Umunezero mu rugendo rwanjye rwa mbere Bruxelles-Kigali mu ndege yanjye, RwandAir

Yanditswe na Karirima A. Ngarambe
Kuya 17 Ukuboza 2017 saa 03:32
Yasuwe :
0 0

Mu bihe bishize ubwo hatangazwaga ko u Rwanda rufite umushinga wo kugura indege nshya zarwo kandi zizatangira gukora ingendo mu bihugu bitandukanye by’Isi nakomeje kugira icyifuzo cyo kuzazigendamo mva i Burayi ngana mu Rwanyibarutse cyangwa nkahagurukira mu rwa Gasabo nerekeza ibwotamasimbi aho ntuye.

Nagize ibihe byo kuganira n’abandi Banyarwanda batandukanye baba abatuye, abakorera n’abiga mu mahanga na bo nsanga duhuje icyifuzo, dutangirana urugendo ruganisha ku kugira inzozi zacu impamo.

Bidatinze Sosiyete Nyarwanda ikora ingendo zo mu kirere, RwandAir, yatangiye kwakira indege nini kandi nshya, ibyishimo bitaha i Rwanda bihereye mu marembo yarwo ku Kibuga cy’Indege Mpuzamahanga cya Kigali giherereye i Kanombe.

Aha nahise ntangira kumva ko ibyo nibazaga bitakiri inzozi ahubwo bishoboka. Mu gihe gito hashyizweho gahunda zitandukanye z’ingendo zizajya zikorwa n’izo ndege haba ku Mugabane wa Afurika ndetse hadaciye kabiri bagura n’icyerekezo i Burayi.

Njye nk’umunyamakuru nagize amahirwe yo gukora ibiganiro na bamwe mu bayobozi ba RwandAir ubwo bari mu Budage mu ngendo z’akazi, barantumira ngo nzagende mu bambere bazaganura ku rugendo rushya rwari kuva mu Bwongereza rwerekeza mu Rwanda ngo nihere amaso ibyo bari banganirije gusa ntibyakunze kuko byahuriranye na gahunda y’akazi kihutirwa. Natangiye gukubita agatoki ku kandi mvuga nti “Ni ay’ubusa umunsi umwe nzakabya inzozi zanjye.”

Mu mpera za Ugushyingo 2017 nibwo nafashe icyemezo cyo gukatisha itike ya RwandAir ngo nyigendemo mve mu Burayi, njye iwacu mu ndege y’u Rwanda, igihugu cyanjye.

Nkimara kubona itike, natangiye kubara iminsi ariko nkabona itava aho iri ngo igihe kigere nurire rutemikirere yerekeza mu rw’Imisozi 1000.

Nyuma y’iminsi myinshi n’amanywa maremare, ijoro rya tariki ya 14 Ukuboza 2017 ryambereye umunezero usendereye kuko inzozi zanjye zari zimpaye ibyo nifuzaga.

Bruxelles-Kigali, urugendo rwuje ituze n’umunezero

Muri uru rugendo nagiye nitegereza akantu kose kuva aho mutangira ibikapu kugera aho mwinjirira mu ndege ngo ndebe uko byose bikorwa kuko kuri njye byasaga nk’urugendo rwa mbere kandi maze imyaka 20 ngenda mu ndege. Urwo rugendo rwose kuva utanze ibikapu kugera ku ndege ni iminota iri hagati ya 10 na 15.

Twari Abanyarwanda benshi bisa nkaho tugiye gutega bus twerekeza ahabereye umunsi uhuriza hamwe Abanyarwanda baba mu mahanga n’inshuti zabo “Rwanda Day”, ariko siko byari bimeze kuko twari tugiye muri RwandAir tugana i Rwanda.

Isaha yo kwinjira mu ndege yarageze, ninjira nk’ujya mu rugo, twasanganiwe ku muryango n’itsinda ry’abasore n’inkumi bagera kuri bane, buri wese aguha ikaze akwereka aho wicara n’inseko ya gipfura.

Ibi byatumye nibeshya ko tugiye kugenda mu ndege turi Abanyarwanda gusa, ariko nkigera imbere nabonyemo abazungu bakomoka i Burayi biganjemo abavuye mu Bwongereza bagiye hirya no hino ku Isi baciye i Kigali guhindurirayo indege. Nicinye icyara nti “RwandAir yerekeza mu byerekezo 24 ni byiza ko ikomeza kwamamara, amahanga yose akayiyoboka.”

Maze kubona nimero y’icyicaro cyanjye umukobwa twicaranye namubwiye nti “Wiriwe”, aransubiza ati “Ndi uwo muri Nigeria”. Nahise ngabanya Igifaransa n’Ikinyarwanda ndamusekera nti “Welcome to Rwanda.”

Nyuma y’iminota mike baduhaye ikaze mu Kinyarwanda, Icyongereza n’Igifaransa mbere yo guhaguruka, ariko umukobwa wavugaga mu Kinyarwanda yarihutaga kuko numvaga nshaka gukomeza kumwumva.

Tumaze gufata ikirere ubwo twizirikura imikandara, ntangira kugenda ndambura amaguru nganira mu rurimi gakondo n’Abanyarwanda benshi bari baturutse mu Bwongereza, mu Bubiligi bagana mu Rwanda mu Nama y’Igihugu y’Umushyikirano n’abandi baje mu biruhuko.

Mu rugendo icyo natekereje ni uko ndi mu ndege yanjye, y’igihugu cyanjye nsa nkaho naguze. Ndavuga nti “Nkiri muto nifuzaga kugura imodoka, nza kubigeraho none mfite n’indege nkesha igihugu cyanjye.”

Muri uru rugendo rw’ubudasa rwanjye muri RwandAir iva Bruxelles-Kigali twahagurutse saa tatu z’ijoro tugera mu Rwanda saa moya za mu gitondo.
Abanyakiriye bose babikoranye umutima wa gipfura kandi bagaragaza akanyamuneza buri uko bakugannye bakuzaniye amafunguro, ikinyobwa, n’Ikawa ndetse biba akarusho ubwo nakandagizaga ikirenge mu gihugu cyanjye.

Urwo nirwo rugendo rwanjye rwa mbere mu ndege yanjye ya RwandAir iva Bruxelles yerekeza mu Mujyi wa Kigali.

Abagenzi biganjemo Abanyarwanda bategereje kohereza imizigo yabo mbere yo kujya mu ndege ya RwandAir
Mbere yo kujya mu ndege ya RwandAir twabanje twica inyota tunezererewe gufata urugendo
Abari mu ndege berekwa aho igeze, igihe mwakoresheje n'icyo muri buhagerere
Byerekanwa mu ndimi nyinshi
Imbere mu ndege haragutse
RwandAir ifite intebe ushobora kwegura cyangwa ukaryamisha ukaruhuka
Nazanye n'Abanyarwanda baje kwitabira Inama y'Igihugu y'Umushyikirano
Bwakeye turi mu kirere
Tugeze ku Kibuga cy'Indege i Kanombe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza