00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugiye kwizihiza Icyumweru cyahariwe Ubukerarugendo (Amafoto)

Yanditswe na Ishimwe Israel
Kuya 11 Ugushyingo 2021 saa 07:22
Yasuwe :
0 0

Ishami ry’Ubukerarugendo mu Rugaga rw’Abikorera mu Rwanda, PSF, ryateguye Icyumweru cyahariwe Ubukerarugendo kigamije kwerekana umuhate washyizwe mu guhangana n’ingaruka uru rwego rwatewe na COVID-19.

Iki gikorwa kizaba ku wa 24-27 Ugushyingo 2021; biteganyijwe ko kizahuriramo abantu batandukanye bo mu rwego rw’ubukerarugendo baturutse mu bice bitandukanye by’Isi.

Ubukerarugendo bwahawe umwihariko kubera uko rwahungabanyijwe na Covid-19 ndetse bigaragarira mu mibare y’ibyo igihugu cyinjije.

Nko mu mwaka ushize, u Rwanda rwinjiye miliyoni 121$ aturutse mu bukerarugendo, ni make ugereranyije na miliyoni 498$ yari yabonetse mu 2019. Iyo hatabaho Covid-19, igihugu cyari cyarihaye intego yo kwinjiza miliyoni 600$ mu 2021.

Abasura igihugu na bo baragabanutse kubera iki cyorezo kuko hagati ya Mutarama na Nzeri uyu mwaka, abari bamaze gusura u Rwanda bari ibihumbi 246 mu gihe mu 2019 bari 1.059.612.

Umuyobozi mu Ishami ry’Ubukerarugendo mu Rugaga rw’Abikorera, Frank Gisha Mugisha, yavuze ko icyumweru cyahariwe Ubukerarugendo kiri mu mujyo wo kuzahura uru rwego nyuma yo gushegeshwa na COVID-19.

Yagize ati “Ni uburyo bwo kugaruka no kongera kunoza imikoranire. Tuzagira ibihe bizamara icyumweru tuganira n’abafatanyabikorwa batandukanye. Iki cyumweru turi kukibona nk’uburyo buzafasha kongera kuzahuka ku ngaruka za COVID-19 no kwerekana ko tugomba gushyiraho uburyo bw’imikoranire.’’

Icyumweru cy’Ubukerarugendo kandi kizanahurirana n’Umunsi Nyafurika w’Ubukerarugendo, Africa Tourism Day.

Iki gikorwa kizabera muri Kigali Serena Hotel, biteganyijwe ko kizitabirwa n’abamurika 100 baturutse mu mfuruka zose z’Isi.

Ubwo hamurikwaga ku mugaragaro igikorwa cyo gutangiza iki Cyumweru cy’Ubukerarugendo, Umuhuzabikorwa w’Ihuriro ry’Ubukerarugendo mu Karere ka Afurika y’Iburasirazuba, Yves Ngenzi, yavuze ko ari ingenzi guhuza urwego rw’abikorera n’izindi.

Ibihugu bya EAC byahombye agera kuri 92% y’ayo byinjizaga bivuye mu bukerarugendo. Umubare w’abakerarugendo binjira mu Karere bavuye kuri miliyoni 6,98 bagera kuri miliyoni 2,25 nyuma ya COVID-19.

Yavuze ko ibi byatumye hari abatakaza akazi kubera COVID-19 ariko ubu hari amahirwe yo kongera kwisuganya.

Ati “U Rwanda rwafunguye ubukerarugendo muri Kanama 2020 ariko ntabwo ba mukerarugendo bo ku rwego mpuzamahanga baragaruka ku bwinshi. Tuzafasha gushishikariza ibindi bihugu bizitabire iyi nama. Ubukerarugendo buri kugaruka. igikorwa nk’iki ni ingenzi kuko gifasha Akarere ndetse n’abafatanyabikorwa mpuzamahanga.’’

Yasobanuye ko hari ingamba zashyizweho zorohereza ibihugu bya EAC kuzahuka ku ngaruka za COVID-19 binyuze mu gushyiraho uburyo bworohereza ababigenda.

Mu byakozwe harimo itangizwa rya gahunda ya “Tembea Nyumbani” ifasha ba mukerarugendo gutemberera mu bindi bihugu ndetse no koroshya uburyo bwo kwipimisha ku bagenzi bava mu gihugu bajya mu kindi bakaba bafata igipimo kimwe.

Mu 2018 ni bwo hatangiye igikorwa cyo guhuza abakora mu rwego rw’ubukerarugendo, icyo gihe cyitwaga “Tourism gala dinner and awards’’.

Umuyobozi Mukuru w’Ishami ry’Ubukerarugendo mu Rugaga rw’Abikorera, PSF, Rutagarama Aimable, yavuze ko muri uyu mwaka bishimiye kucyagura no gufungurira amarembo abandi hagamijwe kwerekana amahirwe y’ubukerarugendo ari mu gihugu.

Yagize ati “Twahisemo kwagura igikorwa no kukigira ikizamara icyumweru. Ni amahirwe yo kwerekana ibyo dufite. Twishimiye ko iki gikorwa kije mu gihe ibintu biri gusubira ku murongo.’’

Yashimye ko Leta yafashije mu kuzahuka k’ubukungu by’umwihariko ku bo mu rwego rw’ubukerarugendo ndetse hari icyizere ko bitazasubira irudubi kubera imbaraga Leta yashyize mu gukingira abaturage.

Ikigega Nzahurabukungu cyashyiriweho gufasha ubucuruzi bwazahajwe na COVID-19 cyahaye umwihariko amahoteli n’ubukerarugendo mu kubifasha gusubukura ibikorwa no guhemba abakozi. Cyatangijwe ku wa 8 Kamena 2020 ndetse ku ikubitiro cyashyizwemo miliyoni 100$, akabakaba miliyari 95 Frw mu gihe mu myaka ine kizashorwamo arenga miliyoni $200. Amahoteli yahawe miliyari 50 Frw ndetse hari icyizere cyo ashobora kongerwa.

Icyumweru cy’Ubukerarugendo kizaberamo ibikorwa birimo icyiswe “Rwanda restaurant week” n’irushanwa ry’amafoto yo kwerekana ko u Rwanda rufite ingeri nyinshi zakorerwamo ubukerarugendo birenze gusura ingagi zo mu Birunga gusa.

Umuyobozi Mukuru w'Ishami ry'Ubukerarugendo mu Rugaga rw'Abikorera, PSF, Rutagarama Aimable, yavuze ko iki gikorwa kizafungurira amarembo abakerarugendo no kubereka amahirwe ari mu gihugu
Umuyobozi mu Ishami ry’Ubukerarugendo mu Rugaga rw’Abikorera, Frank Gisha Mugisha, yavuze ko icyumweru cyahariwe Ubukerarugendo ari umwanya mwiza wo kuganira ku cyakorwa mu kurushaho kunoza uru rwego
Brenda Nyakira wari uhagarariye Ikaze PCO yavuze ko Icyumweru cyahariwe bukerarugendo ari umwanya mwiza wo kuganira hagati y’ababukoramo no kurushaho kunoza imikoranire
Umuhuzabikorwa w’Ihuriro ry’Ubukerarugendo mu Karere ka Afurika y’Iburasirazuba, Yves Ngenzi, yavuze ko byagaragaye ko ubukerarugendo bugomba kuzahuka buhereye mu Karere mbere yo kugera ku rwego mpuzamahanga
Iki gikorwa cyabereye muri Serena Hotel
Umuyobozi Mukuru w'Ishami ry'Ubukerarugendo mu Rugaga rw'Abikorera, PSF, Rutagarama Aimable, afungura ku mugaragaro ikirango cy'Icyumweru cyahariwe Ubukerarugendo mu Rwanda
Abayobozi bitabiriye iki gikorwa bafashe ifoto y'urwibutso nyuma yo gufungura ikirango ku mugaragaro
Nyuma y'iki gikorwa hafashwe ifoto y'urwibutso

Amafoto: Igirubuntu Jean Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .