Shira amatsiko ku mibereho y’Inkima zo mu Birunga zisangiye amateka na Richard Kandt (Amafoto)

Yanditswe na Evariste Nsengimana
Kuya 10 Kanama 2019 saa 01:50
Yasuwe :
0 0

U Rwanda ni igihugu gitatswe n’ibyiza byinshi birimo ahantu n’ibyiza nyaburanga bikunzwe n’abakerarugendo. Muri ibyo harimo Inkima zifite ibara rya Zahabu (Golden Monkies) ziba muri Pariki y’Ibirunga.

Ni inyamaswa zishimishije zifite imico ijya gusa n’iya muntu, zifitanye amateka na Dr Richard Kandt, umuvumbuzi uzwi cyane mu mateka y’u Rwanda no mu Karere ka Afurika y’Uburasirazuba.

Dr Kandt yageze mu Rwanda ari gukora ubushakashatsi burimo gushakisha isoko y’uruzi rwa Nil mu myaka ya 1897 na 1906, ni nabwo yaje kubona mu Birunga Inkima zifite ibara rya zahabu, azandikaho inyandiko nyinshi ndetse zihabwa izina ry’ubushakashatsi rya ‘Cercopithecus kandti’.

Ubu bwoko bw’inkima bugaragara cyane mu Karere ka Afurika y’Iburasirazuba mu misozi y’Ibirunga ihuriweho na Pariki enye zirimo iy’Ibirunga yo mu Rwanda, iya Mgahinga muri Uganda, iya Virunga na Kahuzi-Biéga zo muri Repubulika Iharanira Demokarasi ya Congo.

Kuwa 7-10 Kanama 2019, umunyamakuru wa IGIHE kimwe n’abafite n’abakorera ibigo bifasha ba mukerarugendo mu Rwanda, basuye Inkima zo mu Birunga, mu rugendo rugamije gutangiza inzira nshya y’ubukerarugendo bushingiye ku muco n’amateka.

Uru rugendo ikigo gishinzwe Ingoro z’Umurage w’u Rwanda n’Umushinga w’Abadage wita ku iterambere (GIZ) byabageneye, rwibanze ku mateka y’Ubukoloni bw’Abadege mu Rwanda by’umwihariko urugendo rwa Dr Richard Kandt wari ubahagarariye.

Ni urugendo rwahereye muri Priki y’Ibirunga icumbikiye inyamaswa nyinshi zirimo Inkima zifite ibara rya zahabu igice kimwe n’ajya gusa n’ikigina n’umukara, bakomereza n’izindi nzira Richard Kandt yanyuzemo mu Rwanda.

Umukozi uhagarariye abafasha ba mukerarugendo muri Pariki y’Ibirunga, Irakoze Emmanuel, wari uyoboye itsinda guturuka ku biro byayo biherereye mu Kinigi mu Karere ka Musanze, yagize ati “Urugendo tugiye gukora rugera muri umwe mu miryango y’Inkima zisurwa n’abakerarugendo, rutwara iminota 30”.

Urugendo rujya gutangira yadusobanuriye ko mu Birunga harimo imiryango myinshi y’Inkima ariko isurwa ari itatu irimo uwa Kinege, Kageri na Kabatwa, zihabwa amazina bitewe y’uduce zikunze gusangwamo.

Uwo twasuye wa Kageri, ugizwe n’inkima ziri hagati ya 60-100. Kugera kuri uyu muryango bisaba iminota nibura 30 uvuye ku cyicaro cya Pariki y’Ibirunga, gusa Irakoze asobanura ko we cyangwa abashinzwe kuzicunga bataba bazi aho ziherereye kuko zihora zimuka.

Ni inyamaswa zisurwa cyane, buri gitondo abashinzwe kuzishakisha barazinduka mu ishyamba ry’imigano n’ibindi byatsi n’ibiti cyimeza usanga muri pariki y’Ibirunga, bashakisha aho ziherereye, bagahana amakuru n’ushinzwe kuyobora abakerarugendo.

Nk’ibisanzwe mbere yo kwinjira muri iyi pariki, Irakoze yabanje gutanga amabwiriza abasura bagomba gukurikiza mu kubungabunga umutekano wabo n’uw’imyamaswa zibarizwamo.

Mu nama zitangwa harimo kutavugira hejuru, ahubwo ‘ushobora gutangara ariko bikamara amasegonda gusa’ no kutagira icyo ukura muri pariki cyangwa ngo usigemo icyo winjiranye, kutiherera aho ubonye, wabishaka ukamumenyesha.

Ukigera aho umuryango wa Kageri uhera, biba bishoboka ko Inkima wazibona hafi cyangwa kure bitewe n’aho zaraye cyangwa aho zagiye gushakira ibizitunga.

Tumaze kugenda nk’iminota 20 mu ishyamba, twageze ku bashinzwe kuzishakisha mu ishyamba, batubwira ko tugize amahirwe ko ziri hafi aho. Irakoze wari utuyoboye yadusabye gusiga ibikapu n’ibindi bikoresho dufite kugira ngo bitaza kubangamira ubwisanzure hagati yacu n’izi nyamaswa.

Bimwe mu bifasha abazishakisha kumenya aho ziherere harimo kuba bazi agace barimo umunsi wabanje. Kubera kumarana igihe kinini nazo, bashobora kumenya icyerekezo zizaganamo umunsi ukurikiye.

Aba baba bafite n’ubuhanga bwo kwitegereza ibyatsi zariyeho bakamenya umwanya ushize zihanyuze ku buryo bibafasha gutahura agace ziherereyemo.

Inkima usanga zisimbagurika hejuru mu biti ari nabyo ziberamo. Ntizigera mu bushorishori ariko nanone biragoye ko wazisanga hasi ku butaka, zigerageza kujya hagati na hagati. Ni imyamaswa zidatinya, usanga zishaka kwegera abantu zibyishakiye ariko n’ubwayo uyegereye ihita ihunga, rimwe na rimwe ikaba yahagaraya hafi yawe.

Inkima igira uburebure buri hagati ya sentimetero 48 na 67 n’umurizo ushobora kugera kuri santimetero 72.

Irakoze yavuze ko Inkima ishobora kubyara impanga ariko bigoye ko izikuza zose kuko byayigora kuzitaho icyarimwe kuko akenshi iyo bikiri ibyana biyisaba kubigendana ibiteruye. Imara amezi atanu mu nda ya nyana, ikavuka ifite amagarama 300-500.

Abakurikiranira hafi imibereho y’inkima bavuga ko bigoye gushyingura umurambo wayo kuko iy’imbyeyi igize ibyago byo gupfusha umwana, imuterura ikabana na we kugeza ashangutse [Mu Rwanda ntabwo birabaho ni ku bundi bwoko bw’inkima]. Imushyira hasi iyo igiye kurisha, yabona umuntu cyangwa hakagira ikiyikanga, ihita iwuterura ikawurirana mu giti.

Umushakashatsi mu Kigo cy’Igihugu cy’Ingoro z’Umurage, Mugabowagahunde Maurice, yavuze ko kumenyekanisha ubukerarugendo bushingiye ku muco ari igikorwa cyunganira ubundi busanzwe.

Yavuze ko na mbere y’uko Dr Richard Kandt aza mu Rwanda Inkima zabaga mu Birunga, ahubwo icyo yakoze ari ukuzandikaho no kuzimenyekanisha ku ruhando mpuzamahanga, dore ko zigaragara hacye ku Isi.

Ati “Inkima ziteye amatsiko, icyo dusaba abantu ni uko bazisura kuko ubukerarugendo bw’u Rwanda si ukuvuga ingagi gusa ahubwo hari n’ibindi biteye amatsiko mu gihugu bashobora gusura.”

Umuyobozi wa guhunda yo guteza imbere ubukungu n’umurirmo muri GIZ, Kubwimana Jean Bosco, yavuze ko muri gahunda yo kumenyekanisha ubukerarugendo bufitanye isano na Dr Kandt ‘Twifuza ko ibigo bikora ubukerarugendo birimo ibikorera aho yagiye anyura, ibice ndangamateka, ingoro z’umurage byagura ubukerarugendo bikanagira uruhare mu iterambere ry’igihugu’.

Si ugushyigikira ibyakozwe n’Abakoloni

Umuyobozi w’Ingoro z’Umurage w’u Rwanda, Amb Robert Masozera, yavuze ko ‘Atari ugushyigikira ibyo Kandt yakoze kuko atari byiza ahubwo aho yageze ari ahantu heza habyazwa umusaruro no kwagura ubukerarugendo bukarenga gushingira ku ngagi na Pariki’.

Yasobanuye ko hari porogaramu yitwa ‘Richard Kandt Trail’ igaragara kuri Play Store yakozwe, umuntu yamanuraho akayishyira muri telefone zigezweho, ikamufasha kumva no gusobanukirwa amateka n’urugendo rwa Dr Richard Kandt no gusura uduce yagiye anyuramo.

Ikigo cy’igihugu ndangamurage kigaragaza ko kimaze gukora ubushakashatsi bugamije kugaragaza ibice nyaburanga by’u Rwanda abakerarugendo basura, bwagaragaje ibisaga 500 birimo 10 bifitanye isano n’urugendo rwa Dr Richard Kandt.

Inkima irimo gusoroma ibyatsi ikuramo ibyo irya
Inkima iri mu bushorishori yitegereza abantu bayireba
Inkima ntabwo zijya hejuru cyane ariko ntabwo zijya no hasi
Inkima zifite ibara rya zahabu zigaragara mu bice by'ishyamba rya pariki y'ibirunga
Itsinda ry'abakozi b'ibigo bifasha abakerarugendo basuye inkima
Mu ishyamba haba harimo ibisigazwa by'inyamaswa zapfuye
Ni inyamaswa nziza usanga zituje
Ntabwo zipfa kujya ku butaka
Ziba ziri mu biti zishakamo ibyo zirya
Zigira umurizo muremure
Ziratuza abantu bakazifotora
Abarinda pariki bavuga ko iki ari igisigazwa cy'imbogo yapfuye kera
Bageze mu nkengero za pariki y'ibirunga bafashe ifoto
Batashye amatsiko ashize
Barangije gusura inkima bafashe ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza