California: Abanyarwanda bizihije Umuganura bishimira intambwe u Rwanda rwateye mu myaka 23

Yanditswe na IGIHE
Kuya 29 Kanama 2017 saa 06:44
Yasuwe :
0 0

Umuryango w’Abanyarwanda batuye mu Mujyi wa Sacramento, muri California, imwe muri leta zigize Leta Zunze Ubumwe za Amerika, bahuriye mu birori byo kwizihiza umunsi w’Umuganura, ku wa 26 Kanama 2017.

Usibye gusangira ku musaruro nk’uko byakorwaga hambere, kuri ubu umuganura ufatwa nk’umwanya wo kwishimira ibyo igihugu cyagezeho mu nzego zitandukanye zigize ubuzima bw’abanyarwanda zirimo ubuhinzi, uburezi, umutekano, ibikorwaremezo n’ubuzima zagiye zitera imbere mu myaka 23 ishize u Rwanda rukomeza kwiyubaka.

Muri uyu muhango, Ambasaderi w’u Rwanda muri Leta Zunze Ubumwe za Amerika, Mukantabana Mathilde yasobanuye amateka y’Umuganura n’icyo uvuze mu kwiyubaka kw’igihugu n’ubumwe n’ubwiyunge bw’abagituye.

Ambasaderi Mukantabana hamwe n’uhagarariye abanyarwanda batuye mu Mujyi wa Sacramento, Yehoyada Mbangukira, bahaye abana amata ndetse n’abakuru babaha amafunguro ya Kinyarwanda banasusurutswa n’imbyino gakondo.

Abanyarwanda bari imbere mu gihugu bizihije Umuganura ku Cyumweru tariki ya 27 Kanama, ku rwego rw’igihugu ibirori bikaba byarabereye i Nyanza mu Ntara y’Amajyepfo, bibimburirwa n’ibikorwa bitandukanye byabereye i Kigali birimo iserukiramuco rizwi nka "Kigali-Up" ndetse n’umutambagiro w’umuganura.

Abanyarwanda baba hirya no hino mu bihugu by’amahanga na bo bizihije umunsi w’Umuganura bafatanyije n’inshuti z’u Rwanda. Igikorwa cy’Umuganura muri 2017 cyahawe insanganyamatsiko igira iti "Umuganura, isoko y’ubumwe n’ishingiro ryo kwigira".

Mu mateka y’u Rwanda, umunsi w’umuganura wari umunsi mukuru ukomeye haba i bwami no kuri rubanda, kuri uwo munsi umwami yamurikirwaga umusaruro w’Abanyarwanda bavuye impande zose z’igihugu, agasangira n’abaturage ndetse akishimana nabo.

Uyu muhango wari ufite akamaro ko gusangira no kwishimira umusaruro wabonetse, byakorwaga mu gitaramo cyiswe icy’umuganura. Uyu muganura ariko wagiraga n’undi mumaro wo kuzirikana umwami nka nyir’uburumbuke bakamutura urutete rw’imyaka yeze.

Uyu muhango wakomeje gukorwa no mu yindi myaka yakurikiye ubutegetsi bw’umwaduko w’abazungu, gusa ukaba waragiye uhindurirwa inyito n’uburyo bwo kuwizihiza. Usigaye ukorwa mu rwego rwo kwishimira umusaruro, Abanyarwanda bagahura bagasangira ibyo kurya bakanywa n’amayoga.

Ambasaderi Mathilde Mukantabana aha abana amata
Abitabiriye ibirori by'Umuganura basangiye amafunguro arimo n'aya kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza