Kwamamaza

Ibihugu bitandatu bya Afurika biri i Kigali mu imurikagurisha ry’ubukerarugendo

Yanditswe kuya 28-08-2016 saa 09:46' na Philbert Hagengimana


Ibihugu bitandatu bya Afurika ni byo byitabiriye imurikagurisha ry’Ibikorwa by’Ubukerarugendo ndetse n’ibindi bijyana na bwo, abaturarwanda bakaba bakangurirwa kuryitabira bakihera ijisho ibikorerwa mu rw’imisozi igihumbi ndetse n’ahandi.

Benshi mu banyarwanda bumva ubukerarugendo bagakeka ko bugenewe abanyamahanga gusa cyangwa abifite kurusha abandi mu bukungu. Icyakora uwanyarukira i Kigali ahagenewe ibikorwa by’imurikagurisha (Kigali Conference and Exhibition Village), yashira impungenge ndetse akanazimara abandi.

Ibigo byashoye imari mu bukerarugendo no mu zindi serivisi zijyana na bwo mu bihugu bya Nigeria, Zimbabwe, Kenya, Tanzania, Uganda, n’u Rwanda, ni byo biteraniye i Kigali mu imurikagurisha ryatangiye kuri uyu wa Gatandatu tariki ya 27 Kanama 2016 rizamara iminsi itatu.

Mu muhango wo gutangiza iryo murikagurisha, Umuyobozi wa RDB, Francis Gatare, yibukije ko ubukerarugendo butuma abantu barushaho kubaho neza banabungabunga ikirere ndetse n’ibidukikije.

Yibukije kandi ko imurikagurisha nk’iri rinafasha u Rwanda guha icyerekezo ubukerarugendo bwarwo, rikanongera imbaraga mu bufatanye bugamije kugera ku ntego z’aba iz’u Rwanda ndetse na Afurika muri rusange, anibutsa kandi ko ari igikorwa kibaye bwa mbere kandi kizahoraho.

Gatare yagize ati “Mwese mwahisemo kwitabira iri murikagurisha ry’ingirakamaro ku bw’inyungu dusangiriye mu guteza imbere Ubukerarugendo. Iri murikagurisha ribaye ku nshuro ya mbere, ariko tuzahora turitegura, kubera iyo mpamvu turasaba abakora ibikorwa by’ubukerarugendo ndetse n’abamurika ko bajya baryitabira.”

Yaboneyeho gukangurira abaturarwanda kwitabira iri murikagurisha ku bwinshi, bakabasha kwihera ijisho itandukaniro hagati y’Ubukerarugendo na serivisi zijyana na bwo zitangirwa mu Rwanda, ndetse n’izitangirwa mu bindi bihugu bitanu byaryitabiriye.

Imurikagurisha ry’ibikorwa by’Ubukerarugendo rizasozwa kuri uyu wa Mbere tariki ya 29 Kanama ribaye rikurikira igikorwa cyo gukusanya amafaranga yo gushora mu mishinga itatu yo kwagura ubukerarugendo no kubungabunga ibidukikije, cyabaye kuri uyu wa Gatanu tariki ya 26 Kanama, hagakusanywa miliyoni 25 z’amafaranga y’u Rwanda.

Ibyo bikorwa byombi kandi, ni bimwe mu bibanziriza umuhango nyir’izina wo Kwita Izina abana 22 b’ingagi bavutse nyuma y’Itariki ya 5 Nzeli 2015, uwo muhango ukazaba tariki ya 2 Nzeli 2016.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved