00:00:00 IGIHE NETWORK KN KINYARWANDA EN ENGLISH FR FRANCAIS

Amarangamutima y’umunyamakuru Anjaly Thomas wanyuzwe n’ubwiza bw’u Rwanda

Yanditswe na Muhonzire Sylvine
Kuya 19 Nzeri 2021 saa 07:00
Yasuwe :
0 0

Anjaly Thomas, umunyamakuru wamenyekanye cyane mu kwandika inkuru z’ubukerarugendo, akaba umwe mu bari kuzengurutswa u Rwanda muri gahunda yo gutegura umuhango wo Kwita Izina ku nshuro ya 17, yarubengutswe atangazwa n’isuku yahabonye kugera no mu mijyi yunganira Kigali.

Uyu munyamakuru wazengurutse kimwe cya Kabiri cy’Isi, abinyujije ku rubuga rwe rwa Twitter, yavuze ko u Rwanda aricyo gihugu gifite isuku ku Isi ndetse arahira ko nihagira ubona n’icupa ryashizemo ikintu ku muhanda atazongera kwisiga ‘lipstick’ [ibirungo by’ubwiza basiga ku munwa].

Ubwo yari mu Mujyi wa Rusizi, yafashe amashusho y’umuhanda yari ari kunyuramo ari mu modoka, maze ayashyira kuri Twitter yandikaho ati “Nihagire umuntu unyereka byibura n’ikintu na kimwe cy’umwanda! Nihagira ukibona nzahita ndekeraho kwisiga lipstick! U Rwanda ni cyo gihugu ku Isi ‘gifite isuku.’”

Anjaly Thomas ukomoka mu Buhinde yamaze impungenge abagore bose bifuza gusura u Rwanda, ababwira ko ari igihugu cyiza gifite umutekano ndetse gifite n’abaturage bagira urugwiro, kandi giha agaciro abagore.

Yagize ati “Ku bagore bose bakora ubukerarugendo batekereza kuza mu Rwanda, mubikore rwose. Umutekano wanyu, icyubahiro ndetse n’icyizere byitabwaho. Muzaba muri mu biganza byiza. Ndabarahiye!”

Uyu munyamakuru ufite urubuga rwa TravelwithAnjaly.com yandikaho inkuru zivuga ku ngendo aba yakoze zitandukanye hirya no hino ku Isi. Yavuze ko mu Rwanda hari byinshi byagutera ibyishimo birimo ikawa iryoshye, icyayi, amashyamba n’ibindi.

Kuva yagera mu Rwanda ku itariki 16 Nzeri 2021, nta munsi urashira atanditse kuri Twitter ikintu cyiza yabonye ku Rwanda, biherekejwe n’amafoto atandukanye ndetse n’amashusho abihamya.

Anjaly Thomas ni umunyamategeko, akaba umunyamakuru wandika mu binyamakuru bitandukanye birimo n’icyitwa ‘Khaleejtimes.com’ cyo muri Leta Zunze Ubumwe z’Abarabu (UAE). Ni n’umwanditsi w’ibitabo.

Igitabo cya mbere yanditse kivuga ku buzima bwe cyitwa ‘Almost Intrepid’, yanditse n’icyitwa ‘There are no gods in North korea’ (Nta mana ziba muri Koreya ya Ruguru), ‘Lonely Planet (Dubai)’ ndetse n’icyitwa ‘UAE Country Guide’.

Ubu ari mu ruzinduko rw’iminsi icumi mu Rwanda hamwe n’abandi banyamakuru mpuzamahanga bandika inkuru z’ubukerarugendo aho bari gutemberezwa u Rwanda, ndetse berekwa ibyiza birutatse muri gahunda yo gutegura umuhango ngarukamwaka wo Kwita Izina abana b’ingagi ku nshuro ya 17.

Anjaly Thomas yabengutse u Rwanda ahamagarira n'abandi kurusura kuko rufite ibyiza byinshi birimo n'umutekano
Anjaly ni umwe mu ba banyamakuru bari kwerekwa ibyiza bitatse u Rwanda
Aha Anjaly yari kumwe n'abana bo mu mashuri abanza
Atembera mu bice binyuranye mu Mujyi wa Kigali
JPEG - 645.5 kb
Icyayi kiri mu byamushimishije
Aha Anjaly yari ari kumwe n'Umuyobozi w'Agateganyo w'Ishami ry'Ubukerarugendo mu Rwego rw'Igihugu rw'Iterambere (RDB), Kageruka Ariella
Anjaly yabwiye abamukurukira kuri Twitter ko hari byinshi byiza u Rwanda rufite batazi
Yavuze ko u Rwanda aricyo gihugu gifite isuku ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .