00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwungutse izindi hoteli eshatu z’inyenyeri eshanu (Amafoto)

Yanditswe na Ishimwe Israel
Kuya 22 Gicurasi 2021 saa 07:30
Yasuwe :
0 0

One & Only Gorilla’s Nest, Singita Kwitonda Lodge and Kataza House zo mu Karere ka Musanze na The Retreat & Heaven Boutique Hotel yo mu Mujyi wa Kigali zahawe inyenyeri eshanu bituma umubare wa hoteli ziri kuri uru rwego mu Rwanda ziba umunani.

Mu myaka irindwi ishize u Rwanda rwari rufite hoteli imwe y’inyenyeri eshanu, ubu zigeze ku munani nyuma y’eshatu nshya zasanze izirimo Bisate Lodge, One & Only Nyungwe House, Radisson Blu Hotel, Kigali Serena Hotel na Kigali Marriot Hotel.

Inyenyeri za hoteli zitangwa n’Urwego rw’Igihugu rw’Iterambere (RDB) rushingiye ku bipimo bizigenga muri Afurika y’Uburasirazuba (EAC), bizifasha guhangana no ku ruhando mpuzamahanga.

Muri iki gikorwa ngarukamwaka hagenzurwa hoteli, apartements, restaurants n’izindi nyubako zakira abakerarugendo, harebwa ko zujuje ibisabwa hanyuma zigahabwa inyenyeri kuva kuri imwe kugera kuri eshanu.

Gutanga inyenyeri hashingirwa ku birimo serivisi zitanga, aho ziherereye, imyubakire yazo, amatara azirimo, amarangi asizemo, isuku yazo, ubushobozi bwo kwakira abantu, amasaha zikora n’ibindi hagendewe ku mabwiriza ahuriweho na EAC.

Ibirori byo gutanga izi nyenyeri ku nshuro ya kane byabereye muri Serena Hotel ku wa 21 Gicurasi 2021. Ni ubwa mbere byakozwe kuva Icyorezo cya COVID-19 cyibasiye Isi n’u Rwanda by’umwihariko kuko ibiheruka byabaye mu Ugushyingo 2019.

Muri uyu mwaka, muri hoteli 31 zagenzuwe eshatu zahawe inyenyeri eshanu ari zo One & Only Gorilla’s Nest, Singita Kwitonda Lodge and Kataza House na The Retreat & Heaven Boutique Hotel. Izahawe inyenyeri enye ni Phoenix Plaza na Kivu Marina Bay y’i Rusizi.

Hoteli zahawe inyenyeri eshatu ni zirindwi zirimo Altis Apartments, Mythos Boutique Hotel (Kiyovu) na Ste Famille Hotel. Izashyizwe ku rwego rw’inyenyeri ebyiri ni 18 zirimo Vive Hotel and Apartments (Rusizi), Okapi Hotel (Kigali) na 5 Swiss Hotel (Kiyovu). Munini Hill Motel y’i Rusizi ni yo yahawe inyenyeri imwe.

One & Only Gorilla’s Nest na Singita Kwitonda Lodge and Kataza House zafunguwe mu 2019. Ziyongereye kuri Bisate Lodge iheruka guhabwa inyenyeri eshanu mu myaka ibiri ishize, bituma Akarere ka Musanze gakungahaye ku bukerarugendo bushingiye ku ngagi zo mu Birunga kagira eshatu ziri ku rwego rwo hejuru.

One&Only Gorilla’s Nest ni hoteli y’akataraboneka iherereye mu Kinigi mu nzira igana mu Birunga. Ifite ibyumba 14 bigezweho n’inzu zirindwi buri imwe iri ukwayo.

Yubatswe mu biti mo hagati ku buryo buri nzu iteretse ku byuma bishinze, aho nibura bibarwa ko imwe yatwaye miliyoni 1$ ngo yubakwe. Zitatse mu buryo bwa Kinyarwanda hakoreshejwe imigongo n’ibindi bikoresho by’ubugeni. Izi nyubako kandi zigizwe n’igice kinini cy’ibirahuri ku buryo umuntu yitegereza ibyiza bimukikije.

Inzu za One & Only Gorilla’s Nest zubatse mu buryo zihagaze ku byuma bishinze mu butaka
One&Only Gorilla’s Nest, ni imwe muri hoteli zifite inyenyeri eshanu zibarizwa muri Musanze
Ifite ibyangombwa nkenerwa kandi bigezweho, biri ku rwego mpuzamahanga
Iyi nyubako yagenewe ubwogero bufasha benshi kuruhuka boga
Hoteli iri hagati mu ishyamba ry'inturusu

Singita Kwitonda Lodge and Kataza House na yo igizwe n’inyubako zigezweho zubatse i Musanze hafi y’Ikirunga cya Sabyinyo, aho uba unitegeye ibirunga bya Gahinga na Muhabura.

Yubatswe ahantu hahoze igishanga cyari urwuri, igizwe n’inzu umunani zubatswe mu buryo zirengera ibidukikije. Muri zo zirindwi zagenewe umuntu umwe cyangwa uherekejwe kuko buri imwe ifite uburiri bumwe, uruganiriro n’ibindi byangombwa nkenerwa, hakaba indi imwe yiswe Kataza House yo igizwe n’ibyumba bine byo kuraramo.

Singita Lodge yubatse neza munsi y'Ikirunga cya Sabyinyo
Iyo uri muri Singita uba witegeye ibirunga
Iyi nyubako iri ahahoze urwuri, ubu ni umushinga w'ubukerarugendo

-  The Retreat & Heaven Boutique Hotel yazamutseho inyenyeri imwe!

Iyi hoteli yubatse mu Kiyovu muri Kigali yatangiye gukora mu 2018, mu mwaka wakurikiyeho ihabwa inyenyeri enye. Yatangiye ifite ibyumba 12 ariko iza kubyagura biba 20. Bitewe no kunoza ibyo ikora yasabye ko yakongera kugenzurwa ndetse muri uyu mwaka yongerewe inyenyeri, ihabwa eshanu.

Umuyobozi wa The Retreat & Heaven Boutique Hotel, Alissa Heaven, yabwiye IGIHE ko ari iby’agaciro cyane nk’umuntu umaze imyaka 15 akorera mu Rwanda.

Ati “Natangije restaurant mu 2008, icyo gihe twatangaga ubumenyi mu kwakira abantu, kandi bakunze amafunguro yacu. Twarakuze ndetse ubu navuga ko dufite inararibonye. Twashoye imbaraga kandi turabona umusaruro.’’

Iyi hoteli iherereye mu Kiyovu mu Mujyi wa Kigali

Umuyobozi wa Munini Hill Motel unafite Vive Hotel and Apartments i Kamembe mu Karere ka Rusizi, Twizeyimana Vincent, yavuze ko inyenyeri zerekana aho umuntu ahagaze.

Ati “Kuba twahawe inyenyeri ebyiri byadushimishije. Turifuza kuzamura urwego tukabona izindi nyenyeri. Muri ibi bihe kuba imipaka ifunze ntibihagaze neza kuko abakiliya benshi bava Congo.’’

Yasabye Leta gutekereza uko yafasha kurekura urujya n’uruza rw’abantu ariko hubahirizwa amabwiriza ya COVID-19 kugira ngo n’ishoramari rikomeze.

Igikorwa cyo guha hoteli inyenyeri byerekana urwego rwa serivisi zigomba gutangwa n’inzira yo gukomeza guteza imbere ubukerarugendo bw’u Rwanda.

Minisitiri w’Ubucuruzi n’Inganda, Habyarimana Béata, yavuze ko guha imbaraga urwego rw’amahoteli bizafasha kongera serivisi nziza.

Yagize ati “Tugomba guharanira ko dutanga serivisi nk’iz’ahandi haba mu Karere no ku rwego mpuzamahanga. Kugira hoteli ziri ku rwego rwo hejuru no hanze ya Kigali ni ingenzi cyane. Inyenyeri twahawe uyu munsi zikwiye kuba intambwe ya mbere yo kwimakaza serivisi nziza. Turabishimira kandi tubakomeyeho. Uruhare rwanyu muri sosiyete ni ingenzi cyane.’’

Bitewe n’ingaruka za Coronavirus, hoteli zahawe 35% y’inguzanyo yashyizwe mu Kigega Nzahurabukungu.

Umuyobozi Mukuru w’Urwego rw’Igihugu rw’Iterambere (RDB), Clare Akamanzi, yavuze ko nubwo Coronavirus yajegeje urwego rw’ubukerarugendo, igikorwa cyo gutanga inyenyeri cyerekana ko rutera imbere.

Ati “Mu 2019, ubukerarugendo bwinjije miliyoni 500$, byerekana ko uru rwego rwazamutse cyane kandi ruri ku isonga mu gutanga inkunga nini mu bukungu bwacu. Ubukerarugendo bwari urwego rukomeye ubwo icyorezo cyibasiraga Isi.’’

Akamanzi yavuze ko hari ibyo Leta yakoze mu kuzahura ubukungu aho hashyizweho Ikigega Nzahurabukungu cya miliyari 100, nibura 50 zigenerwa amahoteli.

Yakomeje ati “Twakuyeho umusoro ku bikoresho by’ubwubatsi byinjizwa mu gihugu. Dukeneye kuguma gutanga serivisi nziza zikurura abashyitsi. Twibuke ko abaturage 5% ari bo bakingiwe, ntidukwiye kwirara. Nituva muri COVID-19 tuzabe twiteguye.’’

Yagaragaje ko hari imishinga myinshi irimo iy’ibikorwa remezo, inama zitandukanye ihanzwe amaso kandi abakora mu rwego rw’amahoteli bakwiye kwitegura kuyibyaza umusaruro.

Muri Gahunda yo kwihutisha Iterambere (NST1), u Rwanda rwiyemeje gukuba inyungu iva mu bukerarugendo ikarenga miliyoni $800 mu 2024.

Kuva itegeko ry’ubukerarugendo ryo mu 2014 ryatangira gushyirwa mu bikorwa hamaze gutangwa inyenyeri ku nyubako 177 mu gihugu hose.

Urutonde rwa hotel zose zahawe inyenyeri

Hotel zahawe inyenyeri imwe

1. Munini Hill Motel (Rusizi)

Hotel zahawe inyenyeri ebyiri

1. Rubavu Hakuna Matata (Rubavu)

2. Vive Hotel and Appartments (Rusizi)

3. Regina Pacis Center

4. The Nest Kigali (Kimihurura)

5. Pepon Living Space (Kimihurura)

6. Okapi Hotel
7. Mattina Motel
8. Infinity Center Gatsibo
9. Desir Resort Hotel (Gasabo)
10. Chris Hotel (Runda y’i Kamonyi)

11. Centre d’Accueil Saint Augustin (Rwamagana)
12. Centre d’Accueil Saint Francois Xavier (Rubavu)

13. Centre d’Accueil Notre Dame de Kibeho

14. Centre Bethel (Karongi)

15. Carrefour Hotel (Rusizi)
16. 5 Swiss Hotel (Kiyovu-Kigali)
17. Le Royale Apartments (Nyarutarama)
18. Inzu Lodge (Rubavu)

Hotel zahawe inyenyeri eshatu

1. Altis Apartments
2. Cormoran Lodge (Karongi)
3. Mythos Boutique Hotel (Kiyovu)
4. Kim Hotel (Kimihurura)
5. Ste Famille Hotel
6. Ingagi Park View Lodge
7. Ecoair Apartments Hotel

Hotel zahawe inyenyeri enye

1. Phoenix Plaza
2. Kivu Marina Bay (Rusizi)

Hotel zahawe inyenyeri eshanu

1. One and only Gorilla Nest (Musanze)
2. The Retreat Boutique Hotel (Kiyovu)
3. Singita Kwitonda Lodge and Kataza House (Musanze)

Altis Apartments yashyizwe ku rwego rw'inyenyeri eshatu
Umuyobozi wa Munini Hill Motel unafite Vive Hotel and Apartments i Kamembe mu Karere ka Rusizi, Twizeyimana Vincent, yahawe icyemezo cy'ishimwe
Umuyobozi w'Ishami ry'Amabwiriza agenga Ubukerarugendo muri RDB, Nsabimana Emmanuel, yavuze ko gushyira amahoteli mu byiciro bifasha mu rugendo rwo kwitegura gukomeza kunoza imikorere myiza no mu gihe COVID-19 izaba icogoye
Umuyobozi wa Rwanda Convention Bureau, Nelly Mukazayire, mu bitabiriye iki gikorwa
Ibi birori byabereye muri Kigali Serena Hotel
Umuyobozi ushinzwe Ubukerarugendo muri RDB, Belise Kaliza, yavuze ko gutanga inyenyeri ari ikimenyetso gihamya urugendo rwo gushyigikira urwego rw’ubukerarugendo
Umuyobozi wa The Retreat & Heaven Boutique Hotel, Alissa Heaven, yishimiye guhabwa inyenyeri eshanu. Yafashe ifoto y'urwibutso ari kumwe n'Umuyobozi Mukuru w’Urwego rw’Igihugu rw’Iterambere (RDB), Clare Akamanzi (ibumoso) na Minisitiri w’Ubucuruzi n’Inganda, Habyarimana Béata
Umuyobozi Mukuru w’Urwego rw’Igihugu rw’Iterambere (RDB), Clare Akamanzi, yasobanuye ko ibikorwa byinshi byahagaze muri Guma mu Rugo mu 2020, ariko igihugu gikomeza kugerageza guhangana n’ubwandu bwa COVID-19
Clare Akamanzi yasabye abanyamahoteli kwitegura kubyaza umusaruro amahirwe ari mu bukerarugendo
Minisitiri w’Ubucuruzi n’Inganda, Habyarimana Béata, yavuze ko guha imbaraga urwego rw’amahoteli bizafasha kongera serivisi nziza
Byitabiriwe n'abantu batandukanye bakora muri serivisi zijyanye n'ubukerarugendo
Umuhanzikazi Alyn Sano yasusurukije abitabiriye iki gikorwa

Amafoto ya IGIHE: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .