00:00:00 IGIHE NETWORK KN KINYARWANDA EN ENGLISH FR FRANCAIS

Imbamutima z’abo RwandAir yahesheje agaciro kuva itangije ingendo mu Burayi

Yanditswe na Karirima A. Ngarambe
Kuya 19 Nyakanga 2021 saa 10:38
Yasuwe :
0 0

Umuntu wese wateze indege, kimwe mu bintu bya mbere yumva mbere y’ibindi iyo ayigezemo ni amatangazo amumenyesha ibijyanye n’urugendo. Akenshi atangwa mu ndimi zirimo urw’aho indege iturutse n’aho yerekeje. Ku Munyarwanda ugenda muri RwandAir, ashobora kugera aho agiye iyo ibwotamasimbi acyiyumva nk’uw’ibereye za Kanombe mu mahumbezi y’iwabo.

Usibye kuba indege iba igendera mu kirere n’aho Umunyarwanda ari muri RwandAir, impande n’impande ahabona ibintu byinshi bimukumbuza kandi bimuratira ibyiza by’igihugu cye.

Uhereye ku migongo itatse mu ndege, amabara y’umuhondo, ubururu n’icyatsi ari mu ibendera ry’igihugu aba ari ku birango byayo n’abakozi b’abanyarugwiro bakuvugisha mu Kinyarwanda mbere y’urundi rurimi, byose bigukumbuza u Rwanda kurushaho.

Iyo indege igiye guhaguruka byo biba ibindi bindi. Akaririmbo ka mbere gacurangwa ni aka Jules Sentore kitwa “Warakoze”, kumvikanisha gakondo nyarwanda maze abagenzi bakaragizwa Imana mu ijwi ritera benshi gusesa urumeza.

Mu 2017 ni bwo RwandAir yatangiye ingendo zayo zigana i Bruxelles mu Bubiligi inyuze i Londres mu Bwongereza. Ubu isigaye ikora ingendo eshatu mu cyumweru, harimo urwo ku wa Kabiri, ku wa Kane no ku wa Gatandatu. Mu ijoro ryo ku wa Gatandatu tariki ya 17 Nyakanga 2021, IGIHE yari ku Kibuga cy’Indege cya Zaventem i Bruxelles.

Uhageze ahagana saa kumi n’imwe z’umugoroba, ukerekeza intekerezo zawe mu Rwanda, usibye kubona ibyapa byinshi biri mu ndimi z’amahanga, wakeka ko uri i Kanombe.

Uba ubisikana n’abantu bambaye imipira iriho amagambo uzi neza, amwe umuntu aba yarafashe mu mutwe adashobora gusibama nubwo wamara imyaka myinshi utayabona. Uwo mugoroba nahuye n’abantu bambaye imipira yanditseho ngo “Inkotanyi ni ubuzima”, “Rwanda Nziza” n’andi afite igisobanuro gikomeye mu rwa Gasabo.

Kuri uwo mugoroba, mu bantu batanu, batatu mwashoboraga kuvugana mu Kinyarwanda kandi ubona bafite akanyamuneza ku maso kubera ikintu kimwe gusa, RwandAir.

Abanyarwanda baba mu mahanga uko bafata RwandAir bitandukanye n’uko abari imbere mu gihugu bayibona. Bo bayifata nk’ikirango, ibendera, agaciro gatuma bagendana ishema aho bari hose.

Uzamukunda Christine ni umwe mu Banyarwanda batuye ku mugabane w’u Burayi, twamusanze ku Kibuga cy’Indege i Bruxelles. Uyu mubyeyi kuva RwandAir yatangiza ingendo za Kigali-Londres-Bruxelles, nta yindi ndege aratega kandi buri mwaka akora ingendo zigana i Kigali.

Uzamukunda kimwe n’abandi benshi iyo muganira kuri RwandAir, atavuze wahita ubona icyo atekereza kuko batajya bahisha amarangamutima yabo. Mu maso yagaragazaga akanyamuneza ko kuba agenda mu ndege y’igihugu cye.

Ati “Biranshimishije kubona RwandAir ikora neza gutya, Abanyarwanda bagahaguruka na bo bakereka u Rwanda ko barukunda, ko bishimiye kujyayo nubwo ibihe bimeze nabi kubera Covid-19.”

Musengimana Erneste we yagize ati “Ni ishema cyane ku gihugu cyacu no kuri twe Abanyarwanda. Urabona nawe ukuntu abantu baba buzuye bategereje kugenda na yo no muri ibi bihe kubona indege biba bitoroshye.”

Musengimana yavuze ko uko yakirwa, uko ahabwa serivisi nziza, ubufasha ahabwa ageze ku kibuga cy’indege n’ibindi ari byo bituma umunsi ku wundi atega RwandAir iyo ashatse kujya mu ngendo.

Maxime Prevot, ni Umudepite akaba na Meya w’Umujyi wa Namur, Umurwa Mukuru w’agace kavuga ururimi rw’Igifaransa mu Bubiligi. Twamusanze mu bagenzi bari bateze RwandAir igana i Kigali aho yitabiriye inama ya 41 ya ba Meya bo mu bihugu bikoresha Igifaransa.

Usibye kwitabira iyi nama, kuza mu Rwanda bwa mbere kuri we ni n’umwanya wo kwiga no kumenya amateka y’iki gihugu cyanyuze mu bihe bishaririye kubera Jenoside yakorewe Abatutsi.

Arateganya kuzasura Urwibutso rwa Jenoside yakorewe Abatutsi rwa Kigali ku Gisozi hamwe n’urwibutso rugaragaza aho abasirikare 10 b’Ababiligi bari mu Rwanda bishwe n’ingabo za Leta ya Habyarimana, tariki ya 7 Mata 1994.

Mu bagenzi bagenda na RwandAir ihaguruka i Bruxelles harimo abari bagiye i Kinshasa muri RDC, Bangui muri Centrafrique, Bujumbura mu Burundi na Accra muri Ghana. Muri iyi minsi abagiye i Kinshasa baba ari benshi ugereranyije n’abava mu Burayi bagiye mu bindi bihugu bya Afurika.

RwandAir magingo aya ifite indege 12 zirimo ebyiri zo mu bwoko bwa Airbus A330. Muri gahunda zayo z’imyaka itanu iri imbere, harimo kongera indege n’ibyerekezo birimo nka New York yakomwe mu nkokora na Covid-19.

Icyerekezo cya Bruxelles-Londres-Kigali ni kimwe mu bifite abagenzi benshi cyane ko Abanyafurika baba muri Diaspora bayifashisha mu gusura ibihugu byabo bigakubitana n’uko Londres ari isoko rikomeye ku Rwanda mu byoherezwa mu mahanga n’ubukerarugendo.

Londres kandi ihesha amahirwe RwandAir yo korohereza abagenzi bashaka kugana mu bindi byerekezo by’Isi nka Leta Zunze Ubumwe za Amerika na Canada.

Ubu RwandAir iri mu biganiro bya nyuma by’imikoranire na Qatar Airways izaba ifitemo imigabane ingana na 49%.

Abakozi ba RwandAir bakirana urugwiro abayigana bikaba biri mu bikumbuza Abanyarwanda igihugu cyabo kurushaho
Ku Kibuga cy’Indege cya Zaventem i Bruxelles, mu bagenzi berekeza mu bice bitandukanye haba harimo n'Abategereje gukora ingendo na RwandAir
Musengimana Erneste ni umwe mu banyarwanda batewe ishema na RwandAir kubera urugwiro yakiranwa iyo ayiteze
Uzamukunda Christine ntaratega indi ndege itari RwandAir kuva yatangira ingendo zigana i Bruxelles
I Bruxelles uhura n’abantu bambaye imipira yanditseho ngo “Inkotanyi ni ubuzima” n’andi magambo afite igisobanuro gikomeye mu rwa Gasabo
Maxime Prevot, ni Umudepite akaba na Meya w’Umujyi wa Namur. Aha yari ku murongo kimwe n'abandi yitegura kwinjira muri RwandAir
Ku Kibuga cy'Indege mu Bubiligi haba hari abantu benshi biganjemo abanyafurika bateze RwandAir
RwandAir isigaye itwara abagenzi benshi bagiye muri Repubulika Iharanira Demokarasi ya Congo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .