Inyubako za mbere mu Rwanda zakira ba mukerarugendo zihenze kurusha izindi (Amafoto)

Yanditswe na Rabbi Malo Umucunguzi
Kuya 20 Ugushyingo 2019 saa 08:36
Yasuwe :
0 0

U Rwanda rukomeje gutera imbere cyane mu rwego rw’ubukerarugendo, ndetse inyubako zakira ba mukerarugendo zikomeje kuba nyinshi, gusa si ko zose ziri ku rwego rumwe nk’uko amikoro y’abantu agenda asumbana.

Ubwo Jenoside yakorewe Abatutsi yarangiraga, u Rwanda rwari igihugu cyangiritse, abanyamahanga baragitereranye ndetse nta bikorwa bifatika rufite, kugeza ubwo filime yiswe Hotel Rwanda yajyaga gukinwa, hagafatwa icyemezo ko ikinirwa muri Afurika y’Epfo ku mpamvu zirimo ko mu Rwanda hatari hari hoteli zakwakira ibyamamare nka Don Cheadle uyigaragaramo.

Burya si buno! Ibintu byarahindutse, ubu muri hoteli eshanu z’inyenyeri eshanu zibarirwa mu rwa Gasabo, ebyiri ziri hanze y’Umurwa Mukuru Kigali. Izo ni One & Only Nyungwe House yo muri Pariki y’Igihugu ya Nyungwe na Bisate Eco Lodge yo mu Karere ka Musanze yashyizwe kuri urwo rwego ku wa 1 Ugushyingo 2019.

Kugeza ubu hoteli z’inyenyereri eshanu ziyongera kuri izo ni Radisson Blu Hotel & Convention Centre, Kigali Serena Hotel na Kigali Marriott Hotel.

Ni intambwe zikomeye zizatuma u Rwanda rubasha kugera ku rwego rwo kwinjiza nibura miliyoni 800 z’amadolari ya Amerika mu 2024, ahwanye na miliyari 760 z’amafaranga y’u Rwanda.

Twagerageje kwegeranya hoteli za mbere mu Rwanda zihenze, nubwo ibiciro byazo bihindagurika bitewe n’ibihe, ni ukuvuga niba ari mu mezi ajyanye n’ubukeraryugendo cyangwa mu gihe abasura igihugu baba ari bake.

Haniyongeraho ko mu kugena igiciro hitabwa ku gihe umuntu azamara muri hoteli runaka. Ntabwo bivuze ko uburyo zikurikirana hano ari bwo buryo ntakuka. Kugira ngo wumve neza iyi nkuru, birasaba ko wifashisha Calculatrice, hanyuma idolari rimwe riri kuri 925 Frw ugendeye ku ivunjisha rya Banki Nkuru y’Igihugu.

1. Singita Kwitonda Lodge and Kataza House

Singita yatashywe ku wa 1 Kanama 2019 na Perezida Paul Kagame aherekejwe na Madamu Jeannette Kagame. Ni inyubako yo ku rwego rwo hejuru yakira ba mukerarugendo nabo bo ku rwego nk’urwo, yubatswe mu Karere ka Musanze ku birenge by’Ikirunga cya Sabyinyo, aho uba unitegeye ibirunga bya Gahinga na Muhabura.

Singita Kwitonda Lodge and Kataza House yubatswe mu gishanga cyari urwuri, ariko ubu hashibutse umushinga ukomeye w’ubukerarugendo ugizwe n’inzu umunani zubatswe mu buryo zirengera ibidukikije.

Zirimo zirindwi zagenewe umuntu umwe cyangwa uherekejwe kuko buri imwe ifite uburiri bumwe, uruganiriro rwagutse n’ibindi byangombwa nkenerwa, hakaba indi imwe yiswe Kataza House yo igizwe n’ibyumba bine byo kuraramo.

Yubatswe n’ibikoresho byinshi byakorewe mu Rwanda, ibyinshi ni ibiboneka i Musanze birimo amakoro n’imigano, itwara miliyoni $25.

Ibiciro byaho byihagazeho nubwo bihindagurika bitewe n’ibihe by’ubukerarugendo nk’uko twabivuze.

Nk’ubu kuva ku wa 1 Ugushyingo kugeza ku wa 19 Ukuboza, icyumba gishobora kuraramo abantu babiri cyishyurwa $1495 ku muntu ku ijoro, mu gihe mu mpeshyi aba ari $1750.

Muri iyi minsi kandi icyumba kibamo ibitanda bibiri kirimo kwishyurwa $4 485, mu gihe ubusanzwe aba ari $5250 hagati y’umuntu umwe na batatu, hakwiyongeraho undi umwe bikajyana n’inyongera ya $1495 mu minsi nk’iyi cyangwa $1750 mu bihe by’ubukerarugendo.

Kurara muri Kataza House yo ishobora kwakira abantu umunani ubu ni $6877 mu gihe ubusanzwe aba ari $8050 ku ijoro rimwe ku bantu hagati y’umwe na bane, hagira uwiyongeraho bikajyana n’izamuka rya $1495 cyangwa $1750 bitewe n’ibihe.

Muri icyo giciro haba hakubiyemo n’ibintu byose umuntu akenera mu ijoro, birimo ibyo kurya no kunywa byose bihaboneka.

Iyo uri muri Singita uba witegeye ibirunga

2. One&Only Gorilla’s Nest

Mu kwezi gushize nibwo inkuru yabaye kimomo ko nyuma ya hoteli igezweho imaze igihe muri Pariki y’Igihugu ya Nyungwe, One & Only Resorts yibarutse irindi shami mu karere ka Musanze, ryitezweho kuzajya ryakira ba mukerarugendo basura ingagi.

One&Only Gorilla’s Nest yubatswe mu Kinigi mu ishyamba ry’inturusu, ahantu hitegeye ibyiza by’ibirunga by’u Rwanda. Yubatswe mu biti mo hagati ku buryo buri nzu iteretse ku byuma bishinze, aho nibura bibarwa ko inzu imwe yagiye itwara miliyoni imwe y’amadolari ngo yubakwe.

Kugeza ubu kuharara byihagazeho kuko nka Forest lodge irimo ibitanda bibiri, kuyiraramo ijoro rimwe ari $3,825 ni ukuvuga nibura miliyoni 3.5 Frw; Forest Lodge King ni $3,060 ni ukuvuga asaga miliyoni 2,8 Frw; Virunga Suite ni $4,760 ni ukuvuga miliyoni 4,3 Frw naho Ingagi suite ni $5,900, nibura ni miliyoni 5,4 Frw.

3. Radisson Blu Hotel

Muri Nyakanga 2016 nibwo Perezida Paul Kagame yafunguye ku mugaragaro inyubako ya Radisson Blu and Kigali Convention Centre, ahamya ko ari intsinzi y’Abanyarwanda kuko bananiwe kenshi kuyuzuza kubera ubushobozi buke, ariko ntibacike intege bikarangira bayujuje.

Iyi nyubako yubatse mu birometero bitanu uvuye ku kibuga cy’indege mpuzamahanga cya Kigali, mu Murenge wa Kimihurura ku buso bungana na hegitari 12,6.

Kigali Convention Centre igizwe na Hotel y’inyenyeri eshanu ifite ibyumba 292, icyumba cy’inama cyakira abantu basaga 2500, ibiro byo gukoreramo n’ibindi. Inyubako zirimo zifite agaciro ka miliyoni 300 z’amadolari abarirwa muri miliyari 223 z’amafaranga y’u Rwanda.

Iyo ukigera ku rubuga rwayo wakirizwa ubutumwa ko ushobora kurara muri iyi nyubako itagira uko isa guhera ku $265.50

Ayo madolari agenda azamuka ukagera kuri Junior Suite ifite ibaraza, ikakwemera kugira aho wakirira abashyitsi ugahabwa n’ifunguro rya mu gitondo ku madolari $690.00 kugeza kuri Suite yo iguha ibyo ukeneye byose (Terrace & Lounge Access-Breakfast) yishyurwa $ 3,540.

Radisson Blu imaze kuba nk'ikirango cy'u Rwanda kubera imiterere yayo

4. Kigali Marriott Hotel

Mu 2016 nibwo u Rwanda rwahaye ikaze Marriott Hotel, hoteli y’inyenyeri eshanu igizwe n’ibyumba 254 birimo n’icyo ku rwego rw’abaperezida. Niyo hoteli yayo ya kabiri yari ifunguwe ku mugabane wa Afurika nyuma y’iri mu Misiri.

Kuharara byihagazeho, kuko uwagiyemo nko ku wa Mbere agasohokamo kuri uyu wa Kabiri ku mafaranga make byamusabye kwishyura $210, yakenera kujya mu cyumba cyo ku rwego rwo hejuru akishyura $3,500 kandi ku ijoro rimwe gusa.

Muri rusange iyi hoteli igizwe n’inyubako umunani zigerekeranye, ikagira ibyumba 229 n’icyo twagereranya n’inzu mu yindi cyangwa suite 25, ziri mu rwego rwo hejuru ku buryo umuntu aba yisanzuye, afite ibyangombwa nkenerwa byose imbere ye. Ifite kandi ahantu 14 hatandukanye hashobora kubera inama.

5. Bisate Lodge

Iyi ni indi nyubako ya Wilderness Safari yubatswe muri Pariki y’Igihugu y’Ibirunga.

Bisate ifite ibyumba bitandatu buri kimwe kiri ukwacyo, bishobora kwakira abantu byaba mu buryo bw’umuntu ukeneye kurara wenyine, kurarana n’undi cyangwa guhabwa ibitanda bibiri.

Kuharara umuntu yishyura bitewe n’ibihe ndetse no kuba aherekejwe cyangwa ari wenyine. Nk’urugero uwajya kurara muri Bisate Logde muri aya mezi hagati ya tariki 16 Ukuboza 2019 na tariki 29 Gashyantare 2020, byamusaba kwitwaza US$1654. Gusa ashobora no kugabanuka ku mpamvu zitandukanye.

Bisate Lodge yubatswe mu buryo butangaza abanyamahanga bahasura

6. Kigali Serena Hotel

Kigali Serena Hotel ni imwe muri hotel zigezweho kandi zifite amazina amaze igihe mu Rwanda, ndetse ho ibiciro byayo iyo ufunguye urubuga rwayo ubisoma mu mafaranga y’u Rwanda. Nibura icyumba gihera ku 215 855 Frw ; hakwiyongeramo ifunguro rya mu gitondo bikaba 246 784 Frw. Ni amadolari ya Amerika asaga $230.

Bigenda bizamuka mu biciro bitewe n’imiterere y’icyumba n’ibijyana nacyo, wagera ku byumba byo mu rwego rw hejuru (Junior suite & Suite) ukishyura hagati ya 895 891 Frw na 1.087.018 Frw, ni ukuvuga agera mu madolari ya Amerika $1170.

7. One and Only Nyungwe House

One & Only Nyungwe House ni hotel iteye amabengeza yubatswe mu nkengero za Pariki y’Igihugu ya Nyungwe.

Iyi hoteli iri rwagati mu mirima y’icyayi ya Gisakura yongeye gufungurira bose amarembo tariki ya 1 Ukwakira 2018, nyuma yo kuvugururwa no kwagurwa. Yubatswe mu 2010 ku bufatanye na Guverinoma y’u Rwanda ihabwa izina rya Nyungwe Forest Lodge, rihinduka mu 2017 nyuma y’uko yeguriwe One & Only Nature Resorts.

Hotel za One & Only Nature Resorts zifite umwihariko wo kuba mu gihe zubakwa, hazirikanwa ku kurengera ibidukikije n’urundi rusobe rw’ibinyabuzima.

Ibyumba byayo uko ari 22 bigaragaza ubwiza bw’imitako igaragaza umuco nyarwanda, bituma uwabirayemo abasha kwisobanurira no kurushaho kwegerana n’u Rwanda atabanje kugira uwo asobanuza.

Serivisi zo ku rwego rwo hejuru One&Only itanga kandi zinihagazeho kuko ibyumba byabo byishyurwa guhera ku madolari 595 mu ijoro rimwe. Hari kandi n’ikindi cyumba cyagutse (Two-Bedroom Forest Suite), gifite uruganiriro n’aho gufatira amafunguro, kandi kiri ahantu uba witegeye ibyiza bitatse ishyamba rya Nyungwe.

Iki cyumba gishobora kwakira abantu bane, kiri mu byumba by’amahoteli bihenze cyane mu Rwanda, kuko cyishyurwa 2 288$.

One & Only Nyungwe House ifite ubwiza budasanzwe

8. Amakoro Songa Lodge

Amakoro Songa Lodge ni indi nyubako yiyubashye yakira ba mukerarugendo, iherereye mu Kinigi mu Karere ka Musanze. Ni inyubako ziri ahantu hatuje, ku buryo igihe wasuye ingagi mu birunga cyangwa wagiyeyo kuruhuka, hagufasha gusubiza ubwenge ku gihe ukunga ubumwe n’ibvidukikije.

Kurara muri izi nyubako nabyo byihagazeho, kuko bisaba kwishyura nibura $1200 ku ijoro rimwe, ndetse hari n’aho wishyura $1500 ku ijoro. Ni inyubako y’akataraboneka ibereye buri wese uri mu kwezi kwa buki.

Amakoro Songa Lodge kandi yahawe ubushobozi butuma nk’ababyeyi bafite abana, babona ikibuga gihagije cyo kwidagaduriraho.

9. The Bishop’s House

The Bishop’s House ni inyubako itazwi na benshi ariko yihagazeho, yubatswe mu Karere ka Musanze gafatwa nk’irembo ry’ubukeraugendo bwo ku rwego rwo hejuru mu Rwanda, kuko ari iwabo w’Ingagi ziba mu birunga.

Uyirebeye inyuma si inyubako y’igitangaza kuko yubatswe mu buryo bwakoreshwaga mu gihe cy’ubukoloni, ariko itanga serivisi zikomeye ndetse n’ibikorwa biyigize birihariye. Ifite ibyumba icyenda byakira ba mukerarugendo.

Ibyo bituma nk’icyumba cyayo kinini kuruta ibindi (executive suite), kukiraramo bisaba umuntu kwishyura $1200 ku ijoro, Deluxe room ikishyurwa $800 ku ijoro naho ibyumba binini bishobora no kujyamo ibitanda bibiri bikishyurwa $700.

Kurara muri iyi 'Executive Suite' ni $1200

10. Magashi Camp

Iyi ni indi nyubako igezweho yubatswe mu Majyaruguru ya Pariki y’Igihugu y’Akagera, aho uba witegeye ikiyaga cya Rwanyakazinga. Ni hamwe mu hakundwa na ba mukerarugendo banyuranye, baba bajyanwe no gusura inyamaswa ziboneka muri Pariki y’Igihugu y’Akagera cyangwa kureba inyoni z’amoko arenga 520.

Magashi yifashishije amahema atandatu, yubatswe n’ikigo Wilderness Safaris itahwa muri Gicurasi 2019.

Ibiciro byayo byihagazeho kuko kuharara ijoro rimwe, nko mu ihema abantu bashobora gusangira, muri aya mezi akunze gukorerwamo ubukerarugendo kuva ku wa 16 Ukuboza 2019 kugeza ku wa 29 Gashyantare, ni amadolari US$650 ku ijoro.

Ni ku kiyaga cya Rwanyakazinga, aho uruhuka wibereye ku mwaro

11. Ruzizi Tented Lodge

Ni inyubo igezweho ikoreshwa cyane n’abashaka gukambika muri Pariki y’Igihugu y’Akagera, aho umuntu aba yitegeye neza ikiyaga cya Ihema. Igizwe n’amahema icyenda ateye neza mu biti bituma hahora umuyaga utagira uko usa.

Ishobora kwakira abashyitsi 20 kandi buri hema rikagira ubushobozi bwo gutanga amazi ashyushye n’akonje ku muntu uyakeneye, ikagira umwihariko wo kuba ikoresha ingufu zikomoka ku mirasire y’izuba.

Mu mezi atarimo ubukerarugendo ku rwego rwo hejuru nko kuva ku wa 1 Werurwe kugeza ku wa 30 Gicurasi ndetse no kuva ku wa 1 Ukwakira kugeza ku wa 14 Ugushyingo, umunyamahanga ushaka kuharara, ku ihema rigari abantu bashobora kuraranamo bishyura $195 ku ijoro, umuntu umwe akishyura $265, ihema abana bashobora kuraranamo bakishyura $95 mu gihe ihema ryiyubashye ryishyurwa $280.

Naho mu bihe bibereye ubukerarugendo, umunyamahanga muri Ruzizi yishyura $235 ku ihema ryagutse (Double tent) abantu bashobora kuraranamo, umuntu umwe akishyura $325, aho abana bashobora kurarana bakishyura $115 naho icyumba cyisumbuyeho kikishyurwa $335.

Ibi biciro biragabanuka iyo ari ku banyarwanda cyangwa abanyamahanga bafite ibyemezo byo gutura no gukorera mu Rwanda.

Muri Ruzizi hari ahantu ushobora kwitegereza izuba rirenga wicaye iruhande rw'amazi

Amafoto

Songa Amakoro Lodge

Kurara mu Amakoro Lodge bigusigira byinshi wibuka mu buzima bwawe
Yubatswe mu gice cyitegeye ubwiza bw'ibirunga
Amakoro Lodge ni imwe mu nyubako zihariye mu karere ka Musanze

Bisate Lodge

Aho kurara muri Bisate Lodge harihariye
Iyo imbeho ibaye nyinshi dore ko mu birunga hakonja kubi, baracana ubikeneye akota
Ibikoresho byo muri Bisate Lodge birihariye
Muri Bisate Lodge ushobora kwicara hanze ukirebera ibyiza bitatse igice cy'ibirunga

One & Only Nyungwe House

Kurara hano muri Nyungwe King ni amadolari $899
Uba witegeye imirima y'icyayi ya Gisakura
Iyi nyubako ifite umwihariko wo kuba yarubatswe mu buryo burengera ibidukikije
One & Only Nyungwe House ni imwe mu nyubako abantu bagiriramo ibihe byiza iyo basuye u Rwanda

Magashi Camp

Muri Magashi ushobora kuhasanga ubwato bugufasha gutembera mu mazi
Ni ahantu uba witegeye ikiyaga, hari akayaga gatuje
Nijoro bacana umuriro, ukeneye kuruhuka akarushaho kwizihirwa
Muri Magashi Camp ni ukurara mu ihema

Kigali Marriott Hotel

Muri Kigali Marriott Hotel hafite umwihariko ku bintu byose wahasanga
Iyi hotel iri muri nke u Rwanda rufite zubatse izina rikomeye ku rwego mpuzamahanga
Muri Mariott uhasanga ibintu byose ukeneye

Kigali Serena Hotel

Mu masaha y'ijoro Serena Hotel iba ifite umwihariko
Iyi ni imwe muri hoteli zimaze igihe zubatse izina mu Rwanda
Ucyinjira muri Kigali Serena Hotel uryoherwa n'ubwiza bwayo

Radisson Blu Hotel and Convention Centre

Kwicara muri Radisson Blu ufata amafunguro cyangwa icyo kunywa ntako bisa
Radisson Blu hotel ifite uburiri bwiza cyane ariko bujyana n'ikiguzi cy'ukeneye kuharara
Kigali Convention Centre imaze kwakira inama nyinshi zikomeye, ndetse muri Kamena 2020 izakira inama ya Commonwealth
Hari ibaraza abantu bicaraho bafata amafunguro cyangwa bica akanyota, bitegeye ibyiza bya Kigali

Ruzizi Tented Logde

Ifite ubwogero bugezweho, ntiwamenya ko ari mu ihema
Ni ahantu habereye umuntu ushaka kuruhuka, akanasura ibyiza bya Pariki y'Igihugu y'Akagera
Muri Ruzizi harimo n'ihema rigizwe n'uburiri bubiri ku bifuza kwisanzura
Harimo utuyira tunogeye ijisho tugufasha gusabana n'ibidukikije

Singita Kwitonda Lodge and Kataza House

Iyi nyubako iri mu za mbere zihenze kuziraramo mu Rwanda
Iyi nyubako igizwe n'ibikoresho byinshi biboneka mu Karere ka Musanze
Singita Kwitonda Lodge ifite ahantu heza haba ibyo kunywa by'amoko yose

The Bishop’s House

Iyi nyubako ifite imiterere y'inzu zo hambere
Igaragaramo imitako ifite agaciro gakomeye
Ni ahantu habereye umuntu uhasura
Kurara muri iki cyumba ni ukwishyura $700 mu ijoro rimwe
Ukeneye kurara muri iki cyumba byagusaba $800 ku ijoro rimwe gusa

One & Only Gorilla Nest

One&Only Gorilla’s Nest ni nshya mu zakira ba mukerarugendo basura ibirunga
Ifite ibyangombwa nkenerwa kandi bigezweho, biri ku rwego mpuzamahanga
Bibarwa ko buri nzu mu zigize Gorilla's Nest yubatswe kuri miliyoni imwe y'amadolari ya Amerika
Izi nyubako zishinze ku byuma, ku buryo umuntu aba ari hagati mu biti by'inturusu
Iyi nyubako yagenewe ubwogero bufasha benshi kuruhuka boga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza