Icyerekezo cya Onomo, hoteli imaze umwaka ku isoko ry’u Rwanda- Ikiganiro na Nizey Emile uyiyobora

Yanditswe na Habimana James
Kuya 25 Nyakanga 2019 saa 04:02
Yasuwe :
0 0

Muri Gicurasi 2018 u Rwanda rwungutse hotel y’inyenyeri eshatu (Onomo Hotel), iherereye mu Mujyi wa Kigali rwagati mu Kagari ka Rugenge, mu Murenge wa Nyarugenge ahazwi nko kuri Sopetrade.

Onomo Hotel yubakishijwe imirimbo ijyanye na gakondo y’u Rwanda mu mitako y’imigongo, ibiseke n’ibishushanyo by’ubugeni bikoreshejwe amase avanze n’ibyondo biri mu mabara abereye guhangwa ijisho.

Iyi hotel igenzurwa na ONOMO Hotels imaze kubaka izina muri Afurika, ishami ryayo rya Kigali riri muri 16 ifite kuri uyu mugabane.

Onomo hotel ifite ibyumba 109 birimo 10 byigiye hejuru, iby’inama byakira abantu hagati ya 200-250, aho abantu bogera, parking n’ibindi.

Mu gihe imaze ku isoko ry’u Rwanda, yakira ibikorwa bitandukanye n’inama zibera mu Mujyi wa Kigali nk’uburyo bwo gutanga umusanzu wayo mu iterambere rishingiye ku bukerarugendo.

Kuva muri Nyakanga 2019, Onomo hotel yabonye umuyobozi mushya, Nizey Emile, ufite ubunararibonye mu by’amahoteli akesha ubumenyi yavanye mu Bwongereza no muri Leta Zunze Ubumwe za Amerika.

Nizey w’imyaka 37 yavukiye mu Rwanda ariko aba cyane mu bihugu by’i Burayi no muri Amerika.

Ibijyanye n’amahoteli yabitangiye mu 2003 ari mu Bwongereza. Mu buhamya bwe yatangiye akora akazi gaciriritse muri hoteli.

Mu 2008 yaje kwimukira muri Amerika ahakomereza ibijyanye n’amahoteli, ubu afite Impamyabushobozi y’Icyiciro cya Gatatu cya Kaminuza mu by’amahoteli yavanye muri Kaminuza ya Florida mu Mujyi wa Miami, yanahakuye iy’Icyiciro cya Kabiri cya Kaminuza mu bijyanye n’Imari.

Nizey yagiranye ikiganiro na IGIHE cyibanze ku cyerekezo cya Onomo Hotel n’imishinga ifite mu isoko ry’amahoteli mu Rwanda.

IGIHE: Onomo Hotel ihagaze ite ku isoko rya serivisi zo kwakira abantu mu Rwanda?

Nizey: Mu mahoteli tungana urebye n’igihe tumaze ku isoko, ubona ko tugeze ku rwego rwiza kandi turimo guhatana mu byo dutanga, mu myaka ibiri cyangwa itatu iri imbere tuzaba tugeze ku rwego rukomeye.

IGIHE: Ni iki Onomo Hotel yihariye kiyitandukanya n’andi mahoteli?

Nizey: Turi hoteli yibanda mu gukorana n’abanyabugeni n’abahanzi b’imbere mu gihugu. Ibi ni ibintu twashyizemo imbaraga, nureba muri hoteli uzasangamo ibintu by’ubugeni kandi byakorewe mu Rwanda, abanyamideli na bo ni abantu tugomba gukorana na bo. Gahunda dufite ni uguteza imbere ibintu bikorerwa mu Rwanda ariko cyane cyane dushyira imbaraga ku banyabugeni.

Ikindi navuga ni uko turi hoteli y’Abanyafurika, turi mpuzamahanga ariko muri twe dufite Afurika imbere, ni hoteli ifite icyicaro muri Maroc ariko ikorera n’ahandi muri Afurika.

Izina Onomo ubwaryo rifite inkomoko muri Mali, andi mahoteli hano ubona ko ari ayo muri Amerika n’i Burayi ariko twe twazanye iryo tandukaniro.

IGIHE: Murateganya kuzajya mukorana n’abahanzi mu buhe buryo?

Nizey: Tuzajya tugira imurikabikorwa ry’abahanzi, noneho ONOMO ibe aho abahanzi bose bumva ko bagomba gukorana nayo. Iyi ni gahunda nshya mfite nk’umuyobozi, tugomba kwegera abahanzi yaba amastudio, abakora iby’ubugeni bose bakerekana ibihangano byabo hano.

Turashaka ko Onomo Hotel iba igicumbi cy’ubuhanzi Nyarwanda, turanashaka kuzahashyiraho ahantu bacururiza ibintu byabo kuko twabonye ko abanyamahanga benshi baba babishaka.

IGIHE: Nk’umuyobozi mushya ni uruhe ruhare uzatanga mu guteza imbere serivisi za hoteli ?

Nizey: Mfite ubumenyi buhagije mu by’amahoteli, iyo urebye iby’amahoteli mu Rwanda ubona ko byibanzwemo cyane n’abanyamahanga, gusa ni ibintu byumvikana kuko ni bishya mu gihugu kandi urebye ingufu u Rwanda rwashyize mu cyerekezo cyo kwakira abantu, hagombaga amahoteli mpuzamahanga kandi koko akeneye ubwo bumenyi.

Nta Munyarwanda wakoze mu mahoteli mpuzamahanga igihe kirekire, njye rero nagize ayo amahirwe yo kuba narakoranye n’amahoteli nka Radisson, Hilton, Marriott n’andi.

Umuyobozi wa Onomo Hotel, Nizey Emile, yatangaje ko hoteli ifite intego yo gukomeza gutera imbere muri serivisi itanga

IGIHE: Muri Kamena 2020, u Rwanda ruzakira Inama ihuza Abakuru b’ibihugu na za Guverinonma bigize Umuryango w’Ibihugu bikoresha Icyongereza (CHOGM). Onomo Hotel yiteguye ite kwakira abayobozi?

Nizey: Nk’andi mahoteli yose hari ibirimo gukorwa kugira ngo twitegure, hari inama tuzagirana n’abafatanyabikorwa kandi twamaze kubona ubutumwa buva muri RDB na Rwanda Convention Bureau butubwira iyo gahunda. Hari ibyo turimo guhindura bijyanye n’iyo nama ariko bigomba kuba ari ibintu bizamara igihe kirekire.

IGIHE: Onomo Hotel ihagaze he mu bijyanye no guteza imbere ibikorerwa mu Rwanda?

Nizey: Twe dukoresha iby’iwacu kandi dufite n’akarusho kuko dufite akarima k’igikoni, Made in Rwanda itangirira iwacu. Ibyo dukoresha byinshi tubikura mu Rwanda, yego hari ibikiva hanze wenda tutaragira ubushobozi bwo gukorera mu Rwanda ariko ibyinshi dukoresha ibiva hano mu Rwanda.

IGIHE: Mubona Abanyarwanda bitabira kujya mu mahoteli?

Nizey: Icyo ni ikibazo kikidukomereye kuko Abanyarwanda benshi bumva ko aya mahoteli ari ibintu by’ibitangaza, ariko biterwa n’umuco wacu wo kudakunda gusura ibintu nyaburanga byo mu Rwanda. Iyo hajemo amahoteli byo usanga ari ibindi, nzi abantu babona nka Marriott Hotel ariko ntibajyeyo kandi babishoboye.

Simvuze ngo ibiciro byose abantu babishobora ariko reka dufate ikintu twese ducuruza mu Rwanda (Fanta), igiciro cyayo muri Onomo Hotel ni 1000 Frw; ibyo bituma abantu badakwiye kumva ko ari ahantu hatabagenewe. Ibyo nk’abanyamahoteli nitwe tugomba kubihindura.

IGIHE: Ni ikihe cyerekezo cya Onomo Hotel?

Nizey: Dufite abakozi kandi bafite ubumenyi buhagije, abo dufite bakoze mu mahoteli akomeye barimo n’abafite ubumenyi burengeje imyaka itandatu mu kazi k’amahoteli.

Intego yacu ni ugukomeza gutanga serivisi nziza ariko byaba na ngombwa tugafungura irindi shami rya Onomo Hotel mu Rwanda, icyo gihe bizagaragaza ko yateye imbere, turashaka ko aha haba ahantu Abanyarwanda biyumvamo.

Umuyobozi wa Onomo Hotel, Nizey Emile, yavuze ko hoteli ifite umwihariko wo guteza imbere ibikorerwa mu Rwanda na Afurika muri rusange
Onomo Hotel ifite abayobozi n'abakozi bafite uburambe mu bijyanye no kwakira abantu
ONOMO Hotel imaze umwaka ifunguye imiryango mu Mujyi wa Kigali
Onomo Hotel yubakishije ibikoresho byiganjemo ibya Kinyafurika nk'imigano n'ibindi
Ibihangano by'abanyabugeni byashyizwe muri Onomo Hotel bibereye ijisho
Kimwe mu bihangano by'ubugeni biri muri Onomo Hotel ishami rya Kigali. Cyahanzwe na Musoni Gilbert
ONOMO Hotel ifite gym irimo ibikoresho nkenerwa byose
Nta kinyobwa waburira muri ONOMO Hotel
Onomo Hotel yafunguwe ku mugaragaro ku wa 8 Ugushyingo 2018
Onomo Hotel ifite ibyumba byagenewe kwakira abaturutse mu bice bitandukanye by'Isi bagana u Rwanda
Mu byumba bya ONOMO Hotel harimo umwanya wagenewe uruganiriro
Hoteli ONOMO ifite piscine igezweho aho uyogeyemo aba yitegeye imwe mu misozi igaragaza ubwiza bwa Kigali

Amafoto: Muhizi Serge na Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza