RDB yeretse amahanga ibanga riri mu ishoramari mu bice bizengurutse ikiyaga cya Kivu

Yanditswe na Philbert Girinema
Kuya 5 Ukwakira 2016 saa 09:31
Yasuwe :
0 0

Ikigo cy’Igihugu cy’Iterambere, RDB, cyatangaje ko hari amahirwe menshi ari mu ishoramari ku muzenguruko w’Ikiyaga cya Kivu giherereye mu Ntara y’Uburengerazuba, arimo ibijyanye n’ubukerarugendo bwo kwishimisha n’imyidagaduro.

Mu kiganiro n’Abanyamakuru cyabaye kuri uyu wa Kabiri kijyanye n’inama yiga ku Ishoramari ry’Amahoteli muri Afurika, Africa Hotel Investment Forum, iri kubera i Kigali, kuva kuwa 4 kugeza kuwa 6 Ukwakira, Umuyobozi Mukuru muri RDB ushinzwe ubukerarugendo, Belise Kariza, yashishikarije abitabiriye iyi nama ko uyu ari umwanya wo kubona amahirwe mu ishoramari mu Rwanda.

Aha by’umwihariko yagarutse ku nkengero z’Ikiyaga cya Kivu, hari imishinga inyuranye nk’ahantu ho gusohokera mu bihe by’impeshyi no kwidagadurira i Rubavu, inyubako zigezweho zo guturwaho, hoteli ku kirwa cya Gihaya na hoteli y’inyenyeri eshanu izajya yakira inama zitandukanye iri gusozwa mu Karere ka Rusizi. Iyi mishinga igiye iba hagati ya miliyoni $50 na 152 z’amadolari.

Kariza yagize ati “U Rwanda ni ahantu heza ho gukorera ishoramari, kuko dutanga ubufasha bujyanye no korohereza abashoramari aho ibyangombwa bakenera byose biboneka kuri internet amasaha 24 mu minsi irindwi.”

“Guverinoma yashyize imbaraga nyinshi mu bukerarugendo kandi yiyemeje gushyiraho ibikorwa remezo byose byafasha mu kuzamura uru rwego, harimo imihanda ikomeye, amazi n’amashanyarazi,”

Imibare y’Ubukerarugendo igaragaza ko mu 2015, bwinjije miliyoni $ 340, akaba yariyongereye ho 10% ugereranyije n’uko byari bimeze mu 2014, ariko guverinoma ikaba yarihaye intego ko nibura buri mwaka inyungu y’ubukerarugendo yajya yiyongeraho 25%.

Kariza yakomeje agira ati “Uko tugenda twubaka ibintu bigenewe ubukerarugendo, ni ngombwa ko tugira byinshi mu bijyanye n’aho kurara n’ahantu habereye abakiliya bacu. Ikiyaga cya Kivu ni nka Paradizo ku Isi kandi gitanga amahirwe menshi yakoreshwa mu kuhagira ahantu ho gutemberera.”

Uburengerazuba bw’u Rwanda bufite ibice bibereye ubukerarugendo, biturutse ahanini kuba byegereye ibirunga bisurwa cyane kubera ingagi, ndetse n’imikino cyangwa indi myidagaduro ishobora kubera mu nzu, mu kiyaga cya Kivu.

Iri huriro Nyafurika ry’amahoteli rirahuriza hamwe amahoteli mpuzamahanga, abashoramari, abanyamabanki n’ibindi bigo basangira ubumenyi. Ni n’umwanya wo kurambagira u Rwanda nk’abantu bafata ibyemezo mu bijyanye n’ishoramari mu mahoteli.

Umuyobozi Mukuru muri RDB ushinzwe ubukerarugendo, Belise Kariza
Umunyamakuru Peter Muyombano wa Radio na TV Flash abaza ikibazo mu kiganiro n'abanyamakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza