Ubushobozi bwo kwitunga bwa Pariki y’Akagera bwaragabanyutse cyane kubera Covid-19

Yanditswe na Uwimana Abraham
Kuya 11 Gashyantare 2021 saa 10:26
Yasuwe :
0 0

Pariki y’Igihugu y’Akagera yatangaje ko mu mwaka wa 2020 abayisura bagabanutseho 68% n’ubushobozi bwo kwitunga kwa pariki bukagabanyuka bitewe n’icyorezo cya COVID-19 cyagize ingaruka ku bikorwa bitandukanye birimo n’ubukerarugendo.

Imibare yatangajwe n’iyi Pariki igaragaza ko mu 2019 yasuwe n’abakerarugendo barenga 50 000, mu gihe mu 2020 yasuwe n’abagera ku 15 844 gusa, ni ukuvuga ko bagabanutseho 68%.

Ushinzwe Ubukerarugendo n’Imenyekanishabikorwa muri Pariki y’Igihugu y’Akagera, Karinganire Jean Paul yabwiye IGIHE ko kimwe n’izindi nzego zose, urwego rw’ubukerarugendo narwo rwagizweho ingaruka cyane n’icyorezo cya COVID-19, bikaba byaratumye amafaranga ava mu bukerarugendo yinjizwaga na pariki y’Akagera agabanuka cyane.

Yagize ati “Ugereranyije ukwezi na Mutarama 2020 n’ukwezi kwa Mutarama 2021, harimo ikinyuranyo kinini cyane cy’igabanuka, bitewe na none n’uko abakerarugendo batakigenda nk’uko bagendaga COVID itaraza n’ubundi haracyariho COVID-19, ibihugu byinshi byo mu Burayi byashyizeho Guma mu rugo, abaturage babyo ntabwo babasha gutembera nk’uko batemberaga.”

Kuva muri Werurwe 2020 COVID-19 igeze mu Rwanda, ibikorwa by’ubukerarugendo byahise bihagarikwa, byongera gusubukurwa muri Kamena ubwo abantu bari bavuye muri Guma mu rugo.

Karinganire yavuze ko n’ubwo ibikorwa by’ubukerarugendo byongeye gufungura, hakiri ikibazo cy’uko ibintu bitarasubira mu buryo, kuko ahenshi hakiri ingamba zo kwirinda zituma bidashoboka ko baza mu gihugu ku mpamvu z’ubukerarugendo.

Yagize ati “Ingaruka za COVID-19 n’ubundi ziracyariho uko ibihugu biracyafunze, n’ubwo ubukerarugendo bufunguye. Abanyarwanda baraza, abanyamahanga batuye mu Rwanda baraza, ariko abanyamahanga bava mu mahanga bazanywe n’ubukerarugendo baragabanutse n’ubundi kubera Coronavirus.”

Yakomeje avuga ko mu mibare y’abantu nta gihinduka cyane, ariko amafaranga ya pariki ava mu bukerarugendo ngo yo ariyongera, kuko nk’ayinjiye muri Mutarama uyu mwaka aruta ayinjiye muri Kamena na Nyakanga ndetse na Kamena 2020, mu gihe mu Ukuboza ari bwo hinjiye menshi kuko mu Rwanda hari hafunguye n’abantu bashobora gutembera bisanzwe.

Pariki y’Akagera mu Ukuboza yinjije arenga miliyoni 120 Frw, mu gihe muri Mutarama yinjije arenga miliyoni 100 Frw.

Karinganire yavuze ko ingaruka za COVID-19 kuri Pariki y’Akagera ari nyinshi cyane, kuko nk’umwaka wa 2019 yabashaga kwibonamo ubushobozi bungana na 90% ikaba yari ifite intego yo kugera ku kigero cya 100% ariko bigakomwa mu nkokora n’icyorezo, kuko kuri ubu ngo byasubiye inyuma bari ku kigero cya 34% gusa.

Yavuze ko mu rwego rwo kurushaho guhangana n’izi ngaruka zatewe n’icyorezo bashyizeho poromosiyo ku Banyarwanda n’abandi banyamahanga baba mu Rwanda bifuza gusura pariki y’Akagera, aho bagabanyirijwe ibiciro byo kurara mu macumbi (lodge) agenzurwa n’iyi pariki ari yo ya Ruzizi na Karenge.

Kuri ubu ngo kurara muri rimwe muri ayo macumbi kuva ku ijoro rimwe kugera kuri atatu, ni 100 $, mu gihe ngo mu bindi bihe byari 199 $.

N’ubwo iyi pariki yahuye n’ibizazane mu mwaka ushize, yabashije kugira umwanya wo kunoza uburyo bwo kurushaho kwita ku nyamaswa ziri muri iyo pariki.

Mu mwaka ushize inzovu eshanu n’intare zambitswe utwuma dupima amerekezo (GPS), ndetse n’inkura icyenda zashyizwemo “transmitters”, ibyo byose ni mu rwego rwo kumenya aho izo nyamaswa ziherereye ndetse n’uko zimeze mu rwego rwo kurushaho kuzitaho.

Mu mwaka ushize kandi muri iyi pariki hagaragaye ubwoko bushya bw’inyoni bwa “Flamingo”, Karinganire yavuze ko ari amahirwe bagize kuko ari zimwe mu nyoni ubundi zidakunda kuboneka.

Ati “Ni ubwoko bw’inyoni buba budakunze kuhaza, izi rero flamingo ni imwe mu nyoni zidakunze kuba mu Akagera, iyo yaje iba yavuye nko muri Tanzania, iyo zibonetse biba ari amahirwe cyane, hari n’izo tuba dufata ko zanarangiye, kuzibona rero ni amahirwe.”

Pariki y’Igihugu y’Akagera ni imwe mu zujuje inyamaswa zisurwa cyane kuri uyu mugabane, nyuma yo gusubizwamo Inkura n’Intare zari zarahacitse kubera ibikorwa bya muntu. Ubu iyi pariki ibarizwamo inyamaswa zikomeye muri Afurika arizo Intare, Inzovu, Imbogo, Inkura n’Ingwe.

Abasuye Pariki y'Igihugu y'Akagera bagabanutseho 68%
COVID-19 yagize ingaruka nyinshi ku bikorwa byo gusura Pariki y'Akagera
Ubushobozi bwo kwitunga bwa Pariki y’Akagera bwarakonkobotse, bwavuye kuri 90% bugera kuri 34%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .