ihungabana ry’ubukungu ku Isi nyuma y’imyaka itandatu itekerejweho. Mu 2009 nibwo uyu mushinga wakuweho.
Byari biteganyijwe ko izubakwa na miliyari 38 z’amadolari.

12. Second World War Memorial, Alfred Easton Poor and Carl Illava

Iyi nyubako yagombaga kubakwa i New York muri Leta Zunze Ubumwe za Amerika, nk’urwibutso rw’intambara ya kabiri y’Isi.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved