00:00:00 IGIHE NETWORK KN KINYARWANDA EN ENGLISH FR FRANCAIS

Covid-19 yateje icyuho cy’abasura Ingoro y’Amateka y’Abami i Nyanza

Yanditswe na Prudence Kwizera
Kuya 7 Nyakanga 2021 saa 06:28
Yasuwe :
0 0

Icyorezo cya Covid-19 cyateje icyuho mu basura Ingoro y’Amateka y’Abami mu Karere ka Nyanza baragabanuka cyane bava ku bantu barenga ibihumbi 65 bahasuraga ku mwaka basigara batageze no ku bihumbi umunani.

Mu Karere ka Nyanza ahitwa mu Rukari, ni ho hari Ingoro y’Abami b’u Rwanda igaragaramo amateka yihariye kandi ateye amatsiko, ku buryo buri wese uhasuye amara umwanya areba ibimenyetso bihari bigaragaza uko Abami b’u Rwanda babagaho ndese n’umuco wihariye w’abenegihugu.

Nyanza yafatwaga nk’Umurwa w’Ubwami kuva mu mpera z’ikinyejana cya 19 kugeza mu mwaka wa 1961.

Aha mu Kagari ka Rwesero mu Murenge wa Busasamana niho hari Ingoro z’Abami, hahoze urugo rw’Umwami Mutara wa III Rudahigwa wabatijwe Charles Leon Pierre, watwaye u Rwanda kuva mu mwaka w’1931 kugeza mu mwaka w’1959.

Gahongayire Yvonne uyobora Ingoro y’Amateka y’Abami mu Karere ka Nyanza avuga ko kuva icyorezo cya Covid-19 cyatumye abayisura bagabanuka cyane.

Ati “Mu mwaka wa 2018-2019 twakiriye abashyitsi 65,017; mu 2019-2020 twakira abantu 35,965 kuko batangiye kugabanuka kubera Covid-19 naho mu 2020-2021 hasuwe n’abantu 7,910.

Avuga ko mu mwaka wa 2019-2020 ari bwo ababasura batangiye kugabanuka kuko icyorezo cya Covid-19 cyageze mu Rwanda muri Werurwe 2020 hashize amezi arindwi umwaka w’ingengo y’imari utangiye.

Ati “Abantu bahise bagabanuka cyane bigaragara kandi nibwo igihe cyo kuza kw’abashyitsi benshi kiba kigeze kugera mu kwezi kwa gatanu n’ukwa gatandatu.”

Umuyobozi w’Akarere ka Nyanza, Ntazinda Erasme, avuga ko igitaramo ngarukamwaka ‘Nyanza Twataramye’ cyinjiririzaga Abanyenyanza benshi amafaranga mu gihe gito ariko na cyo Covid-19 yatumye gisubikwa.

Icyo gitaramo cyahuzaga abarenga ibihumbi bitatu mu ijoro rimwe bakarara inkera i Nyanza ntabwo kikihabera kuko umwaka ushize cyabereye kuri televiziyo abantu ntibahura ngo bidagadure ndetse n’uyu mwaka bigaragara ko ari ko bizagenda.

Ntazinda avuga ko kuba kitakibera i Nyanza ngo abantu bahure basabane byateje icyuho mu basura akarere n’igihombo ku bakora ubucuruzi.

Ati “Icyuho kirahari kinini kuko iyo uganiriye n’abacuruzi bo mu Mujyi wa Nyanza bavuga ko uwo munsi wri igitangaza kuri bo kuko kuva k’ufite hoteli kugera no ku munyonzi w’igare, kugera no k’ucuruza avoka mu gatebo, abo bose baracuruzaga bakanezererwa.”.

Nyanza Twataramye ni igitaramo kibanziriza umuganura uba mu kwezi kwa Kanama buri mwaka. Yatangiye kubera mu Karere ka Nyanza mu 2014.

Bamwe mu bakorera ubucuruzi mu Mujyi wa Nyanza na bo bavuga ko kuri ubu batakibona abakiriya nka mbere kubera Covid-19.

Musengimana Gérard ati “Abakiriya ni bake cyane ntabwo bakiza nka mbere kubera iki cyorezo. Umuntu ashobora kumara umunsi wose nta bakiriya batanu yakiriye kuko nta bashyitsi bakiza i Nyanza.”

Ingoro y’Amateka y’Abami igizwe n’ibice bine; icya mbere ni Ingoro Umwami Yuhi V Musinga yabayemo n’abandi bamubanjirije bose, igaragiwe n’izindi nzu ebyiri za kagondo (Iy’amata ndetse ndetse n’iy’inzoga). Igice cya kabiri kigizwe n’inyambo (inka z’amahembe ashyorongoshyoye).

Icya gatatu ni ingoro y’Umwami Mutara III Rudahigwa, naho icya kane kigizwe n’aho Abami batabarije i Mwima.

I Nyanza hatuwe n’Abami bane ari bo Kigeli IV Rwabugiri wari utuye ku misozi ya Mwima na Mushirarungu; Yuhi IV Musinga watuye i Mwima na Gakenyeri; Mutara III Rudahigwa watuye mu Rukali ndetse n’Umwami Kigeli V Ndahindurwa watuye i Busasamana.

Ingoro y’Umwami Mutara wa III Rudahigwa yubatswe n’Ababiligi mu mwaka wa 1932 iri mu zikunda gusurwa n'abaturutse imihanda yose
I Nyanza mu Rukari hagaraga inka z’Inyambo zifite amahembe adasanzwe
Covid-19 yateje icyuho kinini mu basura Ingoro y’Amateka y’Abami i Nyanza
Akarere ka Nyanza kabumbatiye amateka menshi yiganjemo ayo hambere kuko Nyanza yabaye Umurwa Mukuru w’Ubwami kuva mu 1899 kugeza mu mu 1962

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .