Mu mafoto: Isanzure uryoherwe n’imibereho gakondo y’ingagi mu birunga

Yanditswe na Rabbi Malo Umucunguzi
Kuya 28 Ugushyingo 2017 saa 10:58
Yasuwe :
0 0

Ni igikorwa kimara isaha imwe gusa, ariko cyasubije inzozi za benshi bibazaga ku bunini, imibereho, imiterere n’imibanire y’ingagi n’abantu, inyamaswa abahanga bavuga ko ihuje hafi 99% n’ikiremwa muntu.

Ku Cyumweru tariki ya 26 Ugushyingo 2017 wari umunsi itsinda ry’abantu biganjemo abavutse kuwa 4 Nyakanga n’abanyamakuru bahawe amahirwe y’imbonekarimwe yo gusura ingagi muri Gahunda ya Tembera u Rwanda, kuko hari bamwe bari batarasobanukirwa impamvu zo kwishyura $1500 ku gusura ingagi.

Ukigera mu Kinigi ahari ibiro by’Ikigo cy’Igihugu cy’Iterambere, RDB, mubanza gushyirwa mu matsinda y’abantu umunani ngo muhabwe amabwiriza bitewe n’umuryango mushaka gusura, kuko umuryango w’Ingagi usurwa n’abantu batarenze umunani kandi bakamarana n’ingagi igihe kitarenze isaha imwe.

Icyo gihe kibarwa nk’aho ziba zitangiye guhararukwa abantu, zigahabwa n’umwanya ngo zikomereze ubuzima.

Iyo mumaze kwiyandika ndetse n’ibyangombwa bigafotorwa, ndibuka ko twanabajijwe ubushobozi bw’umubiri wa buri wese kuko inzira zinyurwamo atari zimwe, ndetse ntuba uzi aho usanga umuryango w’ingagi niba ari hafi cyangwa kure. Biterwa n’aho Umutware wazo ‘Silverback’ yashatse.

Umunyamakuru wa IGIHE yerekeje muri Kalisimbi ahatuye umuryango ‘Susa’, (amafoto menshi yo ni ayo mu muryango wa Umubano, wasuwe n’itsinda ryarimo umufotozi wacu) aho abasuye ingagi benshi bahamya ko uwifuza gusura ingagi akaganira n’abatware b’ibirunga ariho ajya, gusa gusura uyu muryango ubazwa niba wiyizeye mu mbaraga z’umubiri, ‘physically fit’.

Twahagurutse mu Kinigi muri Musanze twerekeza mu Murenge wa Jenda muri Nyabihu n’imodoka. Aho yadusize twakoresheje nk’iminota nka 40 ngo tugere kwa Gihindi, ku ruzitiro rw’amabuye rwuzuye mu 2009 ngo rukingire abaturage imbogo zajyaga kubonera. Aha ni naho twasanze uwagombaga kuducungira umutekano imbere muri pariki.

Umuntu atangira urugendo agishidikanya

Mu gutangira urugendo, abenshi muri twe twari twambaye inkweto zizwi nka bote ngo twikingire icyondo giterwa n’imvura ihora igwa mu birunga, ku buryo kuvayo utanyagiwe ari nk’igitangaza, ndetse nubwo byari nko gusetsa, tukinjira batubwiye ko kwitura hasi byemewe.

Mu kwinjira twabanje guhabwa amabwiriza ko nta kintu winjiranye uta muri pariki cyangwa icyo utinjiranye usohokanamo. Mu rugendo rw’ubunyereri uzamuka, hari uwo urwondo rwakoragaho akireba akibaza ibimubayeho, nyamara hari aho rwabaye isoko y’ibyishimo.

Kuzamuka mu rugano rwa Kalisimbi byafashe nk’isaha n’iminota 40 ngo tugere hafi y’ingagi, abenshi imitima itangira kudiha kuko batiyumvishaga uko zisa cyangwa ingano yazo n’uburyo imyitwaire yabo iri buze kuzinyura. Twinjiye muri pariki saa tanu, dusohokamo saa cyenda.

Burya ingagi ni umwami uganje iwe

Nyuma y’umwanya munini usesera mu rugano abasore bashakisha inzira batema ibyatsi n’ibiti, uwaduherekeje yagendaga avugana n’abakozi baziri hafi badufasha kuzigeraho.

Ni uko twageze ku muryango wa SUSA ubusanzwe uyoborwa na Kurira y’imyaka 36 ifite ubunini budasanzwe, gusa umunsi wacu waryohejwe n’imyitwarire ya Impuzamahanga, ingagi y’ingabo yagaragaje ukwisanzura n’ukwiyemera guhambaye.

Wumvaga umwe yitsa imitima undi akavuga ati “Oh, ko mbona isa na zimwe nabonye muri Expo?” kugeza ubwo zerekanye itandukaniro.

Babanje kuduhumuriza, ubwo turahagaze bamwe baca bugufi ngo bitegereze neza, Impuzamahanga yitarura izindi iza imbere yacu irandura umugano, ihekenya igice cyo hasi, irangije yegura umutwe iratwitegereza.

Nk’uko twari twahawe amabwiriza ko igihe ingagi ikwegereye ugomba kwicara, bamwe bari buriye umusozi batinya ibisura bamwe bikabarya ku maboko bakiterera hejuru bakagusigiraho amata y’icyatsi bita Impomvu kimwe kivamo imyirongi, ariko byageze aho n’umuntu abyicaramo ntabyumve cyangwa ngo yibuke ko ari mu rwondo.

Impuzamahanga yageze aho iradusatira, ikubita ku gituza turabunda, iraza iduhagarara hagati umwe yigira hirya yumva ko ibintu byakomeye, umuntu akicara mu gisura n’icyondo ntacyo yikanga nyamara mbere cyakoraga ku rutoki ugasimbuka.

Uwatuyoboraga witwa Patience Dusabimana ati ‘Muhumure’ atangira kuyivugisha mu rurimi rwazo ko ‘ibintu ari amahoro’, kandi koko Impuzamahanga yerekanye ko yamenyereye abantu, itunyuramo hagati ireba uko tubandagara irikomereza.

Nyuma gato uko abantu bari bicaye bahanze amaso iri tsinda ry’ingagi, Impuzamahanga yarongere irabegera maze yicara yegamye ku mugano iripfumbata, bigasa n’aho ari igikundi cy’abantu bari kungurana ibitekerezo bafata kamwe.

Nibwo twatangiye kubona ubwiza bwo gusura ingagi n’uburyo ari ibiremwa byihariye, uwari watinye gufata ‘Selfie’ atangira kwifotozanya nazo, gusa akigengesera intera ya metero zirindwi zigomba kuha hagati y’ingagi n’umuntu, ngo hirindwe ko bakwanduzanya indwara.

Hari ibyihariye ku ngagi

Burya n’ingagi zibyara impanga: Umuryango wa Susa ni umwe mu miryango yavuvutsemo impanga kandi zikabasha kubaho, kuko ngo akenshi zipfa. Imiryango irindwi ngo imaze kubyara impanga ariko eshatu nizo zabashije kuramira ubuzima bw’abana bazo.

Akenshi ngo biterwa n’uko ingagi itabasha gutwara abo bana bombi kuko itwara umwana wayo mu maboko no ku mugongo, baba babiri bikagorana. Ikindi ngo kubafubika ntibyoroha, bagahura n’ibizazane bakiri bato.

Burya kandi ngo ingagi ntijya inywa amazi, ahubwo bitewe n’ubwoko bw’ibyatsi irya, ku munsi irya ibiro nibura 30 biba byifitiye amazi, ayo akaba ari nayo ayitunga.

Ingagi kandi ibasha kubaho imyaka hagati ya 35-45, nubwo bijya bigaragara ko hari iziyirenza, nk’iyitwa Guhonda bikekwa ko ifite imyaka 46 cyangwa 47, iyobora umuryango wa Sabyinyo.

N’ingagi zitekereza cyane ku mibonano mpuzabitsina: Hari uwakeka ko ko iyi mvugo yakoreshwa ku bantu gusa, ariko urebye uburyo zibyubaha, bifite imvano.

Mu gufasha ba mukerarugendo, ababikora banahuguwe mu rurimi rw’ingagi, bakoresha bashaka kwereka ingagi ko mutazanwe n’inabi, cyangwa iyo umwana wayo abegereye mushaka kumusubiza inyuma, ngo hato adataka nyina akaza aje guhora.

Hari aho byageze ingagi zitangira guteretana, ariko ingabo igira ubwoba bwo guhita ibikora kuko Kurira yari hafi aho, kandi ngo kuyigira ku mugore birahanirwa. Umutware ahanisha abo ayobora kubaruma, kandi ngo ingagi irumwe n’indi ugira ngo hari uwayitemye.

Ibyo bituma habaho ikinyabupfura ku mugore igihe utari umutware w’umuryango, n’ubwo ngo bitabuza ko iyo ziherereye ziha akabyizi.

Gusura ingagi si ibyo ukwiye kujya uhora ubarirwa, ni ibyo ukwiye kuzigamira ukazihera ijisho nubwo byaba rimwe mu buzima. Ibi ni bike nabonye, nawe ni ahawe ngo urebe ibindi ntakubwiye, byari ukukuvumbya!

Uzasanga buri wese uri muri uru rugendo yitwaje akabando kugira ngo abone uko ahangana n'ubunyereri n'ubuhaname bw'imisozi
Hari bamwe bafatwa ukuboko kugira ngo urugendo ruborohere
Uru ni urukuta ruzitiye Pariki y'Ibirunga, rwubatswe hagamijwe kurinda ko imbogo zitoroka zikajya konera abaturage, mu kurwurira ab'intege nke bahabwa ubufasha
Aha iyi iraruhutse...
Ingagi ntijya inywa amazi, ahubwo bitewe n’ubwoko bw’ibyatsi irya, ku munsi irya ibiro nibura 30 biba byifitiye amazi, ayo akaba ari nayo ayitunga
Utu ni utuzu usanga mu bice bimwe na bimwe ugana mu Birunga aho ingagi ziba
Ingagi ntijya inywa amazi, ahubwo bitewe n’ubwoko bw’ibyatsi irya, ku munsi irya ibiro nibura 30 biba byifitiye amazi, ayo akaba ari nayo ayitunga
Ikiganza cy'ingagi ntaho gitaniye n'icya muntu, reba inzara zazo!
Iyo utangiye kugera mu cyanya kibamo ingagi, abenshi ntibaba basobanukiwe ibyo bari kubona kugeza ubwo bamaze nibura kuzimenyera gato
Ingagi zifite imimerere imeze kimwe n'iy'umuntu ku buryo abahanga bavuga ko biri ku kigero cya 99%
Ingagi ishatse gutereta umugore w’indi, ihanishwa kurumwa ku buryo aho irumwe haba hameze nk’uko wayitema
Hari abakubitana amaso nazo, bakikanga kubera kutamenyera kuzisura
Bisaba ko ugenda witeguye ko utari bworoherwe n’ibisura
Abenshi baba bitwaje ibikoresho bifata amashusho kugira ngo babone uko babika uru rwibutso rukomeye mu buzima. Mu gihe umuntu afotora ingagi, kirazira gukoresha umurabyo
Iyi ni imitererere y'ikirenge cy'ingagi. Nayo ifite amano atanu, mu bworo bw'ikirenge ndetse n'igitsi nkuko bimeze ku muntu
Areruya Joseph ni umwe mu bitabiriye iki gikorwa cyo gusura ingagi, aha yari akubutse hejuru mu misozi
Mu kumanuka imisozi, hari aho umuntu agera hatambitswe. Abajya gusura umuryango umwe w'ingagi baba bari mu itsinda ry'abantu umunani

Amafoto: Moise Niyonzima


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza