00:00:00 IGIHE NETWORK KN KINYARWANDA EN ENGLISH FR FRANCAIS

Dutemberane kuri ‘Muhazi Beach Resort’, Hotel ibitse amateka yihariye (Amafoto)

Yanditswe na Nsengiyumva Emmy
Kuya 5 Nyakanga 2021 saa 01:37
Yasuwe :
0 0

Muri iyi minsi Ikiyaga cya Muhazi kiri mu bikurura ba mukerarugendo by’umwihariko ab’imbere mu gihugu, kimwe mu bituma kiganwa cyane harimo na hotel nziza zikomeje kuzuzwa ku nkengero zacyo.

Imwe muri Hotel zakira abantu benshi bifuza gusura Ikiyaga cya Muhazi, ni ‘Muhazi Beach Resort’ yubatse mu Karere ka Rwamagana mu Murenge wa Muhazi.

Iyi Hotel yubatse neza ku nkengero z’ikiyaga cya Muhazi ifite amateka yihariye atangira mbere ya Jenoside yakorewe Abatutsi mu 1994.

Mu ishingwa ryayo yitwaga ‘Canard Sauvage’, amakuru akavuga ko bari barayihaye iri zina kubera ibishuhe byakundaga kuba byizengurutsa ku nkengero z’ikiyaga hafi y’aho yari yubatse.

Ubwo urubyiruko rwasuraga ahatangirijwe urugamba rwo kubohora Igihugu mu Karere ka Nyagatare, Sosiyete itembereza ba mukerarugendo, ‘MB Simba Safaris Rwanda LTD’ yabacumbikiye kuri ‘Muhazi Beach Resort’ ibitse andi mateka y’u Rwanda.

Murenzi Donatien waguze iyi Hotel akayagura ndetse akanayihindurira izina, yavuze ko yayihisemo kuko azi amateka yayo cyane ko yubatse mu gace yavukiyemo akanahakurira.

Yitorejwemo n’ingabo z’u Bufaransa zari zambariye gutabara Habyarimana

Murenzi yabwiye IGIHE ko bari bazi neza ko iyi hotel ari iya Perezida Habyarimana Juvénal, Col Sagatwa Elie, Kabuga Felicien n’uwari Burugumesitiri wa Komine Muhazi witwaga Nkurunziza.

Icyakora bari barayanditse ku Mubiligi Paul Henrio. Ni Hotel yakundaga kuruhukiramo abakomeye muri Leta ya Habyarimana ndetse yanaberagamo inama za Guverinoma zinyuranye.

Mu 1993, ubwo urugamba rwo kubohora igihugu rwari rugeze ahashyushye, iyi Hotel ni yo yaberagamo imyitozo y’ingabo z’u Bufaransa zari zakereye gutabara Habyarimana.

Abonye iby’urugamba byanze, Paul Henrio wari waranditsweho iyi Hotel ari na we wayigenzuraga yahise yisubirira iwabo mu Bubiligi.

Mu 2004, Murenzi wari uzi neza amateka y’aha hantu kuko yari ahaturiye, yahise ajya mu Bubiligi gushaka Paul Henrio ngo ahagure.

Ati “Ku bw’amahirwe nasanze n’ibyangombwa ari we byanditseho duhita tugura gutyo ndaza ntangira kubaka.”

Nubwo yayivuguruye akayongera ubunini guhera mu 2008, Murenzi yavuze ko amateka iyi Hotel ibitse atigeze yifuza ko yasibangana.

Ati “Nk’ahaberaga inama ya Guverinoma n’aho abakomeye biyakiriraga sinigeze ngira byinshi mpahindura;yego narasannye kuko bari barabisenye byose ariko nashatse ko hagumana isura hahoze hafite.”

Iyi Hotel iherereye mu birometero bike cyane usohotse mu Mujyi wa Kayonza werekeza i Rwamagana kugeza ubu iri mu zisurwa n’abatari bake ariko abenshi bagataha batamenye amateka yayo.

Hano uba ucyinjira muri Muhazi Beach Resort
Aya ni yo marembo yinjiraga muri Hotel mbere gato ya Jenoside yakorewe Abatutsi
Iyi bingaro ni yo abakomeye bakundaga gusangiriramo, ni na yo yaberagamo inama zikomeye zirimo n'iya Guverinoma
Umuyobozi wa MB Simba Safaris Rwanda Ltd, Bahizi Michel (iburyo) na Murenzi Donatien umuyobozi w'iyi Hotel
Sima yo muri iyi nyubako ntabwo nyiri Hotel yigeze yifuza kuyihindura
Inzira igana mu byumba bitandatu byararagamo abayobozi
Uhagaze kuri ibi byumba uba witegeye Ikiyaga cya Muhazi
Iki giti cy'umuvumu giteye mu busitani bw'iyi Hotel ni cyo cyonyine kitigeze gitemwa
Indaki ingabo z'u Bufaransa zari zaraciye n'ubu haracyagaragara ibimenyetso byazo
Inyoni zirimo n'ibishuhe zikunda kuba ziri ku nkengero z'ikiyaga nizo zari zaratumye bahitirira 'Ibishuhe'
Ubu bwato bwatemberezaga abasuye iyi Hotel kuva na kera n'ubu buracyakoreshwa
Ni Hotel yubatse mu buryo bwihariye, hari igice usanga buri cyumba gifite inzu yacyo
Uburyo iyi hotel yubatse,kuyitembera neza bisaba kuba winjiye mu mazi
Ni Hotel yubatse ku gasozi kari ku nkengero z'ikiyaga cya Muhazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .