Maria Sharapova yasuye ingagi muri Pariki y’Ibirunga (Amafoto)

Yanditswe na Ndayikunda Josué
Kuya 13 Ugushyingo 2019 saa 02:14
Yasuwe :
0 0

Mu gitondo cyo kuri uyu wa Gatatu, icyamamare mu mukino wa Tennis, Maria Sharapova, uri mu biruhuko mu Rwanda yasuye ingagi mu Pariki y’Ibirunga.

Uyu Murusiyakazi amaze iminsi itatu mu Rwanda aho yaje mu biruhuko bisanzwe nyuma y’umwaka w’imikino utaramuhiriye, dore ko waranzwe n’imvune zatumye anakina amarushanwa make bikamuviramo no gusubira inyuma ku rutonde rw’uko abakinnyi bahaze mu mukino wa Tennis ku isi.

Amakuru agera ku IGIHE avuga ko Sharapova w’imyaka 32 azamara mu Rwanda icyumweru.

Amafoto Sharapova yasangije abamukurikira ku mbuga nkoranyambaga yagaragaje ko yasuye ingagi muri Pariki y’Ibirunga.

Sharapova wigeze kuba nimero ya mbere ku isi mu bagore, n’umwe mu bafite amafaranga menshi dore ko yigeze kuba umugore wa mbere mu bakina imikino itandukanye winjiza amafaranga menshi, abikora inshuro 11 zikurikiranya.

Maria Sharapova yabaye nimero ya mbere ku Isi guhera mu 2005, ariko kuri ubu ari kubarizwa ku mwanya wa 132 nyuma yo kwitabira amarushanwa 12 gusa uyu mwaka.

Uretse gusura ingagi mu Rwanda, Sharapova yanasuye zimwe muri Pariki zo muri Boswana nk’uko yagiye abisangiza abamukurikira ku mbuga ze nkoranyambaga.

Sharapova aje akurikira myugariro wa Arsenal, David Luiz, nawe uheruka mu Rwanda agasura ahantu hatandukanye harimo na Pariki y’ibirunga.

Sharapova yishimiye gusura ingagi mu birunga
Sharapova yasuye ingagi kuri uyu wa Gatatu ariko amaze iminsi mu Rwanda
Byari ibyishimo kuri uyu mugore wigeze kuba nimero ya mbere ku Isi muri Tennis

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza