Kwamamaza

Uko umuhango wo Kwita Izina ingagi wagenze (Amafoto)

Yanditswe kuya 2-09-2016 saa 10:19' na Philbert Hagengimana


Birasanzwe mu muco nyarwanda ko umwana uvutse Umuryango n’inshuti zawo baterana bakamwita Izina. Umuhango nk’uwo, ni wo wakoranyirije imbaga y’Abanyarwanda n’inshuti z’u Rwanda ngo bite amazina abana b’Ingagi 22 bavutse nyuma y’Itariki ya 5 Nzeli 2015.

Tariki ya 2 Nzeli 2016, ni umunsi umaze igihe witegurwa nk’udasanzwe n’ubwo ari ngarukamwaka, uberaho Umuhango wo Kwita Izina abana b’ingagi. Uyu munsi uzajya uba buri wa Gatanu wa mbere w’Ukwezi kwa Nzeli buri mwaka.

Uyu muhango kuri iyi nshuro uri kubera mu Murenge wa Kinigi mu Ibanga ry’Imisozi y’Ibirunga, aho imbaga y’abanyarwanda, ba Mukerarugendo, abahagarariye ibihugu byabo mu Rwanda bateraniye.

Umukuru w’Igihugu, Perezida Paul Kagame niwe mushyitsi mukuru muri uyu muhango aho byitezwe ko ageza ku bawitabiriye n’abaturage muri rusange impanuro zijyanye no kubungabunga ibidukikije n’akamaro k’ubukerarugendo.

- Haritwa amazina abana 22 bo mu miryango 12 y’Ingagi. Ubu mu Rwanda habarurwa by’agateganyo ingagi zigera kuri 650 ariko ubushakshatsi bukaba bugikomeje, ku buryo mu mwaka wa 2017 hazatangazwa umubare nyakuri w’Ingazi zo mu Birunga u Rwanda rufite.

- Ahagana saa tanu zuzuye nibwo Perezida Kagame yageze mu Kinigi ahateraniye ibihumbi by’abaturage na ba mukerarugendo baturutse impande n’impande bitabiriye umuhango wo Kwita Izina.


- Guverineri Bosenibamwe yagejeje ijambo ry’ikaze ku bitabiriye uwo muhango, aho yashimiye Perezida wa Repubulika kubera ibyo yari yarasezeranyije abaturage b’Intara y’Amajyaruguru muri rusange, byose byamaze kuboneka, n’ibisigaye biri mu mirimo yo gusozwa. Yavuze ko Umuhango wo Kwita Izina wagize uruhare runini mu bijyanye no kubungabunga ibinyabuzima cyane cyane ingagi.

- Ingagi ya Mbere yiswe "Umuhate" ni iyo mu Muryango wa Sabyinyo, indi yitwa Icyemezo. Mu muryango witwa Nezerwa harimo iyiswe Mafubo. Umukerarugendo Mary Ann yise ingagi izina "Ntamupaka"

- Indi yiswe ni iyo mu muryango “Icyemezo” yahawe izina “Ireme”, indi biva mu muryango umwe yitwa “Ifatizo”. Mu zindi ziswe harimo iyahawe izina “Kwigira” na “Umuhuza”.

-  Indi ngagi muru 22 zigomba kwitwa yahawe izina rya “Kura”, indi “Nyampinga”, naho Umuhanzi Muyango yise ingagi izina "Ishimwe".

-  Andi mazina y’ingagi ziswe ni "Tunganirwa", "Ingemwe", "Umwiza","Ndizihiwe", "Ndumunyarwanda", "Mashami", "Igikombe (Award)", "Ukwiyunga", "Hobe","Incungu".
-  Umuyobozi wa RDB, Gatare Francis, yavuze ko kubungabunga ibinyabuzima bigezweho mu Rwanda mu gihe ahandi ku Isi bahangayikishijwe n’iyangirika ry’Ibidukikije, ku buryo byazagira ingaruka mu mibereho ya muntu ejo hazaza.

Ingamba u Rwanda rwafashe ni ukongera imbaraga mu kubungabunga ibidukikije no kubungabunga urusobe rw’ibinyabuzima. Ati ‘Ibyo bifite akamaro ku buzima, bikagira n’akamaro ku bukungu bw’Igihugu cyacubiciye mu Bukerarugendo.’

‘Ntitwakwita abana b’Ingagi mu byishimo, ngo twibagirwe n’ibindi mu zindi Pariki, aho ubu Pariki y’Akagera imaze gusubizwamo inyamaswa zose, ndetse Intare ziheruka gushyirwamo ubu zikubye kabiri. Bitarenze uyu mwaka kandi n’Inkura zizaba zamaze gushyirwamo.’

- Mu bise ingagi amazina harimo: Amb. Michael Ryan uhagarariye Umuryango w’Ubumwe bw’u Burayi mu Rwanda; Mary- Ann Macdonald umufotozi wo muri Amerika umaze gusura ingagi zo mu Rwanda inshuro zigera ku 100.

Barimo kandi Frank Matsaert uyobora Ikigo Trademark East Africa; Umuyobozi wa Banki ya Kigali, Diane Ngendo Karusisi; Jaques Rusirare uyobora Ameki Color; Cyizere Rukundo Fidence, Umunyeshuri watsinze neza ikizamini cya leta gisoza amashuri yisimbuye mu 2015 akaba yarize amasomo ajyanye na siyansi. Harimo kandi Niyonkuru Donatha wahize abandi mu bijyanye n’indimi mu barangije amashuri yisumbuye mu 2015.

Ubutumwa bwa Perezida Kagame

Mu ijambo Umukuru w’Igihugu yagejeje ku bari bitabiriye uyu muhango yibukije akamaro ko kubungabunga urusobe rw’ibinyabuzima n’ibidukikije muri rusange, kuko iyo bifashwe neza bituma n’ubuzima bwa muntu bumererwa neza.

Yibukije ko kubungabunga ibidukikije bifitanye isano n’ibindi byinshi bidasigana.

Ati “Ntabwo hari ugutoranya hagati y’iterambere ry’ubukungu no kurinda ibidukikije no kugira ngo abantu babeho neza. Ntabwo utoranya kimwe ngo ikindi ugisige kuko ntabwo bigongana ahubwo biruzuzanya.”

Abitabiriye umuhango wo kwita izina ngo bakwiye kwibuka ko hari n’izindi nshingano basabwa kubahiriza.

Ati “Duhurira mu cyatuzanye hano uyu munsi muri uyu muhango ntabwo ari ukwita izina gusa, harimo no kwibuka ibyo byose kugira ngo amajyambere yacu ashingire ku kwifata neza. Gufata neza iby’u Rwanda byose birimo umurage w’u Rwanda harimo ingagi, izindi nyamaswa, harimo amashyamba, harimo ibintu byinshi. Iyo bifashwe neza iyo bigize ubuzima bwiza Abanyarwanda nabo babaho neza.”

Yashimye igikorwa cyakozwe cyo kongera ibyo ba mukerarugendo basura birimo intare zazanywe muri Pariki y’Akagera.

Umukuru w’Igihugu yavuze ko ibyo u Rwanda rwagezeho bishimishije, gusa ngo nta gitangaza kirimo kuko bifite isoko.

Ati “N’aho tugeze harashimishije, ni nayo mpamvu ibikorwa nk’ibi bishoboka, bishoboka kubera ko intambwe tumaze gutera itanga icyizere. Itanga kumva ko n’ibindi biri imbere nabyo dushobora kubigeraho dukomeje gukora neza nkuko twabigenje tujya kugera no kuri ibi tumaze kugeraho.”

Yasabye abaturage batuye mu Karere ka Musanze kubungabunga ibidukikije birimo ingagi, kuko bagerwaho n’inyungu zabyo.

Ati “Baturage ba Musanze rero kuba turi hano n’aya mahirwe y’uko ari izi ngagi ndetse n’ibyo tuvanamo byongera ku mutungo w’igihugu, byose ni amajyambere namwe mugomba kugiramo uruhare rwo gufata neza izi ngagi amashyamba zituyemo noneho tukabona ba mukerarugendo benshi.”

Yavuze ko hakwiye ubufatanye bw’inzego za leta abikorera n’abandi kugirango ibyiza u Rwanda rufite bigera kuri benshi, kuko uko ingagi ziyongera, ari ko ubuzima bwiyongera n’umutungo w’ibivamo ukiyongera.

Yasoje asaba Abanyamusanze gukomeza gukora cyane, abashimira umuco mwiza bafite wo kumvira, abasaba kuwukomerezaho ndetse abasezeranya ko atazahwema kubasura.

Indi nkuru wasoma: Perezida Kagame yakomoje ku kwita Intare zo mu Akagera amazina

Andi mafoto

Hakozwe ishusho imeze nk'ingagi
Abaturage babukereye ari benshi bitwaje n'amabendera y'Igihugu
Abaturage ba Musanze bategerezanyije ubwuzu Perezida wa Repubulika Paul Kagame
Abitabiriye Umuhango wo Kwita Izina barazimanirwa Kawa cyangwa Icyayi by'u Rwanda
Abanyamaukuru baturutse impande zose z'isi babukereye
Rafiki [Coga Style] mu bahanzi baza gususurutsa abitabiriye uyu muhango

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved