00:00:00 IGIHE NETWORK KN KINYARWANDA EN ENGLISH FR FRANCAIS

Gutembera Isi mu ndege ya Boom Supersonic bigiye kuba nk’isoko idudubiza ntigire n’umwe ibuza kudubika

Yanditswe na Zigiranyirazo Bajecteur
Kuya 19 Gicurasi 2021 saa 08:20
Yasuwe :
0 0

Ingendo zogoka ikirere mu ndege si uburyo bwa giseseka ku bantu bose ku buryo hari n’abagenda bwa mbere mu ndege bakabifata nko gukabya inzozi cyangwa guca agahigo mu buzima bwabo, gusa ibi ikigo cya Boom Technology, Inc kibinyujije muri Boom Supersonic kirenda kubishyiraho akabago aho gifite gahunda yo gutwara abantu ku Isi aho ari ho hose mu gihe cy’amasaha ane ku madolari 100.

Mu gihe urwego rw’ubwikorezi bwo mu kirere ruri mu bibazo by’ihungabana ry’ubukungu ritigeze kubaho kuva bwatangira gukoreshwa ku wa 17 Ukuboza 1903 kubera icyorezo cya Coronavirus cyibasiye Isi mu bice bitandukanye, ibi bikaba byaraganishije ku kuba hashize umwaka urenga hari abantu batabonana n’inshuti zabo, ntibajye mu mirimo y’ubushabitsi cyangwa se ibiruhuko nk’uko bari basanzwe babigira, Boom Supersonic yiteguye gufasha abantu kongera guhura n’inshuti n’abavandimwe vuba kandi ku mafaranga make.

Nyuma y’uko hakozwe indege nini ya Concorde ihuriweho n’u Bwongereza n’u Bufaransa, ikaba imwe mu ndege ebyiri zihariye za Supersonic zashoboraga kugendera ku muvuduko ukubye kabiri uw’ijwi, zakoze ingendo zitandukanye kuva mu 1969 kugeza mu 2003 ariko kuzigendamo bikaba byari bihenze cyane ku buryo bitigonderwaga na benshi ndetse ingendo zazo zikaba zari n’icyago ku busugire bw’ikirere, Boom Supersonic yongeye kubyutsa inzozi za Concorde zari zimaze imyaka hafi 20 zidakabywa.

Iyi ndege izaba ifite ubushobozi bwo kugendera ku muvuduko wa kilometero 2695 ku isaha, biteganyijwe ko itangira kogoga ikirere mu 2026 nk’uko bitangazwa na Blake Scholl uri mu batangije ikigo cya Boom Technology, Inc gikoresha izina ry’ubucuruzi rya Boom Supersonic.

Ati “Wenda turatsindwa cyangwa se duhindure isi.” Aha yagarukaga ku kuba bagiye gushyira iherezo ku mbogamizi abantu bakunze guhura na zo muri gahunda zabo za buri munsi cyane cyane mu ngendo.

Kuva mu myaka ya za 50 na za 60 ntabwo hongeye kubaho indege zihuta kurusha izihariye zakozwe muri iyo myaka ya 1950 na 60 ariko Scholl yiringiye ko we n’ikipe ye ibi bagiye kubihindura insigamugani.

Ati “Iki kibazo cy’igihe ni cyo gikomeje kuducura bufuni na buhoro, twizera ko ari ikintu cy’ingenzi cyane kuvanaho iyi nzitizi y’igihe.”

Iyi ndege yihariye biteganyijwe ko yajya itwara abantu babarirwa hagati ya 65 na 88 ku ikubitiro ikazajya ijya mu byerekezo bigera kuri 500 kandi nibura ikihuta inshuro zirenze ebyiri umuvuduko indege zihariye zari zisanzwe zikoresha.

Ubusanzwe urugendo ruva i New York rwerekeza Londres rwatwaraga amasaha arindwi n’iminota 27 ruzajya rumara amasaha atatu n’iminota 15 gusa na ho uruva i Los Angeles rwerekeza i Sydney rwamaraga amasaha 15 n’iminota icyenda ruzagabanukaho amasaha umunani n’igice.

Scholl avuga ko kuvanaho iyi mbogamizi y’igihe bizahindura ubuzima bw’abatuye Isi aho agira ati “Abantu bazahindura aho bajyaga mu biruhuko, aho bakoreraga ubushabitsi ndetse n’abantu bashobora gukundana cyangwa kuba inshuti magara.”

Ibi abishingira ku kuba ikibazo cyo kubonana mu Isi kitazaba kikiri kidobya biturutse ku mikoro cyangwa se igihe.

Ati “Turashaka ko indege ya Supersonic ikora amateka ahambaye ariko kandi kuyigendamo bikaba byakwigonderwa n’abantu benshi. Ziriya za mbere wagendaga wishyuye akayabo k’amadolari ibihumbi 12, wagereranya n’ibihumbi 20 muri iyi minsi, biriya si urugendo, ni ikintu umuntu yakora inshuro imwe mu buzima bwe. Twe dushaka ko umuntu yajya agera aho ashaka hose ku Isi mu masaha ane kandi ku madolari 100.”

Izi nzozi ziswe iz’amasaha ane ku madolari 100, Scholl avuga ko ari iz’igihe kirekire kandi zishobora kuzamara ibiragano bibiri cyangwa bitatu ari agahigo kataravanwaho.

Iyi ndege byitezwe ko igiye guhindura uburyo ingendo zo mu kirere zikorwa
Izaba ifite umuvuduko ukomeye wikubye hafi inshuro ebyiri uw'indege zisanzwe
Nta ndege yihuta nk'iyi iri ku Isi muri iki gihe, byitezwe ko mu myaka itanu iri imbere izatangira kogoga ibicu
Urugendo rwatwaraga nk'amasaha umunani mu kirere, ruzaba atatu
Byitezwe kandi ko igiciro cy'ingendo zo mu kirere kizagabanuka kubera izi ndege

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .